Read Quechua Cuzco Bible 1988 JEREMÍAS 7 Bible Online

JEREMÍAS 7 - Quechua Cuzco Bible 1988 bible

JEREMÍAS 7

¹Señor Diosmi Jeremiasta nirqan:

²Ñoqa yupaychana wasi punkupi sayaykuy, hinaspa kay willakuyta willay: Señor Diosta yupaychaq haykuq llapan Judá runakuna, Señor Diospa siminta uyariychis.

³Israelpa Diosnin Tukuy-atiyniyoq Señormi nisunkichis: Kawsayniykichista allinman t'ikraychis, chaymi hinallata kay hallp'api tiyachisqaykichis.

⁴Amaña k'askakuychischu chay q'otukuqkunamanqa, paykunan yanqalla ninku: ¡Kayqa Señor Dios yupaychana wasi! ¡Kayqa Señor Dios yupaychana wasi! ¡Kayqa Señor Dios yupaychana wasi! ¡Allinmi kashanchis! nispa.

⁵Kunan imachus ruwasqaykichista allichaychis, hukkuna hukkunawan chaninta ruwanakuychis.

⁶Ama sarunchaychischu wak llaqtayoqkunata, mana tayta-mamayoqkunata, viudakunatapas. Ama mana huchayoq runata wañuchiychischu. Ama wak dioskunata yupaychaychischu, chaykunallan mana allintaqa ruwashasunkichis.

⁷Kasukuqtiykichisqa machulaykichisman qosqay hallp'api tiyakullankichismi.

⁸¡Qhawariychis! Qankunaqa llullakuspa rimasqallamanpunin k'askakunkichis.

⁹Suwakunkichis, runata wañuchinkichis, wachuq huchata ruwankichis, ñoqaq sutiyta yanqa qasi hoqarinkichis, Baal nisqa diosniykichisman sacrificiota ruphachinkichis, mana reqsisqaykichis dioskunata yupaychankichis.

¹⁰Chaymantataq qankunaqa wasiymanpas ñawpaqeymanpas hamuspa ninkichis: Manan imapas kawasunchu, nispa. Chaywanpas cheqnikusqay ruwanakunallatan ruwayta yuyashankichis.

¹¹¿Qankunaqa yuyankichischu ñoqa yupaychana kay wasiqa suwaq pakanan t'oqo kananpaq? Ñoqaqa llapantan rikurqani ima ruwasqaykichistapas.

¹²Huk cheqastan Silo llaqtapi akllakurqani chaypi yupaychawanaykichispaq, chay cheqasta rispaykichis Israel llaqtaypa mana chanin ruwasqanmanta imatachus ruwasqayta rikumuychis.

¹³Hinaña kuti-kutirispa nirqaykichis ruwasqaykichismanta chaypas, qankunaqa manapunin uyariqpas tukurqankichischu,

¹⁴chaymi imaynatachus Silopi yupaychana wasita ruwarqani, chay hinallatataq ruwasaq qankunaq hap'ipakusqaykichis yupaychana wasitapas. Kayqa wasiymi, ñoqan qorqani machulaykichisman qankunamanwan.

¹⁵Qankunatapas ñawpaqeymanta qarqopusqaykichismi imaynan ñawpaqeymanta wawqeykichis Efraín mirayta qarqorqani hinata, nispa, nispan.

¹⁶Señor Diosmi niwarqan: Qan Jeremiasqa, aman mañapunkichu kay llaqtapaq, aman pituchakuwankichu, amallataq paykunamantaqa valekuwankipaschu. Amapuniñan: Hinatayá, niwankiñachu. Ñoqaqa manan uyarisqaykiñachu.

¹⁷¿Manachu rikunki Judá llaqtapi Jerusalenpa callenkunapipas ruwasqankuta?

¹⁸Erqekunan llant'ata pallamunku, taytankutaq ninawan kananku, warminkutaq masata q'apispanku tortata ruwanku. Hanaq Pacha Qoyaman haywanankupaq. Chaymantapas paykunaqa wak dioskunamanmi vino ch'uyata haywanku ñoqata phiñachiwanankupaq.

