Read Quechua Cuzco Bible 1988 JEREMÍAS 4 Bible Online

JEREMÍAS 4 - Quechua Cuzco Bible 1988 bible

JEREMÍAS 4

¹Señor Diosmi nin: Yaw Israel, kutimpuyta munanki chayqa ñoqamanmi kutirikampuwanayki. Millay idoloykikunatachus wikch'unki chayqa, ñoqamantapas manataq t'aqakuwankichu chayqa,

²sutiytapas hoqarinkitaq chayqa, cheqaqta allinta chanintataq purinkipas chayqa, suyukunan mañakamuwanqa: Saminchawayku, nispa, hinaspan yupaychawanqaku, nispa.

³Señor Diosmi Judá runakunatapas Jerusalén runakunatapas nillantaq: Mana tarpusqa purunkunata chakmaychis, amaña khiska-khiskapi tarpuychischu.

⁴Judá runakuna, Jerusalén runakuna, ñoqawan rimanakusqaykichista hunt'aychis, kasukuq sonqoyoq kaychis. Paqtataq huchaykichiskuna hawa phiñakuyniy nina hinaraq rawrarinman, mana piqpapas thasnuy atinankamaraq rawrarinman, nispa.

⁵Señor Diosmi nin: Judapi kayta willamuy, Jerusalenpitaq kayta uyarichimuy: ¡Putututa suyuntinpi waqachimuy! nispa. Kunkayoqta qaparimuy: ¡Huñukusunchis! ¡Allin perqayoq llaqtakunaman haykusunchis!

⁶Banderaykichista Sionman t'iksusqata hoqariychis. ¡Maskhakuychis pakakunata! ¡Amaña sayaykuychischu! Wichaymantan hatun llakita apamushani, sinchi ch'usaqyachiqtan chayachimushani, nispa.

⁷T'oqonmanta leonqa ñan lloqsimunña, suyukunata thuniqqa purimushanñan, hallp'anmantaqa lloqsimunñan suyuykita thuninanpaq, llaqtaykikunata raqay-raqayta ruwaspa purunyachinanpaq.

⁸Chayrayku luto p'achawan p'achakuychis, waqaychis, llakikuymanta suyuychis, Señor Diospa k'arak phiñakuyninmi Judapaq rawrashallan.

⁹Chay p'unchay chayamuqtinmi reykunapas umallikunapas chiriyanqaku, sacerdotekunapas khatatatanqaku, profetakunapas pasaqta llaksakunqaku, nispa.

¹⁰Ñoqataq nirqani: ¡Ay, Qollana Señor Diosníy! ¿Imapaqtaq kay llaqtata Jerusalentawan q'oturqanki? Allillanmi kankichis, nirqankitáq ñataq espadaqa patankupiña kashasqa, nispa.

¹¹Chaypachan kay llaqtata Jerusalentawan ninqaku: Aqo pampamantapachan ruphakuq wayra wayramushan, munasqay llaqta cheqasmanmi wayramushan, manan trigota wayrachispa ch'uyanapaq hina wayrachu,

¹²wayrachinapaqqa sinchi kallpayoq wayran kayqa, kay wayraqa ñoqaq kachamusqay wayran. Kunanqa paykunatan hatun taripaywan muchuchishani, nispa.

¹³Señor Diosmi nin: ¡Qhawariychis! Awqaqa phuyu hinaraqmi qayllaykarqamushan, carretankupas tutuka wayra hinaraqmi hamushan, caballonkupas ankamanta aswan phawaqraqmi. Llaqta runataq nin: ¡Ikiraqmi ñoqanchismanta, kunankamallachá karqanchis! nispa.

¹⁴Jerusalén llaqta, mana allinmanta sonqoykita ch'uyanchakuy, chay hinapiqa qespikunkin. ¿Hayk'aqkamataq umaykiqa yuyanqa millay mana chaninkunallatapuni?

¹⁵Kaytañan Dan llaqtamanta willakuq hamushan, Efraín orqo-orqomantan llaki willakuyta apamushan.

