Read Quechua Cuzco Bible 1988 JEREMÍAS 37 Bible Online

JEREMÍAS 37 - Quechua Cuzco Bible 1988 bible

JEREMÍAS 37

¹Babilonia rey Nabukodonosormi Judapi rey kananpaq churarqan Josiaspa churin Sedekiasta, Joakimpa churin Jekoniaspa rantinpi.

²Señor Diospa Jeremiaswan willachisqantaqa manan kasurqankuchu Sedekiaspas oficialninkunapas llaqta runakunapas.

³Chaywanpas rey Sedekiasqa kacharqan Selemiaspa churin Jukalta Maasiaspa churin sacerdote Sofoniastawan profeta Jeremías valekuqta: Apu Señor Diosninchismanta ñoqaykupaq mañapuwayku, nimunankupaq.

⁴Jeremiasqa manan wisq'asqaraqchu karqan, payqa llaqta ukhupi maytapas riyta atirqanraqmi.

⁵Babilonia soldadokuna Jerusalenta phawaykunanpaq muyupayashaqtinmi, rey Faraonpa soldadonkunaqa Egipto suyumanta lloqsimurqanku Sedekiasta yanapaq, chayta uyarispan Babilonia runakunaqa chaymanta kutipurqanku.

⁶Hinan Israelpa Diosnin Señorqa Jeremiaswan nichirqan Judá rey Sedekiaspa kachamusqankunaman: Judá reyta niychis: Egiptomanta rey Faraonpa soldadonkuna yanapaqniykichis lloqsimuqkunaqa kaqtan Egiptoman kutipunqaku.

⁸Babilonia soldadokunaqa wakmantan kutimunqaku Jerusalén llaqtaman phawaykunankupaq, hap'ispataq ninawan kanaykunqaku.

⁹Ñoqa Señor Diosmi willashaykichis: Ama yanqa kikiykichista q'otukuspa yuyaychischu: Babilonia soldadokunaqa cheqaqtapunin ripunqa, nispaykichis, chayqa manan hinachu kanqa.

¹⁰Hinaña qankuna Babilonia soldadokunata llapanta maqanakuypi atipawaqchis chaypas, karpankupi iskay kinsa k'irisqakuna qhepankuman, chaykunan sayarimuspa llaqtaykichista ninawan kanaykunkuman, nispa, nispaykichis.

¹¹Babilonia soldadokunataq Jerusalén muyuykusqankumanta kutipurqanku, Faraonpa soldadonkuna hamushasqanta yacharqospanku.

¹²Hinan Jeremiasqa Benjamín hallp'ata risharqan, chaypi tupaqnin hallp'a chaskikapuq.

¹³Benjamín Punku nisqaman chayaqtintaq, hap'irqapurqan Hananiaspa churin Selemiaspa churin Irías. Paymi karqan chaypi kaq guardiakunaq umallin, nirqantaq: —Babilonia runakunamanmi qanqa rishanki, nispa.

¹⁴Jeremiastaq nirqan: —Yanqan chaytaqa niwanki, manan Babilonia runakunamanchu rishani, nispa. Iriastaq ichaqa mana uyariq tukuspa umallikunaq qayllanman apamurqan.

¹⁵Paykunataq Jeremiasta phiñarikuspa p'anachirqanku, hinaspan reypa qelqaqnin Jonatanpa wasinman wisq'achirqanku. Chay wasin watay wasiman tukuchisqa karqan.

¹⁶Ahinapin Jeremiasqa watay wasiq pachan t'oqoman haykuykurqan unay p'unchaykunapaq.

¹⁷Rey Sedekiastaq kamachirqan tiyasqanman Jeremiasta pusamunankupaq, payta pusamuqtinkutaq reyqa pakallapi tapuykurqan: —¿Icha kashanchu Señor Diospa ima willakuynillanpas? nispa. Jeremiastaq nirqan: —Arí, kashanmi. Qanmi Babilonia reyman hap'ichisqa kanki, nispa.

¹⁸Rey Sedekiastataq tapuykukurqan: —¿Ima mana allintan contraykitapas umalliykikunaq contrantapas llaqta runaq contrantapas ruwarqani watay wasiman churawanaykichispaq?

¹⁹¿Maytaqyá chay: Manan Babilonia reyqa hamunqachu qanmanpas suyumanpas, nispa profetizaqkuna?

²⁰Kunanqa reyníy, ama hinachu kay, mañakusqayta uyariykuway: Amaña wakmanta apachiwayñachu qelqaqniyki Jonatanpa wasinmanqa, ama chaypi wañunaypaq, nispa.

²¹Chaymi rey Sedekiasqa kamachikurqan Jeremiasqa guardiakunaq patiollanpiña waqaychasqa kananpaq. Hinaspan sapa p'unchay t'antata qochirqan callemanta rantichimuspa, ahinatan rantichimurqan llaqtapi t'anta kanankama. Ahinapitaqmi Jeremiasqa patiollapi waqaychasqa qhepakapurqan.