Read Quechua Cuzco Bible 1988 JEREMÍAS 25 Bible Online

JEREMÍAS 25 - Quechua Cuzco Bible 1988 bible

JEREMÍAS 25

¹Judapi Josiaspa churin Joakim kinsa wata kurakña kamachikushaqtintaq, Señor Diosqa llapan Judá runakunamanta Jeremiasman willarqan. Chay watan Nabukodonosorqa Babilonia suyupi chayllaraq rey kasharqan.

²Hinan profeta Jeremiasqa Judá suyuman Jerusalén llaqtamanwan nirqan:

³Amonpa churin Josiaspa Judá suyupi chunka kinsayoq wataña rey kasqanmanta kunankaman iskay chunka kinsayoq wataña Señor Diosqa rimapayashallawanpuni, ñoqataq qankunaman sapa kuti hina nillarqaykichispuni, qankunataq ichaqa manapuni uyarikurqankichischu.

⁴Hinaña yapapas-yapa Señor Diosqa kamachin profetakunata kachamurqasunkichis chaypas, qankunaqa manan kasurikurqankichischu, manataq uyariykuytapas munarqankichischu.

⁵Chay profetakunan nirqasunkichis: Wikch'upuychis millay mana chanin ruwayniykichista, chay hinapin hallp'aykichispiqa tiyakushallankichispuni. Chay hallp'atan Señor Diosqa qorqasunkichis qankunamanpas machulaykichismanpas.

⁶Amaña wak dioskunaq qhepanta rispa yupaychaychischu, amataq chaykunamanqa k'umuykuychischu. Amapuni Señor Diosta phiñachiychischu, qankunaq ruwasqaykichis idolokunata yupaychaspaykichisqa. Chaytachus kasukunkichis chayqa, manan Señor Diosqa muchuchisunkichischu, nispa.

⁷Señor Diosqa nishallanpunin kunanpas: Qankunaqa manapunin uyariwarqankichischu, ruwasqaykichis idolokunawanmi phiñachishawankichis, qankuna kikiykichismi chaytaqa ruwaspa muchuchinata mañakunkichis, nispa.

⁸Chayraykun Tukuy-atiyniyoq Señor Diosqa nillantaq: Manañataq rimapayasqaytapas kasuwankichischu chayqa,

⁹ñoqan waqyasaq llapan wichay lado suyukunatapas Babilonia rey kamachiy Nabukodonosortapas. Ñoqan chaykunata pusamusaq kay suyuman, kaypi tiyaqkunaman, suyu-masinkunamanwan phawaykunankupaq. Llapantan pasaqtapuni thunichisaq, llapa runaq llaksakunanpaq, llapaq qhawarparinanpaq, hatun p'enqaypi rikukunankupaqwan.

¹⁰Kaqllataqmi qankuna ukhupi kusikuytapas q'ochukuytapas upallachisaq, manañan kanqachu casarakuq wayna-sipaspas, manallataq uyarikunqachu maranpi kutaykunapas, wasiykichispi k'anchaytapas sipisaqmi.

¹¹Llapanpunin kay suyuqa thunisqa kanqa, raqay-raqaymi purunyapunqa. Qanchis chunka watantintaqmi kay suyukunaqa Babilonia reyta servinqaku.

¹²Qanchis chunka wata hunt'akamuqtintaqmi, Babilonia reyta suyuntawan hucha ruwasqankumanta muchuchisaq, suyunta raqay-raqayta purunyachispa.

¹³Nisqayman hina Babilonia suyuta muchuchisaq, hatun suyukunaq contranpi Jeremiaspa rimasqanman hina muchuchisaq, imaynan kay qelqapi qelqasqa kashan chayman hina.

¹⁴Hatun suyukunapas atiyniyoq reykunapas paykunawanmi servichikunqaku. Ahinapin Babilonia runakunaman ruwasqankumanta kutichipusaq, nispan, nispa.

¹⁵Israelpa Diosnin Señormi niwarqan: Hap'iy makiymanta kay phiñakuyniywan hunt'a vinoyoq qeruta, ukyachimuytaq llapan kachasqay suyukunaman.

¹⁶Chay qeruta ukyaykuspankutaq thampiykachanqaku waq'ayanqaku wañuyta paykunaman kachasqay hawa, nispa.

¹⁷Chaymi ñoqaqa chay qeruta Señor Diospa makinmanta chaskiykurqani, hinaspan qoykurqani ukyanankupaq Señor Diospa kachawasqan llapan suyukunaman:

¹⁸Jerusalén llaqtaman, Judá suyupi llaqtakunaman, reyninkunaman, umallinkunamanwan. Chay hinapin paykunaqa purunyachisqa karqanku, qhawarparisqa ñakasqataq, imaynan kunan kashanku hina.

