Read Quechua Cuzco Bible 1988 JEREMÍAS 26 Bible Online

JEREMÍAS 26 - Quechua Cuzco Bible 1988 bible

JEREMÍAS 26

¹Judapi Josiaspa churin Joakim chayllaraq rey kashaqtinmi, Señor Diosqa Jeremiasta nirqan:

²Ñoqa yupaychana wasiq pationpin kashan Judá suyuq llapan llaqtankunamanta yupaychaq hamuqkuna, chaypi suyaykuy hinaspa qanman nisqay simikunata paykunaman willay, ama imallatapas pakaykuspa.

³Ichapaschá nisqaykita kasukuspa millay ruwayninkuta saqepunkuman, ñoqapas manañan yuyaykusqayman hinachu tukuy millay ruwasqankumanta ñak'arichisaq.

⁴Qanmi paykunaman ninki: Señor Diosmi nin: Qankunaqa uyarinawaykichispunin, kamachikuy simi churasqaytapas kasunaykichispunin,

⁵Sapa kuti hina kachamusqay kamachiy profetakunaq nisqantapas kasunaykichispunin, kunankaman paykunata mana uyarishankichischu.

⁶Manataqchus lliw chaykunata ruwankichis chayqa, Silo llaqtata hinan kay yupaychana wasita thunipusaq, hinan kay pacha suyukuna kay llaqtaq sutinta hukkuna ñakanapaq hoqarinqaku, nispa, nispayki.

⁷Yupaychana wasipi Jeremiaspa rimasqantan lliw sacerdotekunapas profetakunapas llaqta runakunapas uyarirqanku.

⁸Señor Diospa kamachimusqanta niyta tukuqtin hinataq, sacerdotekunapas profetakunapas lliw llaqta runakunapas payta hap'ispa nirqanku: ¡Kunanpachan wañunki!

⁹¿Imaraykun Señor Diospa sutinpiraqtaq rimanki: Kay yupaychana wasin Silo llaqta hina thunisqa kanqa, kay llaqtapas purunyachisqa mana runayoqmi kanqa, nispa? nispanku, Jeremiasman llapanku ch'ichikurqanku.

¹⁰Chaymantataq Judá suyuq umallinkuna chayta uyarispanku, reypa wasinmanta yupaychana wasiman rirqanku, chaypitaq tiyaykurqanku Mosoq Punku nisqapi.

¹¹Hinan sacerdotekunaqa profetakunapiwan paykunata llaqta runakunatawan nirqanku: ¡Kay runataqa wañuchiychis llaqta contra rimasqanmanta! Qankunapas kikiykichismi uyarinkichis riki, nispa.

¹²Chaymi Jeremiasqa llapan umallikunaman runakunamanwan nirqan: —Señor Diosmi kachamuwan sutinpi qankunaman llapan uyarisqaykichista ninaypaq llaqta contrata yupaychana wasi contratawan.

¹³Chay hinaqa puriyniykichista t'ikraychis, Apu Señor Diosniykichistapas kasukuychis, chay hinapi ichapas Señor Diosqa muchuchiy yuyaykusqanta manaña kachamusunkichischu.

¹⁴Ñoqaqa qankunaq makiykichispin kashani, mayqenchus chaninkaq allinkaq rikch'akusunkichis chayta ruwawaychis.

¹⁵Ichaqa kayta allinta yachaychis, ñoqatachus sipiwankichis chayqa, qankunan lliw llaqtallantin huchachasqa kankichis mana ima huchayoq runata wañuchisqaykichismanta. Ñoqataqa cheqaqtapunin Señor Diosqa kachamuwan kay simikunata qankunaman willanaypaq, nispa.

¹⁶Chaymi umallikunaqa llaqta runakunapiwan sacerdotekunata profetakunatawan nirqanku: —Manan ima huchanpas kanchu kay runata wañuchinanchispaq, payqa Apu Señor Diosninchispa sutinpipunin rimawasqanchis, nispa.

¹⁷Chaymantataq wakin kurak taytakuna sayarimuspa huñusqa kashaq runata nirqanku:

¹⁸Judapi Ezekías rey kashaqtinmi, Moreset llaqtayoq Mikiasqa Señor Diospa sutinpi llapa Judá llaqtaman rimasqa: Tukuy-atiyniyoq Señor Diosmi nin: Sionqa chakra llank'ana pampan kapunqa, Jerusalenpas raqay-raqaymi purunyapunqa, yupaychana wasiq orqonpipas sach'akunan wiñapunqa, nispa.

¹⁹¿Chay nisqanmanta rey Ezekiaspas Judá llaqta runakunapiwan wañuchisqakuchu? Aswansi reyqa Señor Diosta manchakuspa mañakusqa payta khuyapayaykunanpaq. Chayraykus Señor Diosqa muchuchiy yuyaykusqanta mana paykunaman kachaykusqachu. ¿Chaychu ñoqanchisri hatun qaqawan hina ñit'ichikusunman, mana huchayoq runata wañuchispa? nispa. (

²⁰Kiriat-jearim llaqtayoq Semaiaspa churin Uriaspas profetizallasqataq, Señor Diospa sutinpitaq suyu contra llaqta contratawan Jeremías hina rimasqa.

²¹Rey Joakimtaq umallinkunapiwan soldadonkunapiwan chay rimasqanta yacharqospanku, Uriasta sipirqachiyta munasqa. Uriastaqsi yacharqospa manchakuymanta Egiptoman ayqekapusqa.

²²Rey Joakimtaqsi Akborpa churin Elnatanta huk runakunatawan Egiptoman kachasqa,

²³hinas Egiptomanta Uriasta pusamusqaku, hinaspataqsi rey Joakimman hap'iykachisqaku, paytaqsi espadawan sipichisqa, ayantapas q'opa pataman p'ampachimusqa.)

²⁴Safanpa churin Ahikamñataq ichaqa Jeremiasman sayapakurqan, chay hinapin Jeremiastaqa llaqta runaman mana hap'ichirqankuchu, manallataq wañuchirqankupaschu.