Read Quechua Cuzco Bible 1988 JEREMÍAS 3 Bible Online

JEREMÍAS 3 - Quechua Cuzco Bible 1988 bible

JEREMÍAS 3

¹Señor Diosmi nin: Huk qhari warminwan t'aqanakapun, warminpas paymanta t'aqakapuspa huk qhariwan casarakapun chayqa, ñawpaq qosanqa manan wakmanta paywan tiyakapuyta atinchu. Chayqa llaqtata qhellichaymi kanman. Chaywanpas qan Israelqa askhawanmi qhellichakurqanki, kunanqa ñoqawanñataq tiyarqoyta munashanki.

²Allintapuni qhawariy q'ara orqokunata. ¿Maypiraqmi mana honraykita t'akakurqankichu? Ch'in pampapi tiyaq Arabia runa hina, ñan patakunallapiña parlaq-masiykikunata suyarqanki. Kay suyutapas millay puriyniykiwanmi qhellichaykurqanki.

³Chayraykun parapas mana pararqanñachu, poqochiq parapas mana chayarqanñachu, chaywanpas qanqa mana p'enqakuq coles uyan kanki.

⁴Kunallanmi nishawanki: Taytalláy, sipas kaspa reqsinakuq-masilláy,

⁵¿phiñasqallapunichu kanki? ¿Hinallapunichu phiñakuyniyki rawranqa? nispa, chaywanpas ima munasqaykitan mana allinkaqta ruwashallarqankipuni, nispa.

⁶Josías rey kashaqtinmi Señor Diosqa niwarqan: ¿Rikurqankichu mana kasukuq Israelpa wasanchawasqanta? Paymi hinantin orqo patakunapi llapa q'omer sach'aq llanthunkunapi qhellipi puriq warmi hina huchallikurqan.

⁷Ñoqataq yuyarqani: Chaykunata ruwasqanmantaqa kutimpullawanqachá, nispay, ichaqa manan kutimunñachu. Chaytan mana hunt'aq ñañan Judaqa rikurqan,

⁸rikullarqantaq mana kasukuq Israelta qatirparipusqayta. Israelmantaqa t'aqakapurqani wasanchawasqan hawan. Chaywanpas Israelpa mana hunt'aq ñañan Judaqa manan mancharikullarqanpaschu, aswanraqmi paypas qhellipi puriyman haykuykapurqan.

⁹Qhellipi puriynintaqa yuyarqan ruwanalla kasqanpaqmi, chaywanmi ichaqa suyuyta qhellicharqan qaqakunatapas mallkikunatapas yupaychaspan.

¹⁰Chaywanpas mana hunt'aq Judaqa manan tukuy sonqonwanchu kutirikamuwarqan, aswanmi q'otullawan kutirimuwarqan, nispan nin Señor Diosqa.

¹¹Señor Diosmi niwarqan: Mana kasukuq Israelqa pisi huchayoqraqmi mana hunt'aq Judamantaqa.

¹²Riy, hinaspa wichay ladota qhawarispa willamuy: Señor Diosmi nin: Yaw mana kasukuq Israel, ñoqaman kutirikamuway, ñoqaqa khuyapayakuqmi kani, manan qanwan phiñakusaqchu, manan tukuy p'unchaychu qanwan phiñalla kashasaq.

¹³Qanqa huchallaykita reqsikuy, ñoqa Apu Señor Diosniyki contra sayarisqaykita reqsikuy, llapan q'omer mallkiq llanthunpi wak dioskuna munakusqaykita mana kasuwasqaykitapas willakuway.

¹⁴Mana kasukuq runakuna, kutirimpuwaychis, qankunaqa ñoqaqmi kankichis, sapanka llaqtamantan huktakama hoqarikapusqaykichis, sapanka familiamantataq iskaytakama hoqarikapusqaykichis, hinaspan Sionman kutichipusqaykichis.

¹⁵Ñoqapaq hina kamachikuqkunatan qosqaykichis, paykunan sumaq yachaywan allin yuyaywan kamachisunkichis.

¹⁶Qankuna suyuykichispi miraspa askhayaqtiykichisqa manan pipas rimanqañachu Señor Diospa rimanakuynin cajamanta, manan pipas chaymanta yuyarinqañachu, manataqmi yuyanqapasñachu, manan pipas watukunqañachu, manallataqmi mosoq cajatapas ruwakunqakuñachu.

¹⁷Jerusalentan chay p'unchayqa sutichanqaku: Señor Diospa Kamachikuy Tiyanan, nispa. Llapan suyukunan chayman huñukunqaku yupaychawanankupaq, manañan mana kasukuq k'ullu sonqo hinaqa ruwanqakuchu.

¹⁸Chay p'unchay chayamuqtinmi Judaqa Israelwan huñuykakapunqa, wichay lado suyupi kamachi-kaymantataq kutimpunqaku machulankuman herenciapaq qosqay hallp'aman, nispa.

¹⁹Señor Diosmi nin: Israel llaqtalláy, ñoqan yuyaykurqani: Maytan munani qan Israelta wawachakuyta, sumaq munapayana hallp'ata qonaypaq, lliw pachantinmanta aswan sumaq hallp'ata qonaypaq, nispa. Ñoqaqa yuyarqani: Taytáy, niwanaykitan, manataq hayk'aqpas t'aqakuwanaykitan. Ichaqa, qosanta wasanchaq warmi hinan qankunaqa wasanchawarqankichis, nispan.

²¹Señor Diosmi nin: Q'ara orqokunapin waqasqa uyarikun, chayqa Israel runakunaq khuyapayanata munaspa waqasqanmi, huchankuwan waqllipusqankuraykun waqashanku, ñoqa Apu Señor Diosninkutapas qonqapuwasqankuraykun waqashanku.

²²Ñoqataq waqyakuni: Hampuwaychis ñoqaman, mana kasukuq wawaykuna, ñoqan mana kasukuq-kayniykichista hampisqaykichis, nispa. Qankunataq niwankichis: Arí, wakmantan kutimpusaqku, qanmi Apu Señor Diosniykuqa kanki.

²³Cheqaqtapunin yanqa kasqa orqo patakunapi yupaychayniykuqa, yanqapaqmi q'ara moqokunapi waqamusqayku, sapan Apu Señor Diosnillaykupuni Israelpa qespichiqnin kashaqtiyki.

²⁴Millay p'enqakuy Baal nisqa diosta yupaychaspaykun, pasaqta chinkachikapuyku may pachamantaraq machulaykuq tarisqan ovejakunatapas uywakunatapas churikunatapas ususikunatapas.

²⁵Chhaynaqa, p'enqakuymanta huch'uyyaykukusaqku honrayku t'akasqaykuwan pakaykukuspa. Ñoqaykuqa machulaykumantapachan qan Apu Señor Diosniyku contra huchallikurqayku, manan hayk'aqpas kamachikuyniykitaqa kasurqaykupunichu, nispa.