Read Quechua Cuzco Bible 1988 JEREMÍAS 5 Bible Online

JEREMÍAS 5 - Quechua Cuzco Bible 1988 bible

JEREMÍAS 5

¹Señor Diosmi nin: Jerusalenpa callenkunata puripamuychis, reqsinaykichispaq allinta qhawamuychis, plazakunapi maskhamuychis, icha pillapas kanmanchu chaninta ruwaq cheqaq-kay munaq. Tarirqamunkichischus chayqa, Jerusalentaqa pampachasaqmi.

²Hinaña sutiypi juraq kanku chaypas, cheqaqtapunin yanqa rimaqlla kanku, nispa.

³Señor Diosníy, qanqa hunt'aq runatan maskhashanki. Hasut'irqankin, manataq nanayta repararqankuchu, ñit'iykurqankin, manataq munarqankuchu, paykunaqa sonqonkutan rumiyaykachirqanku, manataq qanman kutirimpuyta munarqankuchu.

⁴Ñoqaqa yuyaykurqanin: Chaykunaqa mana yuyayniyoq wakchakunan kanku, Señor Diospa imachus munasqantaqa manan yachankuchu, manataq Diosninkuq kamachikuy simintapas yachankuchu.

⁵Chay hinaqa allin wiraqochakunaman risaq, paykunawan rimamusaq, paykunaqa Señor Diospa imachus munasqantapas Diosninkuq kamachikuy simintapas yachankupunichá, nispa. Ichaqa kasukuytapas mana munaspankun llapallanku Dios contra sayarisqaku.

⁶Chayraykun yunkamanta león lloqsimuspa sipinqa, ch'inneqmanta lobopas lloqsimuspa khamunqa. Leopardon llaqta qayllamanta qhamiyashan, pillapas lloqsimuqtinqa llik'irqarinanpaq sinchi askha huchallikusqankumanta, sapa kuti Señor Diosta saqepusqankumantawan.

⁷Señor Diosmi nin: ¿Imaynataq qankunata ñoqa pampachaykichisman? Churiykikunan saqepuwarqanku, paykunan wak dioskunaq sutinpi jurarqanku, chaykunaqa manan diospunichu. Saksanankukaman mikhuchirqani, chaywanpas wasanchawaytan qallarirqanku, llapallankutaqmi qhellipi puriq warmiq wasinman puriripurqanku.

⁸China maskhaq wirayasqa orqo caballo hinan runa-masinkuq warminpa qhepanta phawarqanku.

⁹¿Chaykuna ruwasqankumantaqa manachu muchuchiyman? Chay hina llaqtamanri, ¿manapunichu tupaqninta qoyman?

¹⁰Awqanku haykumuspa uvas yurakunata t'irachunku, amapas llapantachu tukuchunku. Uvas yurakunata k'allmanachunku, manaña chakrayñachu kasqanrayku.

¹¹Israelpas Judapas wasanchawarqankupunin, nispan nin Señor Diosqa.

¹²Israelwan Judawanmi llullakuspa Señor Diosmanta rimarqanku, nirqankutaq: Diosqa manan imanawasunpaschu. Manan ima mana allinpas kawasunchu, manan maqanakuypas yarqaypas kawasunchu, nispanku.

¹³Profetakunaqa yanqa thawtiqllan, paykunaqa manan yachankuchu Señor Diospa ima nisqantapas.

¹⁴Tukuy-atiyniyoq Señor Diosmi niwarqan: Paykunan niwarqanku chay mana chaninkunata, chayrayku ñoqa simiykiman rimayniyta churasaq, simiykunan nina hina kanqa, llaqtataqmi llant'a hina kanqa, ninataqmi llant'ata pulapunqa, nispa.

¹⁵Señor Diosmi nillantaq: Yaw Israel, qan contran karumanta hamuq llaqtata pusamushani, chayqa allin takyasqa ñawpa llaqtan, rimaynintapas manan reqsinkichu, parlasqantapas manan yachankichu.

¹⁶Llapankun maqanakuq allin qharikuna kanku, wach'inankuwanqa sipillankupunin.

¹⁷Llank'asqaykitapas mikhunaykitapas mikhurqapunqakun, churiykitapas ususiykitapas oqoykapunqakun, ovejaykikunatapas uywaykikunatapas mikhurqapunqakun, uvasniykitapas higosniykitapas millp'urqapunqakun, armankuwanmi allin perqayoq llaqtaykikunatapas thuninqaku, nispa.

¹⁸Señor Diosmi niwarqan: Chay p'unchaykunaña chayamuqtinpas manaraqmi llapaykichistachu thunisqaykichis.

¹⁹Llaqtayki tapusunki: ¿Imanaqtinmi tukuy chaykunata Apu Señor Diosniyku ruwawanku? nispa chayqa, kutichinki: Imaynan hallp'aykichispiraqtaq Señor Diosta saqepuspaykichis mana reqsisqa dioskunata yupaycharqankichis, chay hinallataqmi wak suyupi mana reqsisqa runakunaq kamachin kapunkichis, nispayki, nispa.

²⁰Señor Diosmi nin: Jacobpa mirayninman kayta willaychis, Judamanpas kayta willaychis:

²¹Kayta uyariy, mana yuyayniyoq loqhe llaqta, qhawaq ñawsan kanki, uyariq roqt'un kanki.

²²Ñoqa Señor Diosmi nini: ¿Manachu qankunaqa manchakuwankichis? ¿Manachu ñawpaqeypiqa khatatatankichis? Ñoqan aqota churarqani mama qochaq qorpan kanapaq, chay qocha manapuni wasapananpaq. Imaynataña phoqchispapas manan atinqachu, imaynataña hatarispapas manapunin wasapanqachu.

²³Qankunan ichaqa mana kasukuq loqhe sonqo kankichis, qhepaman kutirispan wikch'upuwarqankichis.

²⁴Manan hayk'aqpas kikiykichisqa ninkichischu: Apu Señor Diosninchista manchakusun, paymi paranan mitallapipuni parachipuwanchis, wiñachinanpaq poqochinanpaq ima. Paymi mikhuy hoqarina mitatapas yachasqallataña waqaychapuwanchis, nispaqa.

²⁵Qankunaq huchaykichismi ichaqa lliwta huk hinaman t'ikrarqapun, chaymi samikunatapas mana chaskinkichisñachu.

²⁶Arí, llaqtaypiqa kanpunin millay runakuna, phalaq animalta hap'inanpaq toqlla churaq hina runa hap'inanpaq toqllata churan.

²⁷Wasinkumanqa suwasqakunatan hunt'achinku jaulaman phalaq animalkuna hunt'aykachisqata hina, chay hinapin atiyniyoqman qhapaqmanwan tukupunku.

²⁸Allin mikhusqa rakhullañan kashankupas, millay ruwasqankuqa mana tukukuqmi, mana tayta-mamayoqpaqpas manan chaninchankuchu, wakchakunapaqpas manan kuskachankuchu.

²⁹¿Chaykuna ruwasqankumanta manachu ñak'arichiyman? ¿Chay hina suyumanqa tupaqninta manachu qopuyman?

³⁰Kay hina sinchi llaksakuyraqmi kay suyupi kaykushan:

³¹Profetakunan llullakuspa rimanku, sacerdotekunan kamachikunku ima munasqankuman hina. Llaqtayqa chay hinatapunin munan, ichaqa, ¿imatataq ruwankichis p'uchukay p'unchay chayamuqtinri? Nispan nin Señor Diosqa.