Read Quechua Cuzco Bible 1988 JEREMÍAS 43 Bible Online

JEREMÍAS 43 - Quechua Cuzco Bible 1988 bible

JEREMÍAS 43

¹Jeremiasqa Apu Señor Diosninkuq nichisqanta lliwta paykunaman willayta tukuqtinmi,

²Osaiaspa churin Azariasqa Kareaq churin Johananpiwan wakin k'ankaykachaq runakunapiwan Jeremiasta nirqanku: —¡Llullakuspan chaytaqa niwankiku! Apu Señor Diosniykuqa manan ñoqaykutaqa nichisunkichu: Aman Egiptoman rinkichischu, nispaqa.

³Neriaspa churin Barukmi chaytaqa tanqasunki Babilonia runakunaq makinman hap'ichisqa kanaykupaq, chay hinapi wañuchisqapas suyunkuman apachisqapas kanaykupaq, nispa.

⁴Ahinapin Johananpas soldadokunaq umallinkunapas llapa runakunapas Señor Diospa kamachikusqanta mana kasukurqankuchu, Judapi mana tiyayta munaspanku.

⁵Aswanraqmi Johananwan soldadokunaq umallinkunapiwan Egiptoman pusarqanku Judá suyupi llapan qhepaq runakunata: hinantinman ch'eqechisqamanta tiyakapunanpaq kutimuqkunata,

⁶guardiakunaq umallin Nabuzaradanpa Gedaliaspa kamachinanpaq saqesqan qharikunata, warmikunata, erqekunata, reypa ususinkunatawan aparqanku, hinallataq Jeremiastapas Baruktapas aparqanku.

⁷Hinaspan Señor Diospa kamachikusqanta mana kasukuspanku, llapallanku chay runakuna Egiptoman ripurqanku, Tafnes llaqtamantaq chayarqanku.

⁸Chay Tafnespitaq Señor Diosqa Jeremiasta nirqan:

⁹Judá runakuna qhawashaqtinmi hatuchaq rumikunata hoqarispa rey Faraonpa wasinman haykunaq ñawpaqenpi ruwasqa p'alta patata hasp'ispa p'ampanki.

¹⁰Paykunatan ninki: Israelpa Diosnin Tukuy-atiyniyoq Señormi nin: Babilonia rey kamachiy Nabukodonosortan pusachimusaq, hinan kay p'ampasqay rumi patapi kamachikunan tiyananta karpantawan churasaq.

¹¹Pay hamuspanmi Egipto suyuman phawaykunqa. Wañunanpaq churasqa kaqkunaqa wañullanqapunin, wak llaqtaman apanapaq kaqkunapas apasqallapunin kanqa, maqanakuypi wañunanpaq kaqkunapas maqanakuyllapipunin wañunqa.

¹²Ninawanmi kanaykunqa Egipto suyuq diosninkuna yupaychana wasikunata, paymi chay dioskunata presota apanqapas ruphachinqapas, Egipto suyutan usantaraq pallanqa oveja michiqpas p'achanmanta oveja usata pallakun hinata, hinaspataqmi ripunqa mana piqpa imanisqan.

¹³Egiptopi kaq inti yupaychana wasipi saywakunatan thuninqa, hinallataqmi Egipto suyuq diosninku yupaychana wasikunatapas ninawan kanaykunqa, nispan, nispa.