Read Quechua Cuzco Bible 1988 JEREMÍAS 52 Bible Online

JEREMÍAS 52 - Quechua Cuzco Bible 1988 bible

JEREMÍAS 52

¹Sedekiasqa kamachikuyta qallarishaspan iskay chunka hukniyoq watayoq karqan, hinaspan chunka hukniyoq watata Jerusalenpi kamachikurqan. Mamanmi karqan Hamutal sutiyoq, Libna llaqtayoq Jeremiaspa ususin.

²Sedekiasqa manapunin Señor Diospa munayninman hinachu ruwarqan, aswanpas ñawpaq rey Joakimpa ruwasqanta hinan ruwarqan.

³Cheqaqtapunin Judá suyupi Jerusalenpiwan millay ruwasqanku Señor Diosta sinchita phiñachirqan, chay hawan Señor Diosqa ñawpaqenmanta paykunata wikch'upurqan. Sedekiasmi Babilonia rey contra hatarirqan.

⁴Chayraykun Sedekiaspa pusaq wata kamachikusqan chunka killaq chunka p'unchayninpi rey Nabukodonosorqa llapan soldadonkunantin Jerusalén contra puririmurqan. Ñawpaqenpi karpaykukuspankutaq mana ayqenanpaq hark'achita llaqtaq muyuriqninpi ruwarqanku.

⁵Paykunataq llaqtata muyuykusharqanku Sedekiaspa chunka hukniyoq wata kamachikunankama.

⁶Chay wataq tawa killanpa isqon p'unchayninpitaq llaqtapi aswan yarqay karqan, runakunaqpas manañan ima mikhunankupas karqanñachu.

⁷Chaypachan Babilonia soldadokuna llaqta perqata t'oqorqorqanku, chaymi Sedekiasqa soldadokunantin tuta ayqekapurqanku, hinaña awqa soldadokuna llaqta muyuriqpi kasharqanku chaypas. Reypa huertan qaylla iskaynin perqa tupay punkunta lloqsirqospanku, Jordán wayq'oman ayqekapurqanku.

⁸Paykunaq qhepanta phawarispanmi, Babilonia soldadokunaqa Jericó pampaman Sedekiasman tariparqorqanku. Llapan soldadonkunataq hinantinman ch'eqeripurqanku.

⁹Babilonia soldadokunataq reyta hap'irqospa Hamat suyupi Ribla llaqtapi kaq Babilonia reyman aparqanku. Chaypin rey Nabukodonosorqa kamachikurqan paypaq imachus kananta.

¹⁰Hinaspan pay kikin qhawakushaqtin churinkunata Judamanta llapan umallikunatapas nak'arqarichirqan.

¹¹Sedekiaspatañataq ñawinkunata horqochirqan, hinaspan bronce cadenawan watasqata Babiloniaman apachirqan. Chaypitaq kapurqan wañunankama.

¹²Babilonia rey Nabukodonosor chunka pusaqniyoq wata kurakña kamachikushaqtin, phisqakaq killaq chunka p'unchayninpi reypa guardiankunaq umallin Nabuzaradanqa Jerusalenman chayamurqan, payqa reypa yuyaychaqninmi karqan.

¹³Paymi kanaykurqan Dios yupaychana wasita, reypa wasinta, llapan allichachaqkunaq wasinta, llapan wakin wasikunatawan.

¹⁴Paywan kuska hamuq soldadokunataq Jerusalenpa muyuriq perqanta llapanta thunirqanku.

¹⁵Chaymantataq Nabuzaradanqa Babiloniaman kamachi-kaypaq apapurqan llaqtapi lliw qhepaq runakunata, wakin artesanokunata, Babilonia runakunaman chimpakapuqkunatawan.

¹⁶Wakin wakcha runakunallatan saqepurqan uvas chakrakunatapas hallp'akunatapas llank'anankupaq.

¹⁷Babilonia runakunataq Dios yupaychana wasipi broncemanta ruwasqa tusakunata, carretakunata, hatun qochatawan p'akispanku Babiloniaman aparqanku.

¹⁸Chaymantapas apallarqankutaq uspha mankakunata, palakunata, pábilo allichanakunata, puruñakunata, pocillokunata, Dios yupaychana wasipi broncemanta llapa kaqkunatawan.

¹⁹Guardiakunaq umallinpas apakullarqantaq lliw qorimanta, qolqemanta ruwasqa p'ukukunata, incienso q'osñichinakunata, puruñakunata, uspha mankakunata, candelerokunata, pocillokunata, vino ofrendapaq qerukunatawan.

²⁰Dios yupaychana wasipaq rey Salomonpa broncemanta ruwachisqan tusakuna, carretakuna, hatun qocha, qochaq tiyanan chunka iskayniyoq torokunapiwanmi sinchi llasallaña karqan mana pesay atiyraq.

²¹Iskaynin tusakunan karqan pusaq metro sayayniyoqkama, rakhunmantaq phisqa metro kuskan muyuriqniyoq, ch'usaq sonqoyoqtaq karqan, bronceq phatukaynintaq karqan tawa dedo.

²²Sapanka tusaq umantaq karqan broncemanta sumaq awasqapi granadakunawan k'achanchasqa.

²³Muyuriq awasqapitaq karqan pachak granadakuna, isqon chunka soqtayoqtaq kaqkama t'aqasqa karqan.

²⁴Guardiakunaq umallinmi apapurqan uma sacerdote Seraiasta, qatiqnin sacerdote Sofoniasta, Dios yupaychana wasiq punkunta qhawaq kinsa runakunatawan.

²⁵Llaqta runakunamantataq aparqanku soldadokunaq umallinta, reypa yuyaychaqnin qanchis runakunata, soldadopaq huñuq hatun kamachikuqta, soqta chunka runakunatawan.

²⁶Lliw chaykunatan Nabuzaradanqa Hamat suyupi Ribla llaqtapi kaq Babilonia reyman aparqan. Chaypin reyqa hasut'ichirqan, chaymantataq sipichipurqan. Ahinapin Judá runakunaqa suyunmanta apasqa karqan.

²⁸Nabukodonosorpa apasqan runakunan kaykuna karqan: Soqta wata kurakña kamachikushaspan Judamanta kinsa waranqa iskay chunka kinsayoq runata aparqan.

²⁹Chunka qanchisniyoq wata kurakña kamachikushaspataq Jerusalenmanta pusaq pachak kinsa chunka isqonniyoq runata aparqan.

³⁰Iskay chunka iskayniyoq wata kurakña kamachikushaqtintaq, Nabuzaradanqa Judamanta qanchis pachak tawa chunka phisqayoq runata aparqan. Llapanpitaq tawa waranqa soqta pachakniyoq runakuna apasqa karqan.

³¹Evil-merodakmi Babiloniapi kamachikuyta qallarisqan watapi Judá rey Joakinta carcelmanta horqorqan. Chaymi karqan kinsa chunka soqtayoq wata chunka hukniyoq killa iskay chunka phisqayoq p'unchayña kamachipaq apasqa kashaqtin.

³²Rey Evil-merodakqa Joakinta sumaqtan rimapayarqan, Babiloniapi kashaq wakin reykunamantapas aswan chaniyoqpaqmi qhawarirqan.

³³Ahinapin Joakinqa carcelpi p'achanta ch'utirparirqan, reywantaq mikhullaqpuni kawsanankama.

³⁴Babilonia reyqa Joakinman kawsananpaq hina qollaqpunin wañukapunankama.