Read Quechua Cuzco Bible 1988 JEREMÍAS 51 Bible Online

JEREMÍAS 51 - Quechua Cuzco Bible 1988 bible

JEREMÍAS 51

¹Señor Diosmi nin: Kachamusaqmi thuniq wayrata Babilonia suyupaq runankunapaqwan.

²Wak llaqtayoq runakunatan Babiloniaman kachamusaq, paykunan chaypi tiyaqkunata trigota hina wayrachinqaku, hallp'antapas ch'usaqyachinqaku. Mana allin p'unchay chayamuqtinmi hinantin cheqasmanta phawaykunqaku.

³Aman hinata qhawankichischu p'eqtanku wakichikunankutapas qara unkunkuwan churakunankutapas. ¡Babilonia waynakunata ama khuyapayaychischu, soldadonkunata llapanta wañuchiychis!

⁴Babilonia runakunaq suyunpiqa wañunqakun, callenkunapipas t'urpusqan wañunqaku.

⁵Tukuy-atiyniyoq Señor Diosninkuqa Israeltapas Judatapas manan saqerparinqachu, Babilonia runakunan ichaqa suyunkuta Israelpa Ch'uya Diosnin contra huchawan hunt'aykachirqanku.

⁶¡Ayqekuychis Babiloniamanta! ¡Kawsanaykichispaq phawaychis! ¡Ama paypa huchan hawachu wañuychis! Kunanmi chayamun Señor Diospa aynita kutichinan, chaskikapunan kaqtapunin qopushan.

⁷Babiloniaqa qori qerun karqan Señor Diospa makinpi lliw pachantinta machachinanpaq. Suyukunan chay vinota ukyarqanku, yuyayninkutataq chinkachikapurqanku.

⁸Qonqayllan Babiloniaqa ñut'ukunankama urmaykapun. ¡Waqaychis paymanta! K'irinpaq balsamota apamuychis, qhaliyanmanpaschá.

⁹Hampiykuñan Babiloniata manan qhaliyanchu. ¡Hina kachun! Haku ripusun sapanka llaqtanchismankama, huchachasqa-kaynin sinchi hatun kasqanrayku.

¹⁰Señor Diosmi chaninchawanchis allin kashasqanchista, hakuchis Sionman yupakapusunchis Apu Señor Diosninchispa ruwasqanta willakunanchispaq.

¹¹Señor Diosmi Babiloniata thuniyta yuyaykun, chaymi Media suyu reykunata tanqarimurqan. Chayqa Señor Diospa ayni-kutichiyninmi pay yupaychana wasita imaymanata ruwasqankumanta. ¡Wach'inaykichista ñawch'iyachiychis! ¡Escudoykichista hoqariychis!

¹²¡Babiloniaq perqanman phawaykunanpaq banderata hoqariychis! ¡Waqaychaq soldadokunata askhata churaychis! ¡Qhawaqkunata churaychis! ¡Pakakunata ruwakuychis! Señor Diosmi yuyaykusqanta hunt'an, Babilonia runakuna contra nisqantan hunt'an.

¹³Babilonia, qanmi askha mayukunayoq kanki, askhataq qhapaq-kayniykipas, p'uchukayniykin chayamun, kawsanaykiq tukukuyninmi chayamun.

¹⁴Tukuy-atiyniyoq Señor Diosmi sutinrayku jurarqan: Langostata hinaraqmi phawaykuqniykita kachamusaq, paykunan atipasqasuykimanta takinqaku, nispa.

¹⁵Atiyniyninwanmi Señor Diosqa kay pachata ruwarqan, yachayninwanmi teqsimuyuntinta takyachirqan, yuyayninwanmi hanaq pachatapas mast'arirqan,

¹⁶kunununuq kunkanwanmi hanaq pacha unupas qaparin, hinantinmantan pacha phuyutapas sayarichin, paraqtinpas illapata t'oqyachin, waqaychasqa ukhumantan wayratapas horqomun.

¹⁷Lliw runataq mana yuyayniyoq uma muyusqakuna, qori ch'uyanchaq runaqa ídolo ruwasqanmantan uyanta mana maymanpas churayta atinchu, ídolo ruwasqanqa mana kawsaq q'otulla kasqanmanta.

¹⁸Mana imapaq valeq pukllana kasqanmi kanku, p'uchukay p'unchaypin Señor Diosqa chaykunata thunipunqa.

¹⁹Chaykunamantaqa Jacobpa Diosninqa huk hinapunin, paymi tukuy imaymanakuna kamaq, paymi Israelta paqarichirqan kaqnin kananpaq, Tukuy-atiyniyoq Señor Diosmi sutinqa.

²⁰Babilonia, qanmi ñoqaq q'asunay kanki, qanmi maqanakuypi maqanay kanki. Qanwanmi suyukunata q'asuni, llaqtakunatapas thunini.

²¹Qanwanmi caballota sillakuqnintawan q'asuni, carretakunata q'ewiqnintawan q'asuni.

²²Qanwanmi qharitapas warmitapas q'asuni, yuyaqtapas waynatapas q'asuni, maqt'atapas sipastapas q'asuni.

