Read Quechua Cuzco Bible 1988 JEREMÍAS 41 Bible Online

JEREMÍAS 41 - Quechua Cuzco Bible 1988 bible

JEREMÍAS 41

¹Chay wataq qanchis killanpitaq rey ayllu Elisamaq churin Netaniaspa churin Ismaelqa chunka runantin Mizpa llaqtaman rirqan Gedaliaswan tupaq. Ismaelqa reypa umallinsi kasqa. Hinan Mizpa llaqtapi kuska mikhushaspanku,

²Ismaelqa chunka runantin qonqaylla sayarirqospa espadawan wañurqachirqanku Babilonia reypa Judapi kamachikuqpaq saqesqan Gedaliasta.

³Wañuchillarqankutaq Mizpa llaqtapi Gedaliaswan kashaq llapan Judío runakunata Babilonia soldadokunatapas.

⁴Gedaliasta wañuchisqan qhepantin p'unchaytaq, manaraq pillapas yacharqoshaqtin,

⁵Shehem llaqtamanta, Silo llaqtamanta, Samaria llaqtamantawan chayarqamusqaku pusaq chunka runakuna, sunkhanku ruturqarisqa, p'achankupas llik'i-llik'i, paykuna kikinkuq mat'arqarikusqanwan cuerponkupas yawarkama. Kaqllataq apamusqaku ruru ofrendakunata inciensotawan Señor Dios yupaychana wasipi ruphachinankupaq.

⁶Ismaeltaq Mizpa llaqtamanta chay runakunaman ayparqan ñannintinpi waqakuspa. Paykunaman taripaspataq nirqan: —Hamuychis, Ahikampa churin Gedaliaswan tupaykamusun, nispa.

⁷Llaqtaq chawpinman chayarqospa hinataq, Ismaelqa runakunantin chay runakunata sipirayta qallarirqanku, hinaspan huk unu p'uytuman ayankuta wikch'uykurqanku.

⁸Chay t'aqa runakunamantataq ichaqa huk chunka runakuna Ismaelta valekurqanku: —¡Ama wañurqachiwaykuchu! Ñoqaykuqqa campopi pakasqan kashan trigopas cebadapas aceitepas misk'ipas, nispa. Chaymi Ismaelqa mana wakinkunata hinachu paykunataqa sipirqan.

⁹Ismaelpa sipirasqan runakunaq ayankunata wikch'uykusqan unu p'uytuqa hatunmi karqan. Chay p'uytuqa kasqa rey Asaq Israel rey Baasata hark'apakunanpaq ruwachisqansi, Ismaeltaq ichaqa ayakunawan hunt'arqachisqa.

¹⁰Chaymantataq Ismaelqa guardiakunaq umallin Nabuzaradanpa Gedaliaspa kamachinpi churasqan reypa ususinkunata Mizpa llaqtapi wakin qhepaq runakunatawan presota hap'irqan, hinaspataq qhochurikurqan Amón suyuman apananpaq.

¹¹Kareaq churin Johanantaq paywan kashaq soldadokunaq umallinkunapiwan Ismaelpa millay mana allinkuna ruwasqanta yacharqospa,

¹²huñunakurqanku lliw runakunantin paywan maqanakunankupaq, tariparqankutaq Gabaonpi hatun qochana pataman.

¹³Hinan Ismaelpa preso apasqan runakunaqa Johananta soldadoq umallinkunatawan rikurqospa, mayta kusikurqanku,

¹⁴hinaspataq llapanku kutirikampurqanku Johananman.

¹⁵Ismaeltaq ichaqa pusaq runantin Johananmanta ayqerikuspa Amón suyuman ripurqanku.

¹⁶Johanantaq soldadoq umallinkunapiwan Gabaón llaqtamantapacha kutichimpurqanku Gedaliasta wañurqachispa Ismaelpa Mizpa llaqtamanta apasqan soldadokunata, warmikunata, erqekunata, oficialkunatawan.

¹⁷Paykunaqa Babilonia runakunatan manchakurqanku Babilonia reypa kamachinanpaq churasqan Gedaliasta Ismaelpa wañuchisqanmanta. Chayraykun yuyaykurqanku Babilonia suyu runakunamanta Egipto suyuman ayqekuyta. Ahinapin purirqanku Belén qaylla Gerutkimanpi qaynaq.