Read Quechua Cuzco Bible 1988 JEREMÍAS 46 Bible Online

JEREMÍAS 46 - Quechua Cuzco Bible 1988 bible

JEREMÍAS 46

¹Hatun suyukunamanta Jeremiasman Señor Diospa nisqan:

²Egiptomanta nisqanmi kay hina karqan: Judá rey Josiaspa churin Joakim kinsa wata kurakña kamachikushaqtinmi, Eufrates mayu pata Karkemispi Babilonia rey Nabukodonosorqa Egipto rey Nekoq soldadonkunata atiparqan. Kaytan Señor Diosqa chay soldadokunamanta nirqan:

³Egipto oficialkunan ninkun: ¡Escudokunata wakichikuychis! ¡Maqanakuyman usqhaychis!

⁴¡Caballokunata caronaychis! ¡Phawaqkuna sillakuychis! ¡Cascoyoqkama wachuchakuychis! ¡Lanzaykichista ñawch'iyachiychis! ¡Qara unkuykichiswan churakuychis! nispa.

⁵Ñoqa Señor Diosmi ichaqa nini: Imatachá rikushani. Manchay llaksasqan kashanku, chaymi kutirirqakampunku, allin qharikunan sarunchachikapunku. Mana qhepata qhawarikuspan usqhaylla ayqerikapunku. ¡Hinantinpin kashan manchakuy!

⁶Allin phawaqkunan mana atipunkuchu, allin qharinkunan mana ayqeyta atipunkuchu. Wichay lado Eufrates mayu patapi misk'akuspan kumpakunku, nispa.

⁷¿Pitaq chay Nilo mayu hinaraq, sinchi phoqchiq unuyoq mayu hina?

⁸Egipton chayqa Nilo mayu hina askha unuyoq, sinchi phoqchiq unuyoq mayu hinaraq. Egiptoqa ninmi: Wiñaspan pachantinman llimp'asaq, llaqtakunatan runantinta thunisaq, nispa.

⁹¡Caballopi soldadokuna usqhaychis! ¡Carretapi kaqkuna ñawpaychis! ¡Soldadokuna puririllaychisña: Etiopiamanta Libiamantawan soldadokunaqa escudokunawan churarqarisqan, Lidiamanta soldadokunaqa allin wach'iy yachaqkunan!

¹⁰Chay p'unchaymi ichaqa Tukuy-atiyniyoq Señor Diospa p'unchaynin, ayni-kutichinan p'unchay, awqanman ayni-kutichinan p'unchay. Saksanankaman espada wañuchinqa yawarwanpas machanankamaraq. Arí, Tukuy-atiyniyoq Señor Diosmi wichay lado suyupi Eufrates mayu patapi sacrificiota haywan.

¹¹Egipto llaqta, Galaadta wichay balsamota maskhaq. Askha hampikunawanña hampikunki chaypas yanqapaqmi kasunki, qanpaqqa manapunin hampi kanñachu.

¹²Suyukunaqa ñan yachanña k'umuchisqa kasqaykita, llapan llaqtakunan uyarishankuña qaparisqaykita. Maqanakuqkunan paykuna pura takanakuspa iskayninku pampaman urmanku.

¹³Babilonia rey Nabukodonosor Egiptoman phawaykunanpaq qayllaykushaqtinmi, Señor Diosqa profeta Jeremiasta nirqan:

¹⁴Egiptopi kayta willaychis, Megdolpi, Menfispi, Tafnespiwan willaychis: Muyuriqniykichistañan espadaqa tukurqamushan, chayrayku wakichisqallaña sayashaychis.

¹⁵¿Imanaqtinmi Apis nisqa diosniykichisqa ayqekun? ¿Imanaqtinmi toroykichisqa mana qhari hinachu sayan? Chaytaqa ñoqa Señor Diosmi tanqarparini.

¹⁶Soldadokunan misk'akuspa urmapunku, ninakunkutaq: Haku kaymanta llaqtanchisman kutipusun, paqarisqanchis suyunchisman, oqokuq espadamanta ayqesunchis, nispa.

¹⁷Egipto rey Faraonta sutichaychis: Rimaylla-rimaq mana ima ruwaq, nispa.

¹⁸Ñoqan kani Reyqa, sutiytaqmi Tukuy-atiyniyoq Señor Dios. Sutiypin jurani: imaynan Tabor orqo wakin orqokunamanta aswan hatun, imaynan Carmelo orqopas mama qochamanta aswan hatun, chay hinan awqaqa hamunqa.

¹⁹Egiptopi tiyaqkuna, wakichikuychis kamachi-kayman apachikapunaykichispaq, Menfisqa purunyapunqan mana piqpa tiyanan ch'usaqman.

²⁰Egiptoqa munay wirayasqa wakan, ichaqa wichay ladomanta hamuspan tankayllu k'utun.

²¹Paywan kashaq pagasqa mink'a soldadokunapas wirayasqa torillokuna hinallataqmi, paykunapas phawashaspan kutirikampunku qhari hina mana sayaspanku, paykunaqqa qaqapananmi chayamun ñak'arinanku p'unchaypiwan.

²²Egiptoqa q'osñiyoqraqmi mach'aqway hina silbakuspa ayqen, soldadokuna qayllaykamushaqtin, mallki wit'uq hina hachakunantin hamushaqtin.

²³Paykunan mallkikunata wit'unku, hinaña mallki tutayaq kashaqtinpas. Langosta hina askhallañan kanku, mana piqpa yupay atinanraq.

²⁴Egipto llaqtataqmi p'enqachisqa kashan, wichay ladomanta hamuq llaqtaman hap'ichisqan kashan. Ñoqa Señor Diosmi chayta nini.

²⁵Israelpa Diosnin Tukuy-atiyniyoq Señormi nin: Ñak'arichisaqñan Tebas llaqtaq Amón nisqa diosninta, Egiptotapas llapan diosnintinta, reynintinta, Faraontapas payman hap'ipakuqkunatawan.

²⁶Wañuchiy munaq Babilonia rey Nabukodonosorpa runankunantinpa makinmanmi urmaykachisaq. Ichaqa qhepa p'unchaymanqa Egipto suyupi tiyaq wakmantan kapunqa ñawpaq hina, nispan nin Señor Diosqa.

²⁷Señor Diosmi nin: Kamachiy Jacob, ama manchakuychu, Israel llaqtalláy, ama musphaychu. Qantaqa karu llaqtamantan qespichisqayki, wawaykikunatapas apasqa kasqan llaqtamantaqa horqompusaqmi, Jacobqa kutimuspa llakhillan kanqa, mana piqpa muchuchisqan allillanmi kanqa.

²⁸Kamachiy Jacob, ama manchakuychu, qanwanmi ñoqaqa kashani. Maykunamanchus qanta ch'eqechisqay suyukunatan llapanta thunisaq, qantataqmi ichaqa manaña thunisqaykichu. Chaywanpas huchaykimantaqa muchuchisqaykipunin ahinapi wananaykipaq, nispa.