²³Qanwanmi michiqtapas uywatapas q'asuni, llank'aqtapas torokunatapas q'asuni, kamachikuqtapas atiyniyoqtapas q'asuni, nispan.

²⁴Señor Diosmi nin: Ñawiykichispa qhawashasqanmi Babiloniaman llapan runankunamanwan kutichipusaq Sionta llapa mana allin ruwasqankumanta, nispa.

²⁵Señor Diosmi nin: Yaw ñit'iykuq orqo, qan contran kani, lliw pachantin ñit'iqmi kanki. Makiywanpunin muchuchisqayki, ranramantan tanqaykamusqayki, ruphasqa orqomanmi tukuchisqayki.

²⁶Rumiykitaqa manapunin pipas munanqachu wasi teqsi ruwakunankupaqqa, wiñaypaqpunin purunyapunki, nispan nin Señor Diosqa.

²⁷Banderata suyuntinpi maywiychis, putututa suyukunapi tocaychis. Pay contra maqanakunankupaq suyukunata t'aqaychis. Contranpi waqyaychis Ararat suyuta, Mini suyuta, Azkenaz suyutawan. Hatun kamachikuqta churaychis soldadokunata kamachinanpaq, caballoyoqkunata kachaychis langostata hinaraq.

²⁸Pay contra maqanakunankupaq suyukunata t'aqaychis, Media suyuq reyninkunata, kamachikuqninkunata, oficialninkunata, llapan kamachisqanku suyukunatapas.

²⁹Babilonia contra Señor Diospa yuyaykusqanqa kaqllapunin kashan, paymi ch'inneqman tukuchinqa mana piqpa tiyanan suyuman, chayraykun hallp'aqa kuyurinraq t'ikrakunraq.

³⁰Babilonia soldadokunaqa manan maqanakapunñachu, kaq pukarankupin kapushanku. Kallpankun chiriyarqapun, warmi hinaraqmi tukurqapunku. Llaqta punkunkun lliw chhallusqa kapun, wasinkutan nina ruphaykapushan.

³¹Qati-qatiraqmi chaskikuna phawashanku, qati-qatiraqmi reyman willaqkuna rishanku: Llapantapunin llaqtanchista hap'ikapunku,

³²mayu chimpakunatapas hark'arqapunku, t'otorakunatapas kanarqapunku, soldadokunapas lliwmi llaksakunku, nispanku.

³³Israelpa Diosnin Tukuy-atiyniyoq Señormi nin: Babiloniaqa eranapaq allin sarusqa pampa hinan, ichhuna p'unchaypas chayamushanñan, nispa.

³⁴Jerusalén llaqtan nin: Babilonia rey Nabukodonosormi oqorqapuwarqan, pasaqtaraqmi llaksawarqan, ch'usaq p'ukuta hinan saqerpariwarqan. Qochapi hatun katari hinan oqorqowarqan, sumaq mikhunaywanmi saksaykurqan, chaymantataq aqturpariwarqan.

³⁵Sión llaqta nichun: K'iriwasqanmanta Babiloniaman kutichichun, nispa. Jerusalén llaqta nichun: Yawarninchismanta Babilonia runakuna pagachun, nispa.

³⁶Chayraykun Señor Diosqa paykunata nin: Ñoqaq chaninchasqaymi lloqsinkichis, awqaykimanmi aynita kutichisaq. Qochantaqa pasaqtan ch'akichipusaq, pukyunkunataqa lliwtan ch'akichisaq.

³⁷Chaymi Babiloniaqa raqay-raqay purunyapunqa, chaypin chacal nisqa animalkuna tiyanqa, Manan pipas chaypi tiyanqañachu, qhawarispan: ¡Ikiraqmi! ninqaku.

³⁸Llapankun león hinaraq qaparinku, uñankuna hinaraq ininininku.

³⁹Mikhunayaqtinkun hatun mikhunata wakichisaq, paykunatan machachisaq kusisqa kanankupaq, chaymantataqmi mana rikch'ariqllaña wiñaypaq puñupunqaku.

⁴⁰Hinan paykunata uywa nak'anaman apapusaq, borregotapas, cabratapas, ovejatapas apanku hinata, nispan nin Señor Diosqa.

⁴¹¡Imaynaraqmi Babiloniaqa hap'isqa kapun! ¡Imaynaraqmi pachantinpa mentasqan llaqtaqa hap'isqa kapun! ¡Imaynaraqmi Babiloniaqa llapaq llaksakunanman tukupun!

⁴²Qochan Babiloniata millp'urqapun, manchay phoqchiqeyninmi p'amparqapun,

⁴³llaqtankunaqa musphana ch'usaqmanmi tukupun, yanqa ch'aki aqo-aqomanmi tukupun, mana piqpa tiyasqanpas kanman hinamanmi tukupun, mana piqpa purisqanpas kanman hinamanmi tukupun.

⁴⁴Babiloniapin ñak'arichisaq Bel nisqa diosninta, aqtuchisaqmi lliw rakrasqanta, manañan payman suyukunapas hunt'aykunqañachu. Ñan thunikunña Babiloniaq perqanqa.

