Read Quechua Cuzco Bible 1988 JEREMÍAS 50 Bible Online

JEREMÍAS 50 - Quechua Cuzco Bible 1988 bible

JEREMÍAS 50

¹Señor Diosmi kayta Jeremiaswan nichirqan Babilonia runakunaq suyunmanta:

²Suyukunaman willaspa nimuychis, banderata hoqarispa willaychis, sut'itapuni willaychis: ¡Babilonia suyuqa atipasqañan! Diosninku Belmi p'enqaypi kashan, diosninku Mardukpas khuyay llakisqan kashan, rikch'ayninkun p'enqaypi kashan, idolonkupas khuyay llakisqan kashan.

³Wichaymanta huk suyun phawaykunanpaq hamunña, pasaqtapunin suyunta purunyarqachipunqa, chaypiqa manan pipas tiyanqachu, runapas uywapas ayqekapunqan, nispa.

⁴Señor Diosmi nin: Chay p'unchaymi Israel runakuna, Judá runakunapiwan waqaspa ñoqa Apu Señor Diosninkuta maskhamuwanqaku.

⁵Sionman kutimpunankupaqmi ñanta tapukunqaku, chaymantataq ninqaku: ¡Hakuchis! Señor Diosman k'askakapusunchis, wiñaypaq rimanakusun mana qonqanapaq, nispa.

⁶Llaqtayqa chinkachisqa ovejakuna hinan karqan, michiqninkuq mana allin pusasqan hinan, orqokunapi qatirparisqa hinan. Huk orqomanta huk orqomanmi purirqanku kanchankutapas qonqanankukama.

⁷Piña tarispapas oqoykapullaqñan, awqankupas nirqankun: Ñoqanchispaqa manan imapas huchanchischu, paykunamá Señor Diospa contrantaqa huchallikurqanku, allin mikhuchiqninkuq contranta, machulankuq hap'ipakunan contrantawan, nispa.

⁸Señor Diosmi nin: Babiloniamanta ayqekapuychis, Babilonia runakunaq suyunmanta lloqsipuychis, ñawpaq puriq cabra hina lloqsiychis.

⁹Ñoqan huk t'aqapi huñusqa wichaymanta atiyniyoq llaqtakunata tanqarimusaq, paykunawanmi Babiloniaman phawaykachisaq. Babilonia contra kanchachaykukuspan wichaymantapacha atipanqaku. Mana atipachikuq allin maqanakuq hinan wach'inankuqa runallamanpuni chayanqa.

¹⁰Babilonia suyutan llat'ananqaku, mana munanankukaman qechunqaku, nispan nin Señor Diosqa.

¹¹Babilonia runakuna, qankunan llaqtayta llat'anarqankichis, kunantaq kusikushankichis q'ochukushankichis, q'achupi waka uña hinaraq q'etipiyashankichis, caballo hinaraq wihihihishankichis.

¹²Chayraykun mamaykichis Babiloniaqa sinchi p'enqasqa kanqa, wachaqniykichis suyun hatun llakipi kanqa. Llapan suyukunamanta aswan huch'uymi kapunqa, pasaq ch'aki ch'in nisqan purunyaykapunqa.

¹³Phiñakuspaymi mana ch'ulla wasiyoqta ruwasaq, pasaq purunmanpunin tukuchisaq. Pillapas chaynin puriqmi muspharanqaraq, raqay-raqay kasqanta rikuspa.

¹⁴¡Wach'iqkuna Babiloniata muyuykuychis! ¡Ama mich'akuspa payman kachariychis wach'inaykichista, ñoqa Señor Dios contra huchallikusqankurayku!

¹⁵¡Muyuriqninmanta qapariykuychis maqanakunapaq! Babiloniaqa atipasqañan rikukun, pukarankupas urmaykunñan, perqankupas thunikamunñan. Ñoqa Señor Diospa ayni-kutichiyniymi chayqa, chayrayku qankunapas ayniyta kutichiychis, paykuna hina qankunapas ruwaychis.

