Read Quechua Cuzco Bible 1988 JEREMÍAS 39 Bible Online

JEREMÍAS 39 - Quechua Cuzco Bible 1988 bible

JEREMÍAS 39

¹Judá rey Sedekiaspa pusaq wata isqon killa kurakña kamachikushaqtinmi, Babilonia rey Nabukodonosorqa llapan soldadokunantin Jerusalenman hamurqan, hinaspataq llaqtata muyuykurqanku.

²Sedekías chunka wata tawa killaña kamachikushaqtinmi, killaq isqon p'unchayninpi llaqta muyuriq perqata q'asarqanku.

³Jerusalén hap'isqa kaqtintaq Babilonia reypa llapan umallinkuna haykuspa Chawpi Punku nisqapi kamachikuq tiyaykurqanku. Chaykunan karqan Nergal-sarezer, Samgar-nebo, qollana Sarsekim, apu qollana hukkaq Nergal-sarezer, wakin umallikunapiwan.

⁴Chaykunata rikuspataq, rey Sedekiasqa soldadonkunantin llaqtamanta ayqekapurqan. Reypa huerta kanchan cheqasnintan tutapacha rispa iskaynin perqa tupay punkunta lloqsirqorqanku, hinaspataq Jordán wayq'oman puririykapurqanku.

⁵Paykunaq qhepanta phawarispataq, Babilonia soldadokunaqa Jericó pampaman tariparqorqan Sedekiasman. Hap'irqospataq Hamat suyupi Ribla llaqtapi kaq rey Nabukodonosorman aparqanku. Chaypin rey Nabukodonosorqa kamachikurqan paypaq imachus kananta.

⁶Hinaspan Sedekías qhawakushaqtin ñawpaqenpi churinkunata Judamanta llapan umallikunatapas nak'arqarichirqan.

⁷Sedekiaspatañataq ñawinkunata horqochirqan, hinaspan bronce cadenawan watasqata Babiloniaman apachirqan.

⁸Babilonia soldadokunataq runakunaq wasintapas reypa wasintapas llaqtatapas ninawan kanaykurqanku, hinaspan Jerusalén perqata thunirqanku.

⁹Qhepatañataq reypa guardiankunaq umallin Nabuzaradanqa Babiloniaman kamachi-kaypaq apapurqan llaqtapi llapan qhepaq runakunata Babilonia runakunaman chimpakapuqkunatawan.

¹⁰Judá suyupitaqmi wakin mana imayoq wakchakunata saqespa, paykunaman qorqan uvas chakrakunata, chakra llank'ana hallp'akunatawan.

¹¹Babilonia rey Nabukodonosortaq guardiakunaq umallin Nabuzaradanta Jeremiasmanta kamachirqan:

¹²Jeremiasta maskhamuspa uywanki, amataq ima mana allintapas ruwankichu, aswanmi tukuy ima munasqanta ruwanki, nispa.

¹³Hinan Nabuzaradanqa, qollana Nabusazbanwan, apu qollana Nergal-sarezerwan wakin Babilonia reypa umallinkunapiwan

¹⁴kamachirqanku guardiakunaq patiomanta Jeremiasta horqomunankupaq. Hinaspataq Safanpa churin Ahikampa churin Gedaliasman qorqanku kikin Jeremiaspa wasinman pusanankupaq. Ahinapin Jeremiasqa llaqtan runawan tiyaspa qhepakapurqan.

¹⁵Jeremiasqa guardiakunaq patiollanpiraq wisq'asqa kashaqtinmi Señor Diosqa payta rimapayasqa:

¹⁶Phaway, Etiopía runa Ebed-melekta nimuy: Israelpa Diosnin Tukuy-atiyniyoq Señormi nin: Kay llaqtamanta rimasqaytaqa hunt'asaqpunin, allinnintaqa manan munanichu aswanpas thunisaqpunin. Rikushaqtiykin chaykunaqa hunt'akunqa.

¹⁷Chay p'unchaymi ichaqa ñoqa waqaychasqayki, ahinapin manchakusqayki runaman mana hap'ichisqachu kanki.

¹⁸Ñoqan qespichisqayki, chaymi paykuna mana wañuchisunkikuchu, kawsallankipunin ñoqaman hap'ipakuwasqaykirayku, ñoqa Señor Diosmi nishayki, nispan, nispa.