Read Quechua Cuzco Bible 1988 JEREMÍAS 31 Bible Online

JEREMÍAS 31 - Quechua Cuzco Bible 1988 bible

JEREMÍAS 31

¹Señor Diosmi nin: Chay p'unchaypin llapan Israel ayllukunaq Diosnin kasaq, paykunataq llaqtay kanqa, nispa.

²Señor Diosmi nin: Ch'in pampapin khuyapayaykurqani maqanakuypi mana wañuchisqa llaqtata. Israel ayllukuna samayta maskhashaqtinkun

³karullamanta paykunaman rikhurirqani: Ñoqaqa munakushallaykichispunin, chayraykun mana p'itiy munakuyniyta mast'ariykichis.

⁴Munasqay Israel llaqtalláy, wakmantan allintapuni sayarichisqayki. Wakmantan panderetata hoqarispa kusikuymanta tusukuspa purinki.

⁵Wakmantan Samaria orqokunapi uvas chakrata ruwanki, chakra llank'aqkunan tarpunqaku, rurutan mikhunqaku.

⁶Chayamunqañan huk p'unchay Efraín orqo-orqopi qhawaqkunaq waqyakunan: ¡Hamuychis! ¡Haku Sionta! ¡Haku Apu Señor Diosninchisman! ninanku, nispa.

⁷Señor Diosmi nin: ¡Jacobmanta kusisqa takiychis! ¡Llapan suyuq qollanan suyuta hatunchaspa qapariychis! ¡Qaparkachaychis! Yupaychaspa niychis: Llaqtantaqa Señor Diosmi qespichin, Israelmanta puchuqtaqa Señor Diosmi qespichin, nispa.

⁸¡Uyariychis! Kaqtan wichay suyumantaqa kutichimpusaq, pachaq lliw k'uchunmantan huñuykampusaq. Kutimullanqakutaqmi ñawsakunapas wist'ukunapas, wiksayoq warmikunapas wachakunan patapi kaq warmikunapas. ¡Askhallañan kutimpunqaku!

⁹Waqakuspan kutimpunqaku, pusamushaqtiytaqmi ñoqamanta mañakuwanqaku. Sumaq mayu patantan pusasaq, sumaq ñannintan mana urmanankupaq pusasaq, Israelpa taytan kasqayrayku, Efrainpas phiwi churiy kasqanrayku, nispa.

¹⁰Señor Diosmi nin: Suyukuna, ñoqata uyariwaychis, karu suyukunaman kayta willamuychis: Israel runakunatan Señor Diosqa ch'eqechirqan, ichaqa wakmanta huñuykuspan ovejata hina michinqa, nispa.

¹¹Arí, ñoqa Señor Diosmi Jacobta kacharichipuni, paymanta aswan atiyniyoq suyuq makinmanta.

¹²Sión orqo pataman wichaspan kusisqa takinqaku, ñoqaq wakichipusqaywanmi anchatapuni kusikunqaku, trigota vinota aceiteta qoqtiymi q'ochukunqaku, ovejakunata wakakunata qoqtiymi kusikunqaku. Sonqonkupas huerta hinaraqmi llanllanqa, manataq kallpankupas chiriyanqachu.

¹³Sipaskunan kusikuymanta tusunqaku, waynakunapas machukunapas tusunqaku. Waqayninkutan kusikuyman tukuchisaq, llakikuyninkumantan sonqochaspa kusichisaq.

¹⁴Sacerdotekunamanpas allinnin mikhunatan mikhuchisaq, wakichipusqaywanmi llaqtayqa saksaykunqa, nispa.

¹⁵Señor Diosmi nin: Ramá llaqtapin anchisqa uyarikun, sonqo nanay waqasqa uyarikun. Raquelmi wawankunamanta waqashan, llapan wawankunaq wañusqanmantan sonqonpas mana tiyanñachu.

¹⁶Amañayá waqaychu, Raquel, waqayniykita ama usuchikuychu, wawaykirayku ruwasqaykitaqa chaskinkin, paykunaqa awqaq suyunmanta kutimpunqan.

¹⁷Kanraqmi suyakuyniyki qhepa p'unchaypaq, churiykikunaqa suyuman kutimpullanqakun, nispa.

¹⁸Señor Diosmi nin: Uyarinin Efraín llaqtaq nisqanta: ¡Ikiraqmi! ¡Imaraqmi! nispa. Wanachinawaykipaqmi muchuchiwarqanki mana llank'ay yachaq torillota hina. Wakmanta sayarichiway hinan kutimpusqayki, qanpunin Apu Señor Diosniyqa kanki.

¹⁹Qanmanta t'aqarikusqay qhepatañan yuyayniyta hap'ikurqani. Huchay reqsikusqay qhepatañan takapakurqani. p'enqakuymantan yanaraq oqeraq tukurqani wayna kaspa huchaypa ñit'iykusqan kasqaymanta, nispa.