¹⁶Babiloniapi muhu t'akaqkunata wañuchiychis, ichhuqtapas wañuchillaychistaq. Kay hatun maqanakuyta manchakuspanku, wak llaqtamanta kaqkuna lliw kutipunqaku, sapankanku llaqtankumankama ayqekapunqaku.

¹⁷Ch'eqechisqa oveja t'aqa hinan Israelqa, leonkunaq qatiykachasqan hinan kashan. Ñawpaqtaqa Asiria reymi mikhurqan, chaymantataq Babilonia rey Nabukodonosor tullunkunatapas k'utuykurqan.

¹⁸Chayraykun ñoqa Israelpa Diosnin Tukuy-atiyniyoq Señorqa nini: Babiloniata reynintinta ñak'arichisaq imaynan Asiria reytapas ñak'arichirqani hinata.

¹⁹Israeltataqmi llaqtanman kutichimpusaq, paykunan mikhunqaku Carmelo orqopi Basán hap'iypiwan, saksaykunqakun Efrainpa orqo-orqonpi Galaad hap'iypiwan.

²⁰Chay p'unchaypiqa Israelpas Judapas mana huchayoqmi rikhurinqaku, kawsashaq qhepachisqaykunata pampachasqayrayku, nispan nin Señor Diosqa.

²¹Señor Diosmi nin: ¡Phawaykuychis Merataim suyuman! ¡Phawaykuychis Pekudpi tiyaqkunaman! ¡Wañuchiychis pasaqta thuninaykichiskama! ¡Kamachisqayta llapanta kasuwaychis!

²²Suyuntinpin maqanakuy ch'aqwaylla uyarikun, manchay thunikusqanpiwanmi uyarikun.

²³¡Lliw pachantinta q'asuna Babiloniaqa imaynan kay hina ñut'uta p'akikapun! ¡Imayna mancharisqaraqmi lliw suyukuna Babilonia chay hinapi rikukuqtinqa!

²⁴Babilonia qan kikiykin toqllata churakurqanki, mana chayta reparaspataq chaypi urmarqanki. Watasqataq hap'irqosqa rikukurqanki ñoqa Señor Dios contra sayarisqaykimanta.

²⁵Ñoqa Tukuy-atiyniyoq Qollana Señor Diosmi Babilonia runakunaq suyunpi imachus ruwanaytaqa tukusaqpuni, chaymi ñoqaqa arma waqaychanayta kicharirqani, phiñakuspa hoqarinay armatataq horqomurqani.

²⁶¡Hinantinmanta Babiloniaman phawaykuychis! ¡Taqenkunata kicharpariychis! Qechusqaykichiskunata taqeykuychis, suyuntinta thunispataq mana ch'ullayoqta wañurachiychis.

²⁷Wañuchiychis lliw soldadonkunata, nak'anaman apachiychis. ¡Ikiraqmi paykunamanta! ¡P'unchayninkun chayamun ñak'arinankupaq!

²⁸¡Uyariychis! Babiloniamanta chinkakamuqkunan ayqekamuqkunapiwan Sionman chayamunku. Imaynatachus Señor Dios yupaychana wasita Babilonia runakunaq thunisqankumanta Apu Señor Diosninchispa ayni-kutichisqanta willachunku.

²⁹Señor Diosmi nin: Babilonia contra huñuychis llapan wach'iqkunata, kachaychis p'eqta kachariy yachaqkunata. Llaqtaq muyuriqninpi karpakuychis ama pipas ayqenanpaq. Ruwasqanmanta aynita kutichiychis, imaynatan pay ruwarqan hinata ruwaychis. Sinchitan ñoqa Señor Dioswan churanakurqan.

³⁰Chayraykun waynankuna plazakunapi sinku-sinku kanqa, chay p'unchaytaq llapan maqanakuqkuna wañuranqaku.

³¹Ñoqa Tukuy-atiyniyoq Señor Diosmi nini: Yaw qhariykachaq suyu, qan contran kashani, qanpaqmi chayamun p'unchay, qanpaqmi chayamun ñak'arichinay tiempo.

