Read Quechua Cuzco Bible 1988 JEREMÍAS 42 Bible Online

JEREMÍAS 42 - Quechua Cuzco Bible 1988 bible

JEREMÍAS 42

¹Chaymantataq Kareaq churin Johanán, Osaiaspa churin Azarías, soldadokunaq umallinkuna, llapan runapas hatunpas huch'uypas Jeremiasman qayllaykuspa

²nirqanku: —Ama hinachu kay, valekuqmi hamushaykiku, ñoqaykupaqyá Señor Diosniykimanta mañaykapuwayku kay pisilla qhepaq runakunapaq. Ñawpaqqa askhan karqayku, kunantaq rikushawankiku hina kay pisilla qhepakuyku.

³Apu Señor Diosniykimanta mañapuwayku paypuni maynin purinata yachachiwanankupaq imatachus ruwanaykutapas willawanankupaq, nispa.

⁴Niqtintaq Jeremiasqa nirqan: —Allinmi. Apu Señor Diosniykichismanta mañapusqaykichismi valekuwasqaykichisman hina, lliw imachus niwasqantapas mana pakaykuspa willasqaykichis, nispa.

⁵Hinan paykunaqa Jeremiasta nirqanku: —Manataqchus ñoqayku kasusaqku Apu Señor Diosniykiq qanwan nichiwasqankuta chayqa, kikin Señor Diospuni ñoqayku contra cheqaq chaninta sayarispa rimariq kachun.

⁶Munasaqkupas amapas Apu Señor Diosninchispa nisqantaqa kasukullasaqkupunin, pimantachus mañapuwanaykikupaq kachasqaykiku chay Diostaqa. Chay hinapiqa allillanmi kasaqku, nispa.

⁷Chunka p'unchaymantañataq Señor Diosqa Jeremiasman rimaykurqan,

⁸hinan payqa waqyarqan Kareaq churin Johananta, puriqmasin soldadokunaq umallinkunata, hatuntapas huch'uytapas lliw runakunatapas.

⁹Nirqantaq: —Pimantachus qankunapaq mañapunayta munarqankichis chay Israelpa Diosnin Señormi nin:

¹⁰Kay suyupichus qhepakunkichis chayqa, ñoqan allinta wiñarichisqaykichis, manañan thunisqaykichisñachu, saphichisqaymantaqa manan t'irasqaykichisñachu, chay hatun llaki kachamusqaymantaqa llakikunipunin.

¹¹Manchakusqaykichis Babilonia reytaqa ama manchakuychisñachu. Amapuniña manchakuychisñachu. Ñoqan qankunawan kashani, ñoqataqmi qespichisqaykichis, paypa makinmanta qechuspa.

¹²Ñoqaqa khuyapayasqaykichismi, paywanpas khuyapayachillasqaykichistaqmi, hinan llaqtaykichisman kutichimpusunkichis, ñoqa Señor Diosmi nini, nispa.

¹³Apu Señor Diosniykichista mana kasukuspachus: Kay suyupiqa manan qhepaykumanchu,

¹⁴aswanpas Egipto suyuman rispa tiyakampusaqku, chaypiqa manan rikusaqkuchu maqanakuytapas, manataq uyarisaqkuchu maqanakunapaq huñuq pututu waqaqtapas, manallataq yarqaymantapas wañusaqkuchu, ninkichis chayqa,

¹⁵qankuna Judapi qhepaqkuna uyariychis Israelpa Diosnin Tukuy-atiyniyoq Señorpa nisqanta: Qankunachus Egiptopi tiyaq ripuymanta wañushankichisña chayqa,

¹⁶manchakusqaykichis maqanakuypas yarqaypas chay kikinpin taripasunkichis, chaypitaqmi wañunkichispas.

¹⁷Cheqaqtapuni Egiptopi tiyaq ripuymanta wañuqkunaqa maqanakuypi, yarqaypi, onqoypi tukukapunqaku. Manan hukllapas kawsanqachu, manapunin ayqenqachu ñoqaq kachamusqay hatun llakimantaqa, nispa.

¹⁸Israelpa Diosnin Tukuy-atiyniyoq Señormi nillantaq: Imaynan phiñakuyniykuna rawrarirqanraq Jerusalenpi tiyaqkunapaq hinallataqmi qankunapaqpas rawrarinqa Egiptomanpuni ripunkichis chayqa. Qankunan kankichis millay ñakasqa, k'amisqa, llaksakuypaq, manañataqmi kay suyutaqa rikunkichisñachu, nispa.

¹⁹Yaw Judá suyupi qhepaqkuna, Señor Diosmi kamachisunkichis: Ama Egipto suyuman riychischu, nispa. Allinta yachaychis, kunanmi ñoqa willashaykichis

²⁰qankunaq sinchi pantasqaykichista. Qankunan Apu Señor Diosniykichismanta mañakuqta kachawaspa niwarqankichis: Apu Señor Diosninchismanta mañaykapuwayku. Willaykuwaykutaq lliw ima nisqantapas chayman hina ruwanaykupaq, nispa.

²¹Kunantaqmi ñoqa willaykichis Apu Señor Diosninchispa “ninki” niwasqanta, qankunataq ichaqa mana kasukuyta munankichischu.

²²Chayrayku allinta yachakuychis, maqanakuypi, yarqaypi, onqoypiwanmi wañumunkichis maychus tiyaq ripuy munasqaykichis suyupi, nispa.