Read Quechua Cuzco Bible 1988 JEREMÍAS 6 Bible Online

JEREMÍAS 6 - Quechua Cuzco Bible 1988 bible

JEREMÍAS 6

¹Benjamín ayllu runakuna, Jerusalenmanta ayqekuychis, pakakunata maskhakuychis, Tekoa llaqtapi waqra putututa tocamuychis, Bet-hakerem llaqtapi ninata q'osñichimuychis hatun mana allinmi wichay ladomanta qhawapayamushan, hatun manchana llakin hamushan.

²Sión llaqta, ¿manachu nirqayki: sumaq q'achuq wiñanan qhatan kanki, nispa?

³Michiqkunan ovejantinkama hamunku, muyuriqniykipin ch'ukllaykukunku, sapankan uywanta ñawpaqenpi michikun, chay hinan awqaqa.

⁴Paykunan ninku: ¡Llaqtawan maqanakunanchispaq wakichikusun! ¡Haku! ¡Kuskan p'unchayta phawaykusun! nispa. Chaymantan ichaqa ninku: ¡Ikiraqmi! Ch'isiyarqapunñan, llanthupas sinchitañan wikch'urqapun.

⁵Chay hinaqa, tutallaña phawaykusun. ¡Torrenkunatapas thunimusun! nispa.

⁶Tukuy-atiyniyoq Señor Diosmi kamachikun: Mallkikunata kumpaspa seqanata tawqakuychis Jerusalenman perqanta phawaykunapaq. Kay llaqtaqa muchuchinapaq nisqan kashan, sarunchaywan hunt'aykusqa kasqanrayku.

⁷Jerusalenmantan paqarimun millay ruwaykuna pukyumanta unu phullpumuq hinaraq. Chaypiqa millay ruwaywan maqanakuyllawanmi uyarikushan, chaypiqa nanayllawan k'iriyllawanmi rikukushan.

⁸Jerusalén llaqta, kayta uyariway, paqtataq qanmanta t'aqarikuyman, paqtataq raqay-raqayman tukuchiykiman, paqtataq mana runaq tiyanan suyuman tukuchiykiman, nispa.

⁹Tukuy-atiyniyoq Señor Diosmi nin: Israel runakunamanta puchuqta qhellapay uvas chakra qhellapaq hinaraq, huk kutimantawan k'allmankunamanta pallapay, uvas chakra pallapaq hinaraq, nispa.

¹⁰Ñoqataq nirqani: ¿Pitañataq nisaqri? ¿Piñataq uyariwanqa willaqtiyri? Señor Diosníy, paykunaqa mana ninriyoqmi kanku, manan uyarinkumanñachu. Willachiwasqaykiwanqa asikunkun, manan simiykita munankuñachu.

¹¹Ñoqapas kay llaqtapaq phiñakuyniykiwan hunt'aykusqan kashani, manan hina kakuymanchu, nispa. Señor Diosmi niwarqan: Callepi puriq erqekunaman phiñakuyniyta chayachiy, huñunasqa wayna-sipaskunamanwan chayachiy. Qharintin warmintinmi muchunqaku, yuyaqkunapas thultu yuyaqkunapas muchunqaku. Kay suyupi tiyaqkunata muchuchiqtiymi,

¹²wasinkupas, hallp'ankupas, warminkupas wak runakunaq kapunqa.

¹³Llapanmi hatunpas huch'uypas yuyaykunku yanqallanmanta qhapaqyayta, profetakunapas sacerdotekunapas q'otuqkunallan kanku.

¹⁴Llaqtaypa k'irintan patallanta hampipayanku: Allillanmi kanqa, nispa, llapanpas mana allinkama kashaqtin.

¹⁵¿Chay millay ruwasqankumantaqa p'enqakurqankuchu? Manan, manan yachankuchu imachus p'enqakuy kasqanta, manan uyallankupas pukayarirqanchu. Chayraykun paykunapas wakinkuna hina urmallanqataq, ñoqa muchuchiqtiyqa pasaqtan ch'inyapunqaku, nispan nin Señor Diosqa.

