Read Quechua Cuzco Bible 1988 JEREMÍAS 44 Bible Online

JEREMÍAS 44 - Quechua Cuzco Bible 1988 bible

JEREMÍAS 44

¹Israelpa Diosnin Tukuy-atiyniyoq Señormi Egipto suyupi tiyaq llapan Judío runakunamanta Jeremiasman willarqan. Paykunan tiyarqan Migdol llaqtapi, Tafnes llaqtapi, Menfis llaqtapiwan, kaqllataq uray lado Patros suyupipas. Paymi nirqan: Qankunaqa rikurqankichismi Jerusalenman Judapi kaq llapan llaqtankunamanwan hatun llakita chayachisqayta. Kunantaq chaykunaqa mana piqpa tiyasqan raqay-raqay kashan,

³mana chanin ruwasqankumanta. Paykunan phiñachiwarqanku paykunaqpas qankunaqpas machulaykichispapas wak dioskunaman sacrificiota ruphachispa yupaychaspapiwan.

⁴Sapa kutinmi kamachiy profetakunata kachamurqaykichis: Ama ruwaychischu ñoqaq millakusqay mana chanin ruwaykunataqa, nispa, niqta.

⁵Qankunataq ichaqa mana uyarikuspa mana kasuwarqankichischu, manallataq millay ruwayniykichistapas wak dioskunaman sacrificio ruphachiyniykichistapas saqerqankichischu.

⁶Chayraykun k'arak phiñakuyniyqa nina hinaraq rawrarirqan Judá llaqtakunapi Jerusalén callekunapi, hinaspan pasaqta purunyaykapurqan raqay-raqay kanankama, nispa.

⁷Ahinatan ñoqa Israelpa Diosnin Tukuy-atiyniyoq Señorqa nini: ¿Imanaqtinmi qankuna kikiykichista kay hatun mana allinta ruwakunkichis? ¿Imanaqtinmi wañurananta hinata qhawawaqchis llapan Judá runakunata, qharikunata, warmikunata, erqekunata, qholla wawakunatapas, manaña huk runallapas kanankama?

⁸¿Imanaqtinmi ruwayniykichiswan phiñachiwankichis kay Egipto suyupi tiyasqaykichispi wak dioskunaman sacrificiota ruphachispaykichis? Chaywanmi qankuna kikiykichis thunikunaykichispaq ruwakushankichis, kay pachantin runakunan pisichasunkichis ñakasunkichispas.

⁹¿Qonqapunkichisñachu machulaykichispapas Judá reykunaqpas warminkunaqpas mana allin ruwasqankunata, kaqllataq qankunaqpas warmiykichispapas Judá suyupi Jerusalén callekunapi ruwasqaykichistapas?

¹⁰Kunankamapas manapunin qankunaqa llakirikunkichisraqchu, manallataq manchakunkichispaschu, manallapunitaq kamachisqay simikunatapas unanchasqay simikunatapas kasukunkichischu.

¹¹Chayraykun ñoqa Israelpa Diosnin Tukuy-atiyniyoq Señorqa niykichis: Yuyaykukunin qankunaman mana allinta chayachimuspay Judá runakunata llapantapuni ch'inyachinaypaq.

¹²Judá runakuna puchuqmanta Egiptoman tiyakapuq riy yuyaykukuqkunataqa llapantan hap'isaq, wañunqakutaq. Egiptopin huch'uypas hatunpas llapanku wañunqaku maqanakuypi, yarqaypi, hinaspataqmi lliwpa k'amisqan millay ñakasqan llaksakuyraq kanqaku.

¹³Ñak'arichillasaqtaqmi Egiptopi tiyaqkunata, Jerusalenpi ñak'arichisqayta hina maqanakuywan, yarqaywan, onqoypiwan.

¹⁴Manapunin pillapas chay Judá runakuna puchuqmanta Egiptoman ripuspa tiyamuqkunaqa ayqenqakupaschu kawsanqakupaschu. Judamanña tiyakapuq kutimuyta munanqaku chaypas, manapunin kutimunqakuñachu, hinaña huk pisi ayqekuqkuna kanqa chaypas, nispa.

¹⁵Chaypin askha runakuna kasharqan: warmikunaq wak dioskunaman sacrificiota haywashasqanta yachaq qharikuna, warmikunapas, Egipto uray ladopi tiyaq Judío runakunapas. Paykunan Jeremiasta nirqanku:

¹⁶—Señor Diospa sutinpi niwasqaykikutaqa manan uyariyta munaykuchu.