¹⁹Chay ruwasqankuri, ¿ñoqatachu muchuchiwan? ¡Manan! Paykuna kikillankutaqmi muchunku, chaymi p'enqaypi rikukunku.

²⁰Chayraykun ñoqa Qollana Señor Diosqa k'arak phiñakuyniyta ñoqa yupaychana wasiman chayachisaq, kaqllataq runakunamanpas, uywakunamanpas, mallkikunamanpas, chakra llank'asqankumanpas. Phiñakuyniyqa rawrarinqa mana piqpa thasnuy atinantan, nispa.

²¹Israelpa Diosnin Tukuy-atiyniyoq Señormi llaqtanta nin: ¡Phawaychis! Ruphachina sacrificioykichisman wakin sacrificioykichista yapaykuspa mikhukampuychis, manan imapas qokuwanchu.

²²Egiptomanta machulaykichiskunata horqomuspayqa, manan ima nillarqanipaschu ruphachina sacrificiomantapas wak ofrendakunamantapas.

²³Aswanpas ñoqaqa kamachirqanin: Ñoqata kasuwaychis, ñoqan Diosniykichis kasaq, qankunataq llaqtay kankichis. Llapa kamachikuyniyman hina puriychis, chay hinapin allillan kasunkichis, nispay.

²⁴Paykunan ichaqa mana kasuwarqankuchu, manataq uyariwarqankupaschu, aswanmi paykunaqa millay mana chanin sonqonkuq kamachinta ruwarqanku, ñawpaqman rinankutaqa qhepamanmi aswanta kutirqanku.

²⁵Egiptomanta machulaykichiskunaq lloqsimusqanmanta kunankaman qankunaman kamachiy profetakunata mana p'itiyta kachamurqaykichis,

²⁶qankunataq ichaqa mana uyarpariwarqankichischu, manallataq kasuwarqankichispaschu, machulaykichiskunamantapas aswan rumi sonqomanmi tukupurqankichis, nispa.

²⁷Jeremiastataq nirqan: Paykunamanmi tukuy chaykunata ninki, manan uyarisunkikuchu. Qanmi waqyanki, manataqmi kutichimusunkikuchu.

²⁸Chaymi paykunaman ninki: Qankunaqa Apu Señor Diosniykichistapas mana uyariq suyun kankichis, wanachisqantapas manan chaskirqankichischu. Hunt'aq-kayqa chinkapusqan, chaytaqa manañan rimakullasqapaschu, nispayki, nispa.

²⁹Jerusalén llaqta, llakikuymanta phutikuy, chukchaykita rutukuspa wikch'uy, ch'in nisqa orqokunapi waqay-waqayta harawimuy, llaqtayki runapaq Señor Diospa phiñakuspa wikch'upuspa qonqarparisqanmanta, nispa.

³⁰Señor Diosmi nin: Judá runakunan ñawpaqeypi millay mana munasqayta ruwarqanku, cheqnikusqay idolokunata wasiyman churaykuspan qhellicharqanku.

³¹Ben-hinom wayq'opipas Tofet nisqa yupaychana cheqastan ruwarqanku qharitaraq warmitaraq wawankuta chaypi ruphachinankupaq. Manan hayk'aqpas chay ruwaytaqa kamachirqanichu, manapunin yuyallarqanipaschu chaytaqa.

³²Chayraykun huk p'unchay chayamunqa, hinan chay wayq'ota manaña: Tofet, ninqakuchu, manallataq: Ben-hinom Wayq'o, ninqakupaschu, aswanmi ninqaku: Runa Sipina Wayq'o, nispa. Chay Tofetpin ayankunata p'ampanqaku, mana huk cheqasllapas qasi kanankama.

³³Chay ayakunatataqmi ankakuna salqa animalkunapiwan mikhupunqaku, manataqmi pillapas hark'akuq kanqachu.

³⁴Hinan Judá llaqtakunamanta Jerusalén callekunamantawan kusikuyta, q'ochukuyta casarakuypi qhaswaykunatawan chinkachisaq. Suyuntintan purun-purunman tukuchipusaq.