¹⁶Señor Diosmi nirqan: Ñan palqariypi sayaykuspa qhawarikuychis, ñawpa ñankunata tapurikuychis, mayqenchá allin ñan kasqanta tapurikuychis, chaynintataq puriychis, chaypin allin kawsayta tarinkichis. Qankunataq ichaqa nirqankichis: Manan chaynintaqa puriykumanchu, nispa.

¹⁷Qankunapaq qhawaqkunata churaspan nirqani: Pututu tocaytan makilla uyarinkichis, nispa. Qankunataq ichaqa: Manan uyariykumanchu, nirqankichis.

¹⁸Chaymi nini: Uyariychis, suyukuna, imachus llaqtaypi kananta rikuychis.

¹⁹Kay pacha, uyariy, kay llaqtamanmi hatun llakita apamusaq, millay mana chanin yuyaykusqankuq rurunta, paykunaq manapuni kasuwasqankumanta, yachachisqayta pisichasqankumantawan.

²⁰¿Imapaqñan qankunaqa Sabá suyumanta inciensotapas apamuwankichis? ¿Imapaqñan karu suyumanta misk'i cañatapas apamuwankichis? Ñoqaqa manan munaniñachu sacrificio ruphachimusqaykichistapas, manallataq wakin ofrendakunatapas, nispa.

²¹Chayraykun Señor Diosqa nin: Kay llaqtataqa misk'achispan urmachisaq. Taytantin churintinmi urmaykapunqaku, wasimasintin reqsinakuq-masintinmi kuskapacha wañupunqaku, nispa.

²²Señor Diosmi nin: ¡Qhawariychis! Askha runan wichay llaqtamantapacha hamushan, sinchi atiyniyoq llaqtan karu suyumantapacha q'epichakamushan.

²³Armankuqa p'eqtakunawan espadakunawanmi, awqa sonqo mana khuyapayakuqmi kanku, chay runakunaq caballonkuq sarusqanqa mama qochaq phoqchiqeynin hinaraqmi uyarikun. Sión llaqta, qanwan maqanakuq hinallañan kashan, nispa.

²⁴Jerusalenpi runakunataq nishanku: Huk willakuytan yacharqoyku, manchakuymantan kallpaykuraq chiriyarqapun, sinchitapunin llakikuymanta nanachikushayku wachakuy nanayniyoq warmi hinapuni.

²⁵¡Amaña hawata lloqsiychischu, amaña ñantapas puriychischu! Awqaykichismi armantinña kashan, manchakuywan muyuykusqan kashanchis, nispa.

²⁶Ñoqataq nini: Llaqtalláy, luto p'achawan llakikuymanta p'achakuychis, usphaman qhospaykuychis. Yana p'achawan p'achakuspa, sapan wawamanta hina waqaychis, thuniqqa qonqayllan phawaykamuwasun, nispa.

²⁷Señor Diosmi niwarqan: Ñoqan llaqtayman churayki qori ch'uyanchaq hina qolqe akllaq hina, llaqtayta imaynachus kasqanta yachanaykipaq, nispa.

²⁸Ñoqataq nirqani: Señor Diosníy, llapankun millay mana kasukuqkama kanku, simi apa waqllisqa runakunaraqtaqmi kanku, mana “¡Achachaw!” niqmi kanku, fierro hinan, bronce hinan kanku.

²⁹Kallpawan phukuna phukuriqtinpas manan qolqeq akanqa titiwanpas unuyanchu. Yanqanpaqmi llaqtay ch'uyanchaytaqa yuyasqani, millay runakunaqa manapunin chinkankuchu.

³⁰Aswanmi: Qolqeq akan, nispa, nisunman, qan paykunata wikch'upusqaykirayku, nispa.