Read Quechua Cuzco Bible 1988 JEREMÍAS 49 Bible Online

JEREMÍAS 49 - Quechua Cuzco Bible 1988 bible

JEREMÍAS 49

¹Señor Diospa Amonmanta willakusqan: ¿Israelqa mana churiyoqchu? ¿Israelpaqa manachu pillanpas kan? Chay hinari, ¿imanaqtintaq Amón runakunaq Milkom nisqa diosninri Gad aylluq hallp'anta hap'ikapun? ¿Imanaqtinmi Gadpa llaqtankunapi Amón runakunaqa tiyanku?

²Chayamunqan huk p'unchay Amón runakunaq llaqtan Rabá contra phawaykamunankupaq qaparkachasqankuta uyarichinay. Rabá llaqtaq raqay-raqayman tukupunan, muyuriq llaqtachankunapipas ninallaña rawraykapunan. Hinan Israel runakunaqa paykuna qarqoqta qarqollanqakutaq.

³¡Hesbón runakuna, yupakuychis Hai llaqtaq thunikusqanmanta! ¡Rabá warmikuna, nanaymanta qaparkachaychis! ¡Yana p'achawan churakuspa qhasqoykichista takakuychis! Phawaychis waq'a hina cuerpoykichista k'irikuspa, Milkom nisqa diosniykichista karu suyuman apanqaku sacerdotentinta allichachaq runakunantinta.

⁴Yaw mana chanin llaqta, ¿imanaqtinmi qhari-qhariman tukunki? Kallpaykiqa pisi-pisimantan chiriyashanña, huñusqayki qhapaq-kayniykipi suyakuspan ninki: ¿Pitaq atinman phawaykamuwayta? nispayki.

⁵Allinta yachakuy, hinantinmanta kachaykamuspan llaksachisqaykichis, sapankaykichismi mana qhawarikuspa phawarikapunkichis, manañataqmi kanqachu wakmanta huñuykuqniykichis.

⁶Chaymantañan ichaqa Amón suyuta wakmanta t'ikarichisaq, nispan nin Tukuy-atiyniyoq Señor Diosqa.

⁷Tukuy-atiyniyoq Señor Diospa Edommanta willakusqan: ¿Manañachu Temanpi yachayniyoqqa kan? ¿Manañachu yuyaysapakunaqa yuyaychayta atin? ¿Yachayninchu waqllirqapun?

⁸Dedanpi tiyaqkuna, Esaú llaqtataqa thunisaqñan, muchuchinay p'unchaymi chayamushan, chayrayku kutirispa ayqekuychis, qaqa wasikunaman pakakamuychis.

⁹Uvasta pallaqkunapas wakin uvas ch'ampataqa saqenmi. Tuta suwa hamuspapas ima munasqallantan apan.

¹⁰Ñoqan ichaqa Esaú llaqtata ch'usaqta ruwasaq, tarisaqmi pakakunankutapas, manapuniñan pakakuyta atinqakuchu. Wawanku, ayllunku, wasi-masinkupas llapallanmi thunisqa kanqa. Manan pipas kanqachu rimariq:

¹¹Wakcha wawaykita saqeway, uywapushasqayki, viudaykikunatapas ñoqaña qhawaripushasqayki, nispa, niq.

¹²Señor Diosmi nin: Phiñakuyniywan hunt'aykusqa qerumanta manaña ukyananpaq kaqpas ukyanmi, ¿chaychu qanqa chay qerumanta mana ukyawaq? Manapunin, qanqa ukyankipunin.

¹³Ñoqa Señor Diosmi sutiyrayku jurani: Bosra llaqtapas purunyachisqan kanqa, hinallataq k'amisqa ñakasqa llaksakuyraq kanqa, llapan llaqtakunapas lliwpunin purunyapunqa, nispa.

¹⁴Señor Diosmantan willakuyta yachani, huk willakuqmi suyukunaman willamunanpaq kachasqa: ¡Huñu kaychis! ¡Puririychis Edom contra! ¡Sayarispa maqanakuq phawariychis! nispa.

¹⁵Ñoqan lliw llaqtakunamanta aswan huch'uyta ruwasqayki, llapan runakunaq pisichasqantan ruwasqayki.

¹⁶Yaw qaqa k'akllupi tiyaqkuna, yaw qaqa ñawch'ipi tiyaqkuna, wak runakuna manchachiq kasqaykichiswanmi uma hoqariq kasqaykichispiwan q'otuchikurqankichis. Hinaña anka hina sinchi alto ranrapi tiyankichis chaypas, chaymantan urmaykachimusqaykichis, nispan nin Señor Diosqa.

¹⁷Señor Diosmi nillantaq: Edompa thunikuyninqa sinchi mancharikuymi kanqa. Lliw chayninta puriqkunan muchusqanta rikuspanku llaksakuymanta: ¡Ikiraqmi! ninqaku.

