Read Quechua Cuzco Bible 1988 JEREMÍAS 24 Bible Online

JEREMÍAS 24 - Quechua Cuzco Bible 1988 bible

JEREMÍAS 24

¹Babilonia rey Nabukodonosormi Jerusalenmanta suyunman presota aparqan Judá rey Joakimpa churin Jekoniasta, Judapi uma runakunata, artesanokunata, fierro takaq runakunatawan. Chaykuna qhepatan Señor Diosqa rikuchiwarqan yupaychana wasiq ñawpaqenpi iskay canasta higosta.

²Hukkaq canastapi higosmi kasqa ñawpaq poqoqmanta allinnin, hukkaqpitaq millay mana mikhuykuy atiy higos.

³Hinan Señor Diosqa tapuykuwarqan: Jeremías, ¿imatan rikushanki? nispa. Ñoqataq nirqani: Higostan, sumaq kaqqa may sumaqpunin kashan, mana allin kaqtaq millaypuni kashan, mana mikhuykuy atiyraq, nispa.

⁴Chaymi Señor Diosqa niwarqan:

⁵Ñoqa Israelpa Diosnin Señormi nini: Chay sumaq higosta hinan qhawarisaq Judamanta apasqanku runakunata, Babilonia runakunaq suyunmanqa ñoqan paykunata apachirqani.

⁶Chaypin sumaqta rikumusaq, kay llaqtamantaq kutichikampusaq. Paykunataqa sayarichisaqmi manataq thunisaqchu, takyachisaqmi manataq t'irasaqchu.

⁷Allin yuyaytan qosaq ñoqa Señor Diosqa kasqayta reqsiwanankupaq, tukuy sonqowanmi ñoqaman kutirimpuwanqaku. Paykunan kanqa llaqtay, ñoqataq kasaq Diosninku.

⁸Ichaqa Judá rey Sedekiasta, uma runakunata, Jerusalenpi qhepakuqkunata, suyupi qhepakuqkunata, hinallataq Egiptoman pasakuqkunatapas chay millay mana mikhuy atiy higosta hina qhawarisaq.

⁹Paykunatan wak suyukunapaq pasaq llaksakuyta ruwasaq, maymanchus ch'eqechisqay suyukunapin paykunaqa kanqaku k'aminapaq, rimaypi rimanapaq, asikunapaq, ñakanapaqwan.

¹⁰Paykunamanqa kachaykusaqmi awqa-tinkuyta, yarqayta, hatun onqoytawan machulankuman qosqay suyupi llapanku tukukunankukama, nispa.