³²Yaw qhariykachaq suyu, misk'akuspan urmanki, manan pipas sayarichisunkichu. Ninawanmi llapan llaqtaykikunata kanaykusaq, chaymi llapan muyuriqniykipi kaqkunata ruphaykunqa, nispa.

³³Tukuy-atiyniyoq Señor Diosmi nin: Israel llaqtan alqochasqa, Judá llaqtan sarunchasqa. Paykunata mana kacharispan llapan hap'iqninkunaqa wisq'anku.

³⁴Paykunata kacharichiqmi ichaqa allin kallpayoq, Tukuy-atiyniyoq Señor Diosmi sutinqa. Paymi paykunata qhawananpaq churaykukun, chay hinapin llaqtanman thak-kayta apamunqa, Babiloniapi runakunamantaq llaksakuyta churanqa, nispa.

³⁵Señor Diosmi nin: ¡Babilonia runakuna wañuchunku! ¡Babiloniapi tiyaqkuna wañuchunku umallinkunantin yachaysapakunantin!

³⁶¡Watuqninkuna wañuchunku! Paykunaqa waq'akunan kanku.

³⁷¡Soldadonkuna wañuchunku! Paykunaqa q'aqchasqan kashanku. ¡Caballonkupas wañuchunku! ¡Carretankutapas chhalluchunku! ¡Paykuna ukhupi mink'asqa soldadokunapas wañuchunku! Paykunaqa warmi hinan kapunku. ¡Qhapaq kayninkutapas suwachunku! Chaykunaqa llapañan llat'anasqa.

³⁸Ch'akipuyninmi mayukunaman taripan, kunallanmi mayukunaqa ch'akipunqa. Babiloniaqa millay dioskunayoq suyun, chaykuna hawan yuyayninkuta chinkachikunku.

³⁹Chayraykun Babiloniapi tiyanqa kukuchikuna supaykunapiwan, chaypiqa tiyallanqataqmi hukukunapas. Chaypiqa manapunin runaqa tiyanqañachu, manan hayk'aqpas pipas tiyanqañachu.

⁴⁰Sodoma llaqta Gomorra llaqta muyuriqnin llaqtakunapiwan hinan thunisqa kapunqa, manan pipas chaypi tiyanqañachu, manataqmi wasichakunqapaschu, nispan nin Señor Diosqa.

⁴¹¡Qhawariychis! Askha runan hamushan wichay llaqtamantapacha, sinchi atiyniyoq llaqtan askha reykunapiwan karu suyumantapacha q'epichakamushan.

⁴²Armankuqa p'eqtakunawan lanzakunawanmi awqa sonqo mana khuyapayakuqmi kanku, chay runakunaq caballonkuq sarusqanqa mama qochaq phoqchiqeynin hinaraqmi uyarikun. Yaw Babilonia, qan contra maqanakuy patallapiña kashanku.

⁴³Babilonia reytaq chay willakuyta yacharqospa, manchakuymanta kallpanraq chiriyashan, pasaqtapunin llakikuymanta nanachikushan wachakuy nanaypi kashaq warmi hinaraq.

⁴⁴Señor Diosmi nin: Jordán mayu pata sach'a-sach'amanta q'achu-q'achuman lloqsiq león hinan Babilonia suyu runakunata hallp'ankumanta kaq ratopacha qatirparisaq. ¿Pin ñoqa hina kanman? ¿Pin ñoqawan churanakunman? ¿Mayqen michiqmi hark'ayta atiwanman?

⁴⁵Chayrayku uyariychis ñoqa Señor Diospa Babilonia contra yuyaykusqayta, Babilonia runakunaq suyun contra unanchasqaytapas: Huch'uy uñatapas aysanqakun, waylla-wayllatapas chaqonqakun.

⁴⁶Babiloniaq urmaykuyninqa pasaqtan kununununqa, pacharaqmi khatatatanqa, qaparisqanpas hatun suyukunapin uyarikunqa, nispa.