¹⁶Willariychis suyukunaman awqaq hamushasqanta, willariychis Jerusalenmanpas. Karu llaqtamantan hamushan muyuykuspa thuninanpaq, Judapi llaqtakuna contran qaparkachamushanku.

¹⁷Judatan chakra qenchasqa hina muyuykushanku, ñoqa contra sayarisqanmantan muyuykushanku.

¹⁸Qanpa purisqayki ruwasqaykikunapiwanmi chay hinakuna kanasuykipaqqa. Millay ruwasqaykikunan haya ruruta qosunki, sonqoykitapas k'irisunki, nispan nin Señor Diosqa.

¹⁹Jeremiasmi nirqan: ¡Ay! ¿Imanarqosaqmi kay nanayta? ¡Sonqoymi llakikuymanta phatarqoshawanña! ¡Ay, sonqolláy! ¡Manan takyarqoshaniñachu! Pututuq waqasqantan uyarishani, hatun maqanakuy ch'aqwaytan uyarishani.

²⁰Llaqta-llaqtapin hatun llakillaña kaykushan, llapa suyuntinmi raqay-raqay tukuykapushan, hukpaqkama thunisqañan karpaykunapas, astaykachakunay toldoykunapas imaynañachá.

²¹¿Hayk'aqkamapunitaq orqokunapi banderata rikusaq? ¿Hayk'aqkamapunitaq pututuq waqasqantapas uyarisaq? nispa.

²²Señor Diostaq nirqan: Llaqtayqa uma muyusqan, manan reqsiwanchu, mana yuyayniyoq runakunan kanku, mana yuyaykukuqmi kanku. Mana allin ruwaypaqqa kusallañan kanku, allin ruwaytataqmi mana yachankuchu, nispa.

²³Qhawarirqanin kay pachata, rawisqa ch'usaqñan kashasqa, qhawarirqanin hanaq pachata, manataq k'anchayqa kapusqañachu.

²⁴Qhawarirqanin orqokunata, chhaphchiykukushasqakun, llapan moqokunapas tuytuykushasqakun.

²⁵Qhawarirqanin, manañataq huk runallapas kasqachu, phalaq animalkunapas lliwmi phalarikapusqaku.

²⁶Qhawarirqanin imaymana mikhuypa wiñanan purunyapusqata, qhawarirqanin llapan llaqtakuna raqay-raqay kashaqta. Señor Diosmi k'arakta phiñakuspa chaykunata ruwarqan.

²⁷Señor Diosmi nin: Llapan hallp'an chaqosqa kanqa, ichaqa manan llapantachu thunisaq.

²⁸Kay kikin hallp'an llakikuymanta waqanqa, hanaq pachapas llakikuymanta tutayanqa. Ñoqan nirqani: Yuyaykusqaytaqa hunt'asaqmi, rimarisqaytaqa manan p'akiymanchu, nispa.

²⁹Caballopi phawaq soldadokunaq qaparisqanta uyarispan wach'iqkunaq qaparisqanta uyarispan, llapan runakunaqa phawarqapunku. Sach'a-sach'apin pakarqokunku, wakintaq sallakunaman k'askarqokunku. Llapa llaqtakunan wikch'usqa kashan, manataq pillapas tiyaqqa kanñachu.

³⁰Qan thunisqa llaqtari, ¿imapaqñataq llawlli-puka p'achawan churakunki? ¿Imapaqñataq qorimanta alhajakunawan warkukunki? ¿Imapaqñataq ñawiykitapas yanawan llusikunki? Manan imapaqpas valenchu k'achanchakusqaykiqa, munaqniykikunaqa wikch'upusunkikuñan, paykunaqa wañunaykitan munashanku.

³¹Uyarishanin phiwi wawanpi wachakuy nanaywan qapariq warmita hina waqashaqta, chayqa Sionpa qaparisqanmi. Makinkunata mast'arparispanmi waqashan: ¡Ikiraqmi ñoqamanta! ¡Runa sipiqkunan wañuchiwanqa! nispa.