Read Quechua Cuzco Bible 1988 JEREMÍAS 38 Bible Online

JEREMÍAS 38 - Quechua Cuzco Bible 1988 bible

JEREMÍAS 38

¹Matanpa churin Sefatías, Pasurpa churin Gedalías, Selemiaspa churin Jukal, Malkiaspa churin Pasurpiwanmi llapa runaman Jeremiaspa rimasqanta uyarirqanku. Jeremiasmi kay hinata nirqan:

²Señor Diosmi nin: Pillapas llaqta ukhupi qhepakuqqa wañunqan maqanakuypi, yarqaypi, onqoypiwan. Pillapas paymantakama lloqsispa Babilonia runakunaman chimpapuqmi ichaqa mana wañunqachu, imaynallapas payllataqa qespichikunqan, nispa.

³Señor Diosmi nillantaq: Kay llaqtaqa cheqaqtapunin Babilonia reypa soldadonkunaq makinman urmaykapunqa, paykunataq hap'ikapunqa, nispan, nispa.

⁴Hinan umallikunaqa reyta nirqanku: —Kay runataqa sipisunchis. Chay hina rimasqankunawanmi kay llaqtapi qhepaq soldadokunatapas wakin runakunatawanpas pisi kallpayachin. Kay runaqa manan llaqtaq allinnintaqa maskhanchu, aswanmi mana allinnillantapuni munan, nispa.

⁵Rey Sedekiastaq nirqan: —Ruwaychis ima munasqaykichista, ñoqaqa manan qankunataqa imanaykichismanpaschu, nispa.

⁶Hinan paykunaqa Jeremiasta hap'ispa reypa ayllun Malkiaspa guardiakunaq pationpi kaq p'uytuman churarqanku, waskhawanmi kachaykurqanku. P'uytupiqa manan unu karqanchu, aswanmi t'urulla, chay t'urumanmi Jeremiasqa chinkaykurqan.

⁷Huk Etiopía runan karqan Ebed-melek sutiyoq, payqa karqan reypa wasinpi oficialmi. Paymi Jeremiasta unu p'uytuman wikch'uykusqankuta uyarirqorqan. Chaypachataqmi reyqa Benjamín Punku nisqapi huk huñunakuypi kasharqan.

⁸Chaymi Ebed-melekqa reypa wasinmanta lloqsirqospa reyman willaq phawarqan,

⁹nirqantaq: —Reyníy, chay runakunan sinchi mana allintapuni profeta Jeremiasta ruwaykunku, unu p'uytumanmi wikch'uykusqaku, chaypitaqmi yarqaymanta wañupushanña, manataqmi llaqtantinpi t'antapas kapunñachu, nispa.

¹⁰Hinan reyqa kaq ratopacha Ebed-melekta kamachirqan: —Kaymanta kinsa chunka runata pusarikuy, hinaspa Jeremiasta p'uytumanta horqochimuy manaraq wañurqoshaqtin, nispa.

¹¹Ebed-melektaq runakunata pusarikuspa rirqan reypa wasinpi kaq p'acha waqaychana wasita, chaymantan aparikurqanku llik'i-llik'i thantakunata, chaytataq waskhapi kachaykurqanku Jeremiaspa kasqanman,

¹²nirqantaq: —Chay thantakunawan wallwak'uykikunaman churarqarikuy mana waskhaq nanachinasuykipaq, nispa. Jeremiastaq nisqanta hina ruwakurqan.

¹³Hinan runakunaqa patanmanta waskhawan chutarqanku chaymanta horqonankukama. Chay qhepatataq Jeremiasqa guardiakunaq pationpi qhepakurqan.

¹⁴Chaymantataq rey Sedekiasqa profeta Jeremiasta waqyachimuspa Señor Dios yupaychana wasiq kinsakaq punkunman pusachimurqan. Chaypitaq reyqa nirqan: —Huktan tapukuyta munashayki, ichaqa sut'inta willaykuwanki, nispa.

¹⁵Jeremiastaq nirqan: —Kutichiykimanña chaypas sipichiwankimanmi. Imataña yuyaychaykiman chaypas manan kasuwaqchu, nispa.

¹⁶Rey Sedekiastaq ichaqa Jeremiasman pakallapi jurarqan: —Kawsay qowaqninchis Señor Diosmi yachan, manan sipichisqaykichu, manataqmi wañuchiy munaqniykiq makinmanpas hap'iykachisqaykichu, nispa.

¹⁷Chaymi Jeremiasqa Sedekiasta nirqan: —Israelpa Diosnin Tukuy-atiyniyoq Señormi nin: Babilonia reypa oficialninkunaman chimpakapunki chayqa manan wañunkichu. Kay llaqtapas manan ninawan kanasqachu kanqa. Qanpas aylluykikunapas kawsankichisraqmi.

¹⁸Mana paykunaman chimpapunkichischu chayqa, Babilonia soldadokunan llaqtata hap'ikapunqaku, kanaykunqakuraqtaq, qanpas manataqmi ayqenkichu, nispan, nispa.

¹⁹Sedekiastaq nirqan: —Babilonia soldadokunaman chimpakapuq llaqta-masinchiskunatan manchakushani, paykunaman Babilonia soldadokuna hap'ichiwaqtinqa, imataraqchá mana ruwawanqakuchu, nispa.

²⁰Jeremiastaq nirqan: —Manan paykunaq makinmanqa chayankichu. Ñoqaq nisqayta kasukuspa Señor Diospa munayninta ruway, ahinapin allillan kasunki manataq wañunkichu.

²¹Señor Diosqa ñan rikuchiwanña imachus kananta, manataqchus qan chimpakapunki chayqa.

²²Kaytaqmi rikuchiwasqan: Llapan Judá reypa wasinpi qhepaq warmikunatan Babilonia reypa oficialninkuna horqoshasqaku. Chay warmikunataqmi qanta nishasqasunki: ¡Chay hinayá chay amigoykikuna! ¡Sumaqllata q'oturqosunki paykunaq yuyayninta kasuchikuspa! Chakiykipas t'urumanmi chinkaykapun, amigoykikunataq qheparparipusunkiku, nispanku, nispa.

²³Jeremiasqa nillarqantaq: —Llapan warmiykikunan wawaykikunapiwan Babilonia soldadokunaman qosqa kanqa, qanpas manan maymanpas ayqeyta atinkichu, aswanmi Babilonia reyqa hap'ichisunkipuni, llaqtatapas ninawanraqtaq kanaykunqa, nispa.

²⁴Chaymi Sedekiasqa Jeremiasta nirqan: —Mana wañuyta munaspaqa, rimasqanchista ama pimanpas rimarinkichu.

²⁵Umalliykunaña rimasqanchista yacharqospa tapuq hamusunkiman: Willawayku imatan rey nirqasunki, qanpas ima nispan reyta nirqanki chayta, mana willawankikuchu chayqa wañunkin, nispa chayqa,

²⁶ninkin: Ñoqan valekusharqani amaña wakmantaqa Jonatanpa wasinman apachiwananpaq, ama chaypi wañunaypaq, nispayki, nispa.

²⁷Chay nisqanman hinapunitaq umallikunaqa Jeremiasman hamuspa tapurqanku, paytaq kutichirqan reypa yachachisqanta hinapuni. Chaymi mana imanipurqankupaschu, rimasqankuta mana pillapas uyarisqan hawa.

²⁸Jeremiasqa guardiakunaq pationpin qhepakapurqan Babilonia soldadokunaq Jerusalenta hap'inanku p'unchaykama.