Read Quechua Cuzco Bible 1988 JEREMÍAS 36 Bible Online

JEREMÍAS 36 - Quechua Cuzco Bible 1988 bible

JEREMÍAS 36

¹Israel suyu rey Josiaspa churin Joakimqa Judá suyupi kinsa wata kurakña kamachikushaqtinmi, Señor Diosqa Jeremiasta nirqan:

²Josiaspa rey kasqan tiempopi chayllaraq rimapayarqayki, kunankamataqmi rimapayashallayki, chay hinaqa huk qelqana k'uyuta hap'iy, hinaspa Israel suyumanta, Judá suyumanta wakin suyukunamantawan qanman nisqayta chaypi llapallanta qelqay.

³Ichapaschá Judá runakuna lliw imaymana hatun llakikuna chayachinayta yachaspa, millay mana allin ruwayninkuta wikch'unkuman, ñoqataq millay mana chanin huchankuta pampachayman, nispa.

⁴Hinan Jeremiasqa Neriaspa churin Barukta waqyarispa Señor Diospa lliw nisqanta payman qelqananpaq willarqan, Baruktaq huk qelqana k'uyupi qelqarqan.

⁵Chaymantataq Jeremiasqa Barukman nirqan: Qhawariy hark'asqa kasqayta, chaymi Señor Dios yupaychana wasiman haykunayta hark'awan.

⁶Chayrayku ayunananku p'unchay Señor Dios yupaychana wasiman riy, hinaspa Señor Diospa siminta qelqachisqay qelqata leempunki llapan chaypi runakunaman Judá llaqtakunamanta hamuq runakunamanwan.

⁷Ichapaschá Señor Diosmanta mañakunkuman, hinaspataq millay ruwayninkuta saqepunkuman, Señor Diospa k'arak phiñakuyninwan kay llaqtata: Suyaykuchun nisqanqa mancharikuymi kashan, nispa.

⁸Hinan profeta Jeremiaspa lliw kamachisqanta Barukqa ruwarqan, Dios yupaychana wasita rispataq Señor Diospa simin qelqa k'uyuta leemurqan.

⁹Josiaspa churin Joakimqa Judá suyupi tawa wata isqon killaña kamachikushaqtinmi, Jerusalenpi llapan runakunata Judá llaqtakunamanta hamuq runakunatawan Señor Diospa qayllanpi ayunanankupaq kamachirqanku.

¹⁰Baruktaq yupaychana wasiman haykurqan reypa qelqaqnin Safiaspa churin Gemariaspa wasinman, chay wasin karqan yupaychana wasi aswan ukhu patiopi Mosoq Punku nisqa qayllapi. Chaymantapachan payqa llapan runaman leemurqan Jeremiaspa rimasqan qelqa k'uyuta.

¹¹Señor Diospa simin qelqa k'uyupi Barukpa leesqantataq Safanpa churin Gemariaspa churin Mikaiasqa lliwta uyarirqan,

¹²paymi rirqorqan reypa wasinpi kaq qelqaqpa wasinta. Chaypin llapan umallikuna huñuykusqa kasharqanku: reypa qelqaqnin Elisama, Semariaspa churin Delaía, Akborpa churin Elnatán, Safanpa churin Gemarías, Hananiaspa churin Sedekías, wakin umallikunapiwan.

¹³Hinan Mikaiasqa llapan runaman qelqa k'uyumanta Barukpa leesqan uyarisqanta willarqan.

¹⁴Chaymi umallikunaqa Netaniaspa churin Jehudita kacharqan Barukta nimunanpaq: Runaman leesqayki qelqa k'uyuta aparikuspa hamuy, nispa. Jehudiqa karqan Kusiq churin Selemiaspa nietonmi. Baruktaq qelqa k'uyuta aparikuspa qayllankuman rirqan,

¹⁵paykunataq nirqanku: —Tiyaykuy, hinaspa qelqa k'uyuta leepuwayku, nispa. Chaymi Barukqa leeykapurqan,

¹⁶uyarispanku hinataq sinchi mancharisqa qhawapunakuspa ninakurqanku: —Kaytaqa llapantan reyman willananchis, nispa.