¹⁷Aswanpas imatachus rimarirqayku chayllatapunin hunt'asaqku. Judá llaqtakunapi Jerusalén callekunapipas machulaykupas, reyniykupas, llaqtayku uma runakunapas ñoqaykupas Hanaq Pacha Qoyamanqa sacrificiota ruphachishallaqpunin kayku, kaqllataq vino hich'asqa ofrendatapas haywashallaqpuni kayku, chayllatapunin ruwasaqku. Chayta ruwaqtiykun ñawpaqqa allin mikhuyniykupas kawaqku, lliw imapas allillanpuni kawaqku, manataq ima hatun llakikunapas kawaqkuchu,

¹⁸ichaqa Hanaq Pacha Qoyaman sacrificio ruphachiyta vino ofrenda haywaytawan saqepusqaykumantapachan mana imaykupas kapunchu, yarqaypi maqanakuypiwan wañupushayku, nispa.

¹⁹Warmikunapas nillarqankutaq: —Ñoqaykun Hanaq Pacha Qoyaman sacrificiota haywarqayku, vino ofrendata hich'arqayku, t'antamantapas Qoyata ruwarqayku. Lliw chaykunataqa qosaykuq yachasqanmi ruwarqayku, kunanpas ruwallasaqkupunin, nispa.

²⁰Hinan Jeremiasqa llapan chay rimaq qharikunata warmikunata nirqan:

²¹—Qankunapas machulaykichispas reyniykichispas llaqta uma runaykichispas suyu runakunapas Judá llaqtakunapi Jerusalén callekunapi sacrificiota haywarqankichis, ¿chaykunamantari yuyankichischu Señor Diospa mana reparasqantapas mana yuyarisqantapas?

²²Señor Diosqa manapuniña millay mana chanin ruwasqaykichista hinata qhawayta munaspan suyuykichista mana runaq tiyananman raqay-raqay purunman tukuchirqan, chaymi kunan p'unchay ñakasqa kashan.

²³Qankunaqa sacrificiota haywarqankichis, Señor Dios contran huchallikurqankichis, simintapas manan kasukurqankichischu, manallataq kamachikuy siminkunata, unanchasqa siminkunata, chaninchasqa siminkunatapas kasukurqankichischu, chaymantan kay hatun llakikunataqa ñak'arishankichis, nispa.

²⁴Chaymantapas Jeremiasqa lliw runakunata, aswantaqa warmikunata nillarqantaq: —Uyariychis Señor Diospa kay willakuyninta, llapallaykichis kay llaqtapi tiyaq Judá runakuna:

²⁵Israelpa Diosnin Tukuy-atiyniyoq Señormi nin: Qankunapas warmiykichiskunapas simiykichiswan rimasqaykichistan makiykichiswan ruwarqankichis. Qankunan rimarirqankichis: Ñoqaykun rimarirqayku Hanaq Pacha Qoyaman sacrificiota haywanaykupaq, vino ofrendata hich'anaykupaq, chaytaqa hunt'asaqkupunin, nispa. ¡Allinmi! ¡Kusan! ¡Hunt'allaychis rimarisqaykichistaqa! ¡Ruwashaychisyá!

²⁶Ichaqa ñoqa Señor Diospa nisqayta uyariwaychis, kay Egiptopi tiyaq Judío runakuna: Ñoqan jurani hatun atiyniyoq sutiypi, manapunin Egiptontinpi tiyaq mayqen Judá runapas sutiyta rimarinqachu: Señor Diospa sutinrayku, nispaqa.

²⁷Ñoqaqa makillan qhawashaykichis mana allinniykichista ruwanaypaq. Egiptopi llapa tiyaq Judío runakunaqa yarqaywan maqanakuywan mana hukniyoqmi wañunqaku.

²⁸Sinchi pisillan maqanakuypi mana wañuspa Egiptomanta Judaman ayqeqqa kanqa. Chaymantataq Judá runakunamanta puchuq Egiptopi tiyaq hamuqkuna yachanqaku paykunaq rimasqanchus cheqaq icha ñoqaq rimasqaychus cheqaq kasqanta.

²⁹Ñoqa Señor Diosmi nini: Kay suyupin ñak'arichisqaykichis, qankunata mana allin ruwanay rimarisqaytan hunt'asaqpuni. Chaykuna qankunapaq ancha sut'i kananpaqtaqmi, kayta ruwasaq:

³⁰Ñoqan Egipto rey Hofrata qaraykusaq wañuchiy munaq awqanman, imaynatan hap'iykachirqani Judá rey Sedekiasta wañuchiy munaq awqan Babilonia rey Nabukodonosorman hinata, nispan, nispa.