Read Quechua Cuzco Bible 1988 JEREMÍAS 33 Bible Online

JEREMÍAS 33 - Quechua Cuzco Bible 1988 bible

JEREMÍAS 33

¹Guardiaq patiollanpiraq wisq'asqa Jeremías kashaqtinmi, Señor Diosqa wakmanta nimurqan:

²Ñoqan kani kay pacha ruwaqqa, maychus kasqanpi allin takyachiqqa, ñoqan Señor Diosqa kani.

³Waqyakamuway uyarisqaykin, mana reqsisqayki hatun musphanakunatan rikuchisqayki.

⁴Llaqta perqa ukhupi tiyaqkunan wasikunata Judá reykunaq qhapaq wasinkunata thunirqanku espadawan maqanakuq Babilonia soldadokunata tupapakunankupaq, tawqasqa seqananta haykuq contra sayarinankupaqwan. Chaymantan ñoqa Israelpa Diosnin Señorqa nini: Manchana k'arak phiñakuyniywanmi chay maqanakuq runakunata wañuchisaq, chay thunisqa kaq wasikunapas ayankuwanmi hunt'aykusqa kanqa, ñoqan mana qhawarisaqchu kay llaqtata millay mana chanin huchakuna ruwasqankumanta.

⁶Chaywanpas kay llaqtata hampispan qhaliyachisaq, paykunataqa hampisaqpunin, hinaspan paykunaman rikuchisaq yanqa nisqa sumaq kawsayta, mana imata manchakuspallan tiyanqaku.

⁷Judata Israeltawanmi wakmanta t'ikarichisaq, hinaspan sayarichisaq imaynan ñawpa karqan hinata.

⁸Ñoqa contra huchallikusqanmantapas ch'uyanchasaqmi, lliw mana allin ruwasqanmantapas, ñoqa contra sayarisqanmantapas pampachasaqmi.

⁹Llapan suyukunan uyarinqaku Jerusalenta allin ruwasqayta, chay hinapin kay llaqta ñoqapaq kanqa kusikuy, mentasqa kay, yupaychasqa hatunchasqa kaypiwan. Kay llaqtaman thak-kaytawan allinyaytawan qosqayta rikuspan, huk suyukuna manchakuspa khatatatanqaku, nispa.

¹⁰Señor Diosmi nin: Qankunan ninkichis: Kay cheqasqa ch'usaqmi mana runayoq mana uywayoq, nispa. Chay hinapunin Jerusalenpa callenkunapas, Judá suyu llaqtakunapas purun-purun, manataq tiyaq kanchu runapas uywapas, ichaqa wakmantan chay cheqaskunapi uyarikunqa kusikuypas q'ochukuypas, casarakuq wayna-sipaspa takinpas, uyarikullanqataqmi ñoqa yupaychana wasiman rispa gracias qoy ofrenda apaqmantapas: Tukuy-atiyniyoq Señor Diosman graciasta qoychis, Señor Diosqa allinmi, munakuyninqa wiñaypaqmi, nispa nisqanta. Arí, kay suyutan wakmanta t'ikarichisaq ñawpaq hina kananpaq, nispan nin Señor Diosqa.

¹²Tukuy-atiyniyoq Señor Diosmi nillantaq: Kay ch'usaq kashaq mana runayoq mana uywayoq suyupin llapan llaqtankunapiwan wakmanta kanqa pastokuna michiqkunaq ovejanta mikhuchinanpaq.

¹³Orqo-orqopi kaq llaqtakunapi, Shefela nisqa moqo-moqopi kaq llaqtakunapi, Neguev ch'inneqpi kaq llaqtakunapi, Benjamín hallp'api, Jerusalenpa muyuriqninpi, Judá suyu llaqtakunapipas wakmantan rikukunqa makinwan ovejanta yupashaqta, nispan nin Señor Diosqa.

¹⁴Payqa nillantaqmi: Kanqan huk p'unchay Israel llaqtaman Judá llaqtamanwan prometesqayta hunt'anay.

¹⁵Chay tiempopin Davidpa yawarninmanta huk mirayta sayarichisaq, paymi muyuntinpi allinta ruwanqa chaninchanqataq.

¹⁶Chay p'unchaypin Judaqa qespichisqa kanqa, Jerusalenpas allillanpuni kawsanqa, kay sutiwantaqmi churanqaku: Señor Diosmi ñoqanchismanta chaninchaspa sayaqqa, nispa.

¹⁷Ñoqa Señor Diosmi nini: Manan hayk'aqpas tukukunqachu Davidpa mirayninmanta Israel kamachikuy tiyanapi tiyaqqa.

¹⁸Manallataq chinkanqachu Leví miray sacerdotekunapas ruphachina ofrendakunata, ruru ofrendakunata, wak ofrendakunatapas ñoqaman haywamunawanpaq, nispa.

¹⁹Señor Diosmi Jeremiasta nillarqantaq:

²⁰Ñoqan nini: Tutawanpas p'unchaywanpas rimanakurqanin iman kaq horasllapipuni chayamunanpaq, chay rimanakusqayqa manan imaynamantapas p'akikuyta atinchu.

²¹Chay hinallatataqmi kamachiy Davidwanpas rimanakurqani mirayninpuni paypa kamachikuy tiyananpi tiyananpaq, kaqllataqmi Leví ayllu sacerdotekunawanpas rimanakurqani paykunallapuni serviwananpaq. Chay rimanakusqaykunapas manallataqmi p'akiyqa atikunchu.

²²David kamachiypa miraynintaqa kamachiy ruwaq Levipa miraynintawanmi mana yupay atiyta mirachisaq, hanaq pachapi ch'askakunata hinaraq, qocha patapi aqota hinaraq, nispan, nispa.

²³Señor Diosmi Jeremiasta nillarqantaq:

²⁴¿Manachu uyarinki chay runaq rimasqanta? Paykunan nishanku: ¡Akllakusqan Judawan Israelwanqa iskaynin llaqtan Señor Diospa qhawarparisqanña! nispa. Chay runakunan llaqtayta pasaqta pisichaspa mana suyupaqñachu qhawarinku.

²⁵Chaymi ñoqa Señor Diosqa nini: Ñoqan tutawanpas p'unchaywanpas rimanakurqani, kay pachamanpas hanaq pachamanpas churarqani mana p'akinankupaq kamachikuyniyta. Imaynan chaykunapas allin-allin churasqaña,

²⁶chay hinallataqmi Jacobpa mirayninwan kamachiy Davidwanpas rimanakusqayqa hunt'akunqapuni. Davidpa mirayninmantapunin akllasaq Abrahampa Isaacpa Jacobpa mirayninta kamachinanpaq. Paykunata khuyapayaspaymi wakmanta kay suyuman kutichimpusaq, nispan, nispa.