¹⁷Chaymantataq Barukta nirqanku: —Willawayku: ¿Imaynatan kayta qelqarqanki? ¿Jeremiaschu qelqachirqasunki? nispa.

¹⁸Baruktaq willarqan: —Arí, Jeremiaspunin llapanta qelqachiwarqan, chaytataqmi ñoqaqa tintawan qelqa k'uyupi qelqarqani, nispa.

¹⁹Chaymi paykunaqa Barukta nirqanku: —Chay hinaqa Jeremiaspiwan phawaspa pakakamuychis mana piqpa rikunanman, nispa.

²⁰Chay umallikunataq qelqa k'uyuta reypa qelqaqnin Elisamaq wasinpi waqaychaspa, reypa wasinta rirqanku lliw chaykunata reyman willaq.

²¹Reytaq Jehudita qelqa k'uyuman kutirichimurqan, hinan qelqaqnin Elisamaq wasinmanta qelqa k'uyuta apaspa reyman chaypi kashaq umallikunamanwan leerqan.

²²Chiri killa kaqtintaq reyqa q'oñikunan wasipi nina rawraypa qayllanpi tiyasharqan.

²³Jehudiqa kinsa tawa cheqastaña leeshaqtintaq, reyqa huk cuchillowan kuchurqarirqan, hinaspataq nina rawrayman wikch'uykurqan ruphananpaq. Chay hinatan ruwarqan qelqa k'uyuta tukunankama.

²⁴Chay leesqata uyarispataq mana mancharikullarqanpaschu manallataq p'achankutapas llakikuymanta llik'ikurqankuchu reypas umallinkunapas.

²⁵Hinaña Elnatanwan Delaiawan Gemariaspiwan ama qelqa k'uyuta kanananpaq reyta hark'akurqanku chaypas, reyqa manan uyariqpas tukurqanchu,

²⁶aswanmi kamachirqan paypa churin Jerameelta Azrielpa churin Seraiastawan Abdeelpa churin Selemiastawan profeta Jeremiasta qelqaqnin Baruktawan hap'imunankupaq. Señor Diostaq ichaqa paykunata pakaykurqan.

²⁷Jeremiaspa Barukwan qelqachisqan qelqa k'uyutan reyqa kanachirqan, chay qhepatan Señor Diosqa Jeremiasta nirqan:

²⁸Mosoq k'uyuman qelqay Judá rey Joakimpa kanasqan qelqa k'uyupi kaq simikunata.

²⁹Hinallataq reyta ninki: Señor Diosmi nisunki: Qanmi qelqa k'uyuta kanarqanki, Jeremiastapas k'amirqanki: ¿Imanaqtinmi qelqarqanki: Cheqaqtapunin Babilonia reyqa hamunqa kay suyuta thuniq, runantinta uywantinta ch'usaqyachiq, nispayki? nispa.

³⁰Chaymi Señor Diosqa nillasunkitaq: Qan Joakimpa mirayniykiqa manan Davidpa kamachikuy tiyananpi tiyanqachu. Qanpa ayaykiqa wikch'usqan kanqa p'unchay ruphaypi tutataq qasapi.

³¹Qantapas mirayniykitapas umalliykikunatapas huchaykichiskunamanta ñak'arichisqaykichis. Qanpas aylluykikunapas Jerusalenpi tiyaq runakunapas Judá runakunapas manan uyariwarqankichischu, chayraykun lliw hatun llakikunata llapaykichisman kachaykamusaq, nispa, nispayki.

³²Hinan Jeremiasqa mosoq k'uyuta hap'ispa Barukman qorqan. Chaypitaq wakmanta qelqachirqan Joakimpa kanachisqan k'uyupi kaq simikunata, hinallataq payqa yapachirqan chayman rikch'akuq askha simikunatawanraq.