Read Quechua Cuzco Bible 1988 JEREMÍAS 35 Bible Online

JEREMÍAS 35 - Quechua Cuzco Bible 1988 bible

JEREMÍAS 35

¹Josiaspa churin Joakim Judapi rey kashaqtinmi Señor Diosqa ñoqa Jeremiasta niwarqan:

²Phaway Rekab ayllu runaman, paykunawan rimaspataq ñoqa yupaychana wasiman pusay. Chaypitaq huknin wasipi vinota haywariy ukyanankupaq, nispa.

³Hinan ñoqaqa Habasiniaspa churin Jeremiaspa churin Jaazaniasta wawqenkunata churinkunata llapan ayllunkunatawan tarimuspa,

⁴paykunata pusarqani Dios yupaychana wasipi Igdaliaspa churin Dios sonqo runa Hananpa churinkunaq wasinman. Chay wasin karqan umallikunaq wasinwan kuska, Salumpa churin punku qhawaq Maasiaspa wasin patapi.

⁵Chaypitaq Rekabpa ayllunkunaq ñawpaqenman churaykurqani jarrapi hunt'a vinota qerukunatawan, hinaspan nirqani: Ukyaykuychis kay vinollatapas, nispa.

⁶Paykunataq nirqanku: Ñoqaykuqa manan vinotaqa ukyaykuchu, Jonadabpa taytan Rekab machulaykun kamachikurqan: Aman hayk'aqpas vinota ukyankichischu qankunapas mirayniykichispas.

⁷Aman wasita ruwakunkichischu, aman uvas chakratapas ruwakunkichischu, amallataq muhutapas t'akankichischu. Qankunaqa karpakunallapin tiyankichis. Ahinapin asta-astarikuspa purispaykichis kay suyupi unayta kawsankichis, nispa.

⁸Chaytan ñoqaykuqa machulaykuq lliw kamachiwasqankuta kasukuyku, manapunin vinotaqa ukyaykuchu ñoqaykupas, warmiykupas, wawaykupas.

⁹Manan wasitapas ruwakuykuchu, manallataq uvas chakraykupas t'akasqa chakraykupas kanchu.

¹⁰Ñoqaykuqa karpakunallapin tiyayku machulaykuq kamachikusqanman hina kasukuspayku.

¹¹Ichaqa Babilonia rey Nabukodonosor kay suyuta hap'ikapuqtinmi, Babilonia soldadokunamanta Siria soldadokunamantawan ayqekuspa, yuyaykurqayku kay Jerusalenman hamuyta. Chaymi kay Jerusalenpi tiyakushayku, nispa.

¹²Hinan Señor Diosqa Jeremiasta nirqan:

¹³Ñoqa Israelpa Diosnin Señormi kamachiyki Judá runakunata Jerusalenpi kaqkunatawan nimunaykipaq: ¿Manachu qankunaqa yachachisqata yachaqawaqchis? ¿Kamachisqatapas manachu kasukuwaqchis?

¹⁴Rekabpa churin Jonadabpa mirayninpas machulankuq kamachisqanta kasukuspa manan vinota ukyankuchu kunan p'unchaykama. Ñoqataq ichaqa sapa kutilla mana samaspa rimapayaykichis, manataq kasuwarqankichischu.

¹⁵Ñoqataq kachapayamushaykichis sapa kuti hina kamachiy profetakunata qankunata rimapayananpaq: Saqeychis millay puriyniykichista millay ruwayniykichistapas. Amaña wak dioskunata yupaychaspa puriychischu, ahinapin machulaykichisman qankunamanwan qosqay hallp'api unayta kawsankichis, nispa. Qankunataq ichaqa mana kasuwaspa mana uyariwarqankichischu.

¹⁶Rekabpa churin Jonadabpa mirayninkunapas kasukurqankun machulankuq kamachisqanta, kay llaqtataq ichaqa mana kasuwanchu.

¹⁷Chayraykun ñoqa Israelpa Diosnin Tukuy-atiyniyoq Señorqa nini: ¡Uyariychis! Judá suyumanmi Jerusalenpi tiyaqkunamanwanmi chayachisaq nisqay hatun llakikunata, rimapayashaqtiy mana uyariwasqankumanta, waqyashaqtiy mana kasuwasqankumantawan, nispa.

¹⁸Chaymantataq Jeremiasqa Rekab aylluta nirqan: Israelpa Diosnin Tukuy-atiyniyoq Señormi nisunkichis: Machulaykichis Jonadabpa kamachinta kasurqankichis, mana p'akispa llapan nisqankunatapas kasukuspa.

¹⁹Chayraykun Jonadabpa mirayninmantaqa kallanqapuni ñoqa serviq runa, nispan, nispa.