¹⁸Sodoma llaqta Gomorra llaqta muyuriqnin llaqtakunapiwan hinan thunisqa kapunqa. Manan pipas chaypi tiyanqañachu, manataqmi wasichakunqapaschu.

¹⁹Jordán mayu pata sach'a-sach'amanta q'achu-q'achuman lloqsiq león hinan Edom suyu runakunata hallp'ankumanta qatirparisaq kaq ratopacha. ¿Pin ñoqa hina kanman? ¿Pin ñoqawan churanakunman? ¿Mayqen michiqmi hark'ayta atiwanman?

²⁰Chayrayku uyarichis ñoqa Señor Diospa Edom contra yuyaykusqayta, Temanpi tiyaqkuna contra unanchasqaytapas: Huch'uy uñatapas aysanqakun, waylla-wayllatapas chaqonqakun.

²¹Edompa thunikuyninqa pasaqtan kununununqa, pacharaqmi khatatatanqa. qaparisqanpas Puka Qochamanraqmi uyarikunqa.

²²Awqanqa hanaqmanta phalaykamuq anka hinan Bosra pataman raphracharikuspa phawaykunqa. Chay p'unchaytaqmi Edompa soldadonkunaqa khatatatanqaku wachakuy nanaywan kashaq warmi hinaraq.

²³Señor Diospa Damascomanta willakusqan: Hamat llaqtawan Arfad llaqtawanmi khuyay llakisqa kashanku, mana allin willakuykunata uyarispa. Qochaq aytiynin hinan sonqonku mana tiyanchu.

²⁴Damascoq hallp'anmi chiriyarqapun, ayqekunanpaq kutirispan llaksakurqan, nanaywan phutikuywanmi lliwta q'aqcharqan wachakuy nanaywan kashaq warmi hina.

²⁵¡Wikch'urparisqan kapun allin mentasqa llaqta, kusisqalla kakuq llaqta!

²⁶Chay p'unchaymi waynankuna plazankunapi sinku-sinku kanqa, llapan maqanakuqkunataq wañuranqaku.

²⁷Damasco muyuriq perqataqa ninawanmi kanaykusaq, rey Ben-Hadadpa qhapaq wasinkunatapas ruphaykunqan, nispan nin Tukuy-atiyniyoq Señor Diosqa.

²⁸Babilonia rey Nabukodonosorpa atipasqan Kedar ayllumanta Hazorpa umallinkunamantawan Señor Diospa willakusqan: ¡Usqhay phawaykuychis Kedarman! ¡Thuniychis chay inti haykuy ch'inneqpi tiyaq runakunata!

²⁹Qechumuychis karpankuta uywankutawan, cortinankuta, camellonkunatawan, lliw imaymanankunatawan. Qapariychistaq: ¡Muyuriqniykichispin llaksakuy kashan! nispa.

³⁰Señor Diosmi nin: Qankuna Hazorpi tiyaqkuna, ¡Usqhaylla ayqeychis! ¡Allin-allinta pakakamuychis! Babilonia rey Nabukodonosormi qankuna contra yuyaykun, qankuna contra unanchaspan nin:

³¹Hakullaña phawaykusun chay llakhi tiyaq runakunaman, paykunaqa tiyanku yanqa pampapin, mana imata yuyarispa, sapallanku mana piniyoq.

³²Camellonkunata qechusunchis, mana yupay atiy uywankunata apasunchis, nispa. Señor Diosmi nin: Hinantinmanmi ch'eqeykachisaq chay ch'ipu chukchan rutukuq runakunata, hinantinmantataqmi thuniqniykita apamusaq.

³³Hazormi wiñaypaq purunyapunqa, chaypin chacal nisqa animalkuna tiyanqa, manan pillapas tiyanqañachu, manataqmi pipas wasichakunqachu, nispan nin Señor Diosqa.

³⁴Judá suyupi kamachikuyta Sedekías qallarishaqtinmi, Señor Diosqa Jeremiasman Elammanta kayta willarqan.

³⁵Ñoqa Tukuy-atiyniyoq Señor Diosmi nini: Uyariy, Elampa wach'iqninkunatan chiriyachisaq, chaykunallawanmi payqa kallpayoq kashan.

³⁶Elam llaqta contran hinantinmanta wayrachisaq, hinantinmanmi ch'eqechisaq, manan kanqachu huk suyullapas Elam runakunaq mana chayasqanqa.

³⁷Elamtan awqanpa ñawpaqenpi khatatatachisaq, paykuna wañuchiy munaqpa ñawpaqenpin llaksasaq. Hatun llakikunatan kachaykamusaq, paypin phiñakuyniyta thasnukusaq, pasaqta thuninaykaman maqanakuywan kachaykusaq.

³⁸Elampin kamachikuy tiyanayta churasaq, reyninkuta umallinkunatawantaqmi lliwta wañuchisaq.

³⁹Qhepamanmi ichaqa Elamta wakmanta t'ikarichisaq, nispan nin Señor Diosqa.