Read Quechua Cuzco Bible 1988 JEREMÍAS 34 Bible Online

JEREMÍAS 34 - Quechua Cuzco Bible 1988 bible

JEREMÍAS 34

¹Babilonia suyu rey Nabukodonosor llapan paypa munayninpi kashaq suyukunamanta soldadokunantin Jerusalenta qayllan llaqtakunatawan contra phawaykushaqtinmi Señor Diosqa Jeremiasta nirqan:

²Ñoqa Israelpa Diosnin Señormi niyki Judá rey Sedekiasman rispa nimunaykipaq: Señor Diosmi nin: Ñoqan Babilonia reyman kay llaqtata hap'iykachisaq, paytaq ninawan kanaykunqa.

³Qantaqmi mana ayqekuspalla makinman urmaykunki, hap'irqospankun payman qoykusunkiku. Uyapura paywan tupaspan ima ruwasqaykitapas willakapunki, Babiloniamantaq ripunki, nispa.

⁴Chaytukuywanpas, rey Sedekías, Señor Diospa simintaqa uyarillay, paymi qanmanta nin: Manan espadawan sipisqachu wañunki,

⁵aswanpas allin wañuypin wañunki. Sumaq q'apaqkunawanmi q'apachisunkiku, imaynan qanmanta ñawpaq kamachikuq machulaykikunamanpas sumaqta q'apachirqanku, ahinatan wañuqtiykipas q'apachisunkiku. Waqanqakutaq: ¡Ikiraqmi, wiraqocháy! nispanku. Ñoqa kikiymi prometeyki, nispan nin Señor Diosqa, nispayki.

⁶Hinan Jeremiasqa rey Sedekiasman Jerusalenpi lliwta willarqan.

⁷Chaykamataq Babilonia reypa soldadonkunaqa Jerusalenta Judapi qhepaq llaqtakunata Lakis llaqtata Azeka llaqtatawan muyuykusharqanku, chay iskaynin llaqtallañan allin perqakunayoq llaqtakunamanta qheparqan.

⁸Rey Sedekiasmi Jerusalenpi tiyaq lliw runakunawan rimanakurqan kamachinkupi kaq runakunata kacharipunankupaq.

⁹Kay rimanakuyqa ruwasqa karqan warmiña qhariña kamachinku kaqtinpas llaqta-masinkutaqa kacharipunankupaq, manataq pipas llaqta-masinta kamachinpaq hap'inanpaq.

¹⁰Chay hinaqa llapan rimanakuq umallikunan runakunapiwan yuyaykurqanku qhariña warmiña kamachinku kaqtapas kacharipuspa manaña huktawan kamachikuyta. Paykunaqa kasukuspan kacharipurqanku.

¹¹Chaymantataq ichaqa huk hinata yuyaykuspa wakmanta kamachi kacharisqankuta kamachi-kayman churaykurqanku.

¹²Chaymi Señor Diosqa Jeremiasta nirqan:

¹³Ñoqa Israelpa Diosnin Señormi nini: Egipto suyumanta machulaykichista horqomushaspaymi paykunawan rimanakuspa kamachirqani:

¹⁴Sapa qanchis watamantan kacharipunki pay kikinmanta qanman vendekuq mayqen Hebreo runaña kaqtinpas. Paymi qanpaq llank'apusunki soqta watantin, qanchiskaq watapitaqmi pasaqpaq kacharipunki, nispa. Machulaykichistaqmi ichaqa mana kasurqankuchu manataq uyarikurqankuchu.

¹⁵Manaraqmi unayraqchu qankunaq huk hinata yuyaykuspa munasqayman hina ruwasqaykichisqa, qankunan kacharipurqankichis llaqta-masiykichis kamachiykichista, ñoqa yupaychana wasipiraqtaq qayllaypi rimanakurqankichis.

¹⁶Chaymantataq qankunaqa huk hinata yuyaykurqospa sutiyta alqocharqankichis wakmanta kamachiykichiswan servichikuspa, paykunaqa kacharisqañan karqanku may munasqankuta ripunankupaq, qankunataq wakmanta hap'ispa kamachikapushankichis.

¹⁷Chaymi ñoqa Señor Diosqa nini: Qankunaqa manan kasuwankichischu llaqta-masiykichis kamachita mana kacharispaykichis, chayraykun kunan ñoqaqa kachamusaq hatun maqanakuyta, onqoyta, yarqaytawan. Ñoqan qankunata wak suyukunaq qhawarispa llaksakunankupaq ruwasqaykichis.

¹⁸Judá suyuq Jerusalén llaqtaq umallinkuna, reypa oficialninkuna, sacerdotekuna, llapan runakunapiwan ñawpaqeypi rimanakurqanku. Huk torota nak'aspataq kuskamanta iskayman phasmirqanku, chaypa chawpintataq pasarqanku, ichaqa chay rimanakusqankuta p'akispan mana hunt'arqankuchu. Chaymi imaynan torota ruwarqanku chay hinallatataq paykunatapas ruwasaq.

²⁰Paykunataqa wañuchiy munaq awqankumanmi qaraykusaq, ayankutaq kanqa salqa animalkunaq ankakunaqpas mikhunanpaq.

²¹Kaqllataq Judá rey Sedekiasta umallinkunatapas wañuchiy munaq awqanku Babilonia soldadokunaman hap'iykachisaq, kunan ratoña kaymanta paykuna wak ladoman rishanku chaypas.

²²Ñoqan kamachimusaq wakmanta kutimuspa kay llaqtaman phawaykunankupaq. Hinan llaqtata ninawan hap'iykachinqaku. Ñoqan Judapi llaqtakunata mana ch'ulla wasiyoqta purunyachisaq, nispan nin Señor Diosqa.