²⁰Efraín llaqtaqa munasqay wawaypunin, Efraín llaqtaqa khuyasqay churiypunin. Anyaspayñapas manapunin paytaqa qonqanichu, sonqoyraqmi ch'allaq niwan, cheqaqtapunin paytaqa khuyapayasaq, nispa.

²¹Señor Diosmi nin: Munasqay Israel llaqtalláy, risqayki ñanta ch'ikuy, purisqayki ñanta tuyruy, chay ñanmanta yuyaypuni. Munasqay Israel llaqtalláy, kutimpuy, llaqtaykikunaman kutimpuy.

²²¿Hayk'aqkaman iskayrayanki hatun sonqo sipas hina? Ñoqa Señor Diosmi mosoqta kay pachapi ruwarqani, warmiq qharita waqaychashasqanta, nispa.

²³Israelpa Diosnin Tukuy-atiyniyoq Señormi nin: Apasqa kasqankumanta paykunata kutichimpuqtiymi, Judá suyupipas llaqtankupipas wakmanta ninqaku: Señor Diosmi saminchasunki, Jerusalenpa ch'uya orqon, chanin Diospa tiyanan orqo, nispa.

²⁴Runakunan tiyakapunqa Judá suyupi llaqtankunapiwan, paykunan kanqaku chakra llank'aqkuna uywa michiqkunapiwan.

²⁵Sayk'usqa kaqkunamanmi mosoq kallpata qosaq, laqhollaña kaqkunatan t'ikarichisaq, nispa.

²⁶Chayllamanmi rikch'arirqani misk'i puñusqaymanta.

²⁷Señor Diosmi nin: Chayamunqan huk p'unchay Judamanwan Israelmanwan runakunatapas uywatapas hunt'achinay.

²⁸Imaynan ñoqa kikiy yuyaywan paykunata t'irarqani, kumparqani, wikch'urqani, thunirqani, k'irirqani, ahinallatataqmi yuyaywan sayarichisaqpas wiñachisaqpas.

²⁹Chay p'unchaypin manaña wakmanta ninqakuchu: Taytanmi p'osqo uvasta mikhun, churinpa kiruntaqmi “chhuk” nin, nispa.

³⁰Aswanpas pichus p'osqo uvasta mikhuqpan kirunqa “chhuk” ninqa, sapankataqmi kikinpa huchanmanta wañunqa, nispa.

³¹Señor Diosmi nin: Kanqan huk p'unchay Judawan Israelwan mosoqmanta rimanakuy.

³²Kay rimanakuyqa manan machulankuwan rimanakusqay hinachu kanqa. Makinkumanta hap'iykuspan, paykunata Egiptomanta horqomurqani, paykunaq qosan hina kashaqtiypas rimanakusqaytaqa p'akirqankun.

³³Chay p'unchay chayamuqtinmi Israelwan rimanakuyniy kay hina kanqa: Sonqonkumanmi kamachikuyniyta churasaq, yuyayninkumantaq qelqasaq. Ñoqan Diosninku kasaq, paykunataq llaqtay kanqa.

³⁴Manañan hukmanta hukchu ñoqa reqsiwayta yachachinakunqa reqsinakuq-masintinpas aylluntinpas, aswanmi huch'uymanta hatunkama lliwlla reqsiwanqaku. Ñoqan pampachasaq mana allin ruwasqankuta, manañataqmi yuyarisaqñachu huchankutapas, nispan nin Señor Diosqa.

³⁵Señor Diosmi p'unchay k'anchananpaq intita churan, tuta k'anchananpaqtaq killata ch'askakunatawan churan. Qochatapas kuyurichin phoqchiqespa qaparinanpaq, Tukuy-atiyniyoq Señor Diostaqmi sutinqa.

³⁶Paymi nin: Chay churasqaykunachus ñawpaqeymanta chinkanman chayqa ichapaschá ñawpaqeypi Israel miraypa suyu-kaynin chinkapunman.

³⁷Ima p'unchaychus hanaq pachata tupunkuman, kay pachatapas teqsinmantapacha qhawarankuman, chay p'unchayllapunin Israel miraytaqa mana munapusaqchu tukuy ruwasqankumanta, nispan nin Señor Diosqa.

³⁸Señor Diosmi nillantaq: Kanqan huk p'unchay llaqtay sayarichisqa kanan Hananeel Torremanta K'uchu Punku nisqakama.

³⁹Qorpantaq rinqa cheqanta chaymanta Garebpa patankama, chaymantataq muyunqa Goa cheqasman.

⁴⁰Aya wikch'unanku uspha hich'ananku wayq'opas Kidrón mayupi pata-pata chakrakunapas inti lloqsimuy ladopi Caballo Punku nisqakaman ñoqapaq t'aqasqa kanqa. Lliw chaykunataq mana hayk'aqpas thunisqachu kumpasqapaschu kanqa, nispa.