¹⁹Egipto suyu rey Faraonmanpas, llank'aysiq-masinkunamanpas, umallinkumanpas, llapan runankunamanpas,

²⁰Egiptopi tiyaq wak suyu runakunamanpas, llapan Uz suyupi reykunamanpas, Filistea suyupi Askalón llaqta reymanpas, Gaza llaqta reymanpas, Ekrón llaqta reymanpas, Asdod llaqtapi puchuq runakunaq reyninmanpas,

²¹Edom suyumanpas, Moab suyumanpas, Amón runakunamanpas,

²²Tiro llaqta llapan reykunamanpas, Sidón llaqta llapan reykunamanpas, mama qochaq chimpanpi suyukunaq llapan reyninkunamanpas,

²³ch'inneqpi tiyaq Dedán ayllumanpas, Tema ayllumanpas, Buz ayllumanpas, llapan ch'ipu chukchan rutukuq llaqtakunamanpas,

²⁴Arabia suyuq llapan suyunkunamanpas ch'in pampapi tiyaqkunaq llapan reyninkunamanpas,

²⁵Zimri llaqta llapan reykunamanpas, Elam suyu llapan reykunamanpas, Media suyu llapan reykunamanpas,

²⁶Llapan wichay lado suyu reykunamanpas, qayllapiña karupiña kaqkunamanpas, llapan pachantinpi reykunamanpas. Chaykuna qhepatataq Babilonia suyu reypas chay qeruta ukyanqa.

²⁷Chaymantataq Señor Diosqa niwarqan: Kay hinatan ninki: Israelpa Diosnin Tukuy-atiyniyoq Señormi nisunkichis: Ukyaychis, machaychis, aqtupakuychis pampaman urmaspa mana hatarinaykichispaq wañuyta qankunaman kachamusqay hawa, nispa, nispayki.

²⁸Qanmanta chay qeruta mana chaskiyta munasunkikuchu chayqa, ninki: Tukuy-atiyniyoq Señor Diosmi nin: ¡Munaspa mana munaspa ukyankichispunin!

²⁹Ñoqaq llaqtaytapas kunallanmi muchuchisaq, ¿chaychu qankunaqa mana muchuchisqa qhepawaqchis? Manapunin hinallachu qhepankichis, teqsimuyuntin pachaman wañuyta kachamusqayrayku, nispan, nispayki.

³⁰Qantaq, Jeremías, paykuna contra kay hina kananta ninki: Señor Diosmi hanaq pachamanta qaparimun, ch'uya tiyanan cheqasmanta kunununumun. Llaqtan contran manchanata qaparimun, uvas saruq hinaraqmi qaparkachamun. Teqsimuyuntinpi tiyaqkunakamapas

³¹kay pachaq k'uchunkamapas waqyakuyqa chayan. Señor Diosmi suyukuna contra quejakun, llapa runatan juzganaman apan, millay runatataq wañuyman qaraykunqa, nispan nin Señor Diosqa.

³²Tukuy-atiyniyoq Señor Diosmi nin: ¡Qhawariy! Manchay llakikuymi haqayqa, hukmanta-hukmi suyukunaman chayashan, kay pachaq k'uchunmantan manchay kunununuy hamushan.

³³Chay p'unchaypi Señor Diospa wañurachisqanmi teqsimuyuntinpi wikch'u pampa kanqa. Manan pipas paykunamanta waqaq kanqachu, manataqmi ayankuta pipas p'ampanqachu, wanu hinan pampapi wikch'u-wikch'u kanqa.

³⁴¡Michiqkuna, qapariychis! ¡Nanaymanta waqaychis! ¡Pusaqkuna, pampantintaraq qhospaychis! Chayamunñan ñakasqa kanaykichis, qankunapas wira borrego hina nak'asqa kanaykichis.

³⁵Michiqkunapas manan pakakuyta atinqakuchu, pusaqkunapas manan ayqeyta atinqakuchu.

³⁶¡Uyariy, michiqkunaq waqasqanta! ¡Uyariy, pusaqkunaq yupakusqanta! Señor Diosmi paykunaq q'achunta tukurqapun,

³⁷llakhi kashaq chitankunan ch'usaqyachisqa kapun Señor Diospa k'arak phiñakuynin hawa.

³⁸Señor Diosqa lloqsimun t'oqonmanta lloqsimuq león hinan, suyunkutaq raqay-raqay purunyachisqa kapun Señor Diospa phiñakuyninpa rawrarisqanwan, manchakuy awqa-tinkuyta kachamusqanpiwan, nispa, nispayki.