⁴⁵Llaqtalláy, chaymanta lloqsiy. Sapankaykichis wañuymanta ayqekapuychis, rawrashaqraq phiñakuyninmanta phawaychis.

⁴⁶Suyuntinpi rimay q'oñiriqtinqa, ama llaksakuychischu, amataq mancharikuychischu. Sapa wata hinan rimayqa q'oñirin, maqanakuymanta rimaykuna, kamachikuq pura hap'inakusqanmanta rimaykuna.

⁴⁷Cheqaqtapunin chayamunqa p'unchaykuna Babiloniaq idolonkunata ñak'arichinay. Lliw suyuntinmi k'umuchisqa kapunqa, ayawan tanqaykusqa kanqa.

⁴⁸Hanaq pachapas kay pachapas lliw imakunapas llapanmi kusikunqa Babilonia thunikuqtin, wichay ladomanta thuniq haykuykamuqtin.

⁴⁹Imaynan pachantinpi runakuna Babilonia hawa wañurqanku, kaqllataqmi Israel runakunata wañuchisqan hawa Babiloniapas urmallanqataq.

⁵⁰Señor Diosmi nin: ¡Qankuna wañuymanta ayqeqkuna ayqekapuychis ama sayaykuspa! Karupiña kaspaykichistaq Señor Diosmanta yuyariychis, Jerusalenmantapas yuyarillaychistaq, nispa.

⁵¹Paykunan ichaqa ninku: P'enqasqan kashayku k'amiwasqankurayku, khuyay p'enqasqan kashayku Señor Dios yupaychana wasiq Ch'uya Cheqasninkamaraq wak llaqtayoq runaq haykusqanmanta, nispa.

⁵²Señor Diosmi ichaqa nin: Chayamunqan huk p'unchay Babiloniaq idolonkunata muchuchinay, lliw suyuntinpi k'irisqakunaq waqaranan.

⁵³Cielokamaña Babiloniaqa wichaspa pukaranta perqanqa chaypas, kachaykusaqpunin pay contra thuniqta, nispan nin Señor Diosqa.

⁵⁴Nanaymanta qaparisqankun Babiloniamanta uyarikun, Babilonia runakunaq suyunmantan manchay thunikusqan uyarikun.

⁵⁵Chayqa Señor Diosmi Babiloniata thunishan, sinchi ch'aqwaynintan p'uchukapushan. Awqanmi qocha hinaraq phoqchiqeshan, phoqchiqeyninmi manchanatapuni uyarikushan.

⁵⁶Babilonia thuniqmi hamusqa, hap'irqapunkuñan soldadonkutapas, p'akirqarinkuñan p'eqtankutapas. Señor Diosqa huchamanta muchuchiq Diosmi, sapankamanpas tupaqnintapuni qoqmi.

⁵⁷Tukuy-atiyniyoq Señor Diosmi nin: Ñoqan macharqachisaq Babilonia suyuq umallinkunata, yachaysapankunata, kamachikuqninkunata, oficialninkunata, soldadonkunatapas, hinan mana hayk'aq rikch'ariq wiñaypaq puñupunqaku, ñoqa Reymi chaytaqa nini, ñoqan kani Tukuy-atiyniyoq Señor Diosqa.

⁵⁸Babilonia llaqtaq muyuriq ancho perqanpas pasaq pampa thunisqan kanqa, hatuchachaq punkunkunapas ninawan kanasqan kanqa, chay hinaqa yanqapaqmi suyukunaqa llank'arqanku, paykunaq sayk'uyninkuqa ninapin tukukun, nispa.

⁵⁹Maasiaspa churin Neriaspa churin Seriasqa Judá rey Sedekiaspa oficialninmi karqan, paypa ruwanantaq karqan reypa qorpachakunan wasi allichay. Sedekías Judapi kinsa wata kurakña kamachikushaqtinmi, Seraiasqa Sedekiasta Babiloniaman riysirqan, hinan Jeremiasqa huk willakuyta Seraiasman apachirqan.

⁶⁰Jeremiasqa huk qelqa k'uyupin qelqasqa Babiloniata llapan ima llakikunachus qatinanta.

⁶¹Seraiastataq nirqan: —Babiloniaman chayaspaykiqa, aman qonqankichu kay qelqata alto kunkapi leeyta.

⁶²Chaymantataq ninki: Señor Dios, qanmi nirqanki kay llaqtata thuninaykita, chay hinapi mana runapas uywapas kaypi tiyananpaq. Wiñaypaqmi kay cheqastaqa purunyachinki, nispa.

⁶³Kay qelqa leeyta tukuspaykitaq, rumiman wataspa Eufrates mayuman wikch'uykunki.

⁶⁴Hinaspataq ninki: Kay hinatan Babiloniaqa chinkaykapunqa, manapuniñan hatarimuyta atinqañachu Señor Diospa hatun llaki churasqanmantaqa, nispayki, nispa. Kaypin tukukun Jeremiaspa rimasqan.