Read Quechua Cuzco Bible 1988 JEREMÍAS 8 Bible Online

JEREMÍAS 8 - Quechua Cuzco Bible 1988 bible

JEREMÍAS 8

¹Chay p'unchaykunan aya p'ampanamanta tullukunata hasp'irqarinqaku, Judá reykunaq tullunta, uma runakunaq tullunta, sacerdotekunaq tullunta, profetakunaq tullunta, Jerusalenpi tiyaqkunaq tulluntapas.

²Hinaspan intiq ñawpaqenpi, killaq ñawpaqenpi, llapa ch'askakunaq ñawpaqenpiwan chay tullukunata wisñinqaku. Chay runakunaqa intita, killata, ch'askakunatawanmi munakusqaku, servisqaku, qatikusqaku, tapukusqaku, yupaychasqaku ima. Manapunin pillapas chaykunaq tulluntaqa wakmanta p'ampanqakuchu, hinallan kapunqa hallp'aq wanunpaq.

³Chay millay suyu runakunamanta puchuqqa maymanña ch'eqechisqaypipas kawsananmantaqa wañuytan astawan mañakunqaku. Ñoqa Tukuy-atiyniyoq Señor Diosmi chayta nini, nispa.

⁴Qan, Jeremías, kayta llaqtaman willaykuy: ¿Manachu huk runa kumpakuspaqa wakmanta sayarin? ¿Manachu ñanta pantaspaqa kaq ñanman kutimun?

⁵Chay hinari, llaqtalláy, ¿imanaqtintaq qhepaman kutinki, mana ñoqaman kutirimuspa? Qankunaqa waktasqaykichistan q'otukuyman k'askakunkichis, manapuni ñoqaman kutimuyta munaspa.

⁶Makillan uyarimusharqani, manataqmi pillatapas uyarirqanichu mana chanin ruwasqanmanta llakikuywan: ¿Imatataq kaytari ruwarqani? nishaqta. Llapallanmi ñanninkuta phawashanku, maqanakuyman phawaykuq caballo hina.

⁷Cigüeñapas yachanmi hayk'aqchus wak llaqtaman rinanta, kullkupas, khallwapas, ch'ayñapas yachankun hayk'aqchus wak cheqasman rinankuta. Qanmi ichaqa, llaqtalláy, mana yachankichu kamachikuy simiykunata.

⁸¿Imaynataq qankunari ninkichis: Yachaysapan kayku, Señor Diospa kamachikuynintapas hap'ishaykun, nispa? Qhawariychis, kamachikuy qelqa yachaqkunan llullakuspa waqllichirqanku.

⁹Yachayniyoq runakunan p'enqachisqa kanku, k'allpaman urmaykuq animal hinan llaksasqa kanku. Qhawariychis, paykunaqa simiytan pisicharqanku, chay hinari, ¿maytaq yachayniyoq kasqanku?

¹⁰Chayraykun warminkutapas wak qharikunaman qoykapusaq, hallp'ankutapas wak runaman qoykapusaq. Llapanmi hatunpas huch'uypas yuyaykunku yanqallanmanta qhapaqyayta, profetakunapas sacerdotekunapas q'otuqkunallan kanku.

¹¹Llaqtaypa k'irintan patallanta hampipayanku: Allillanmi kanqa, nispa, llapanpas mana allinkama kashaqtin.

¹²¿Chay millay ruwasqaykichismanta p'enqakurqankichischu? ¡Manan! Manan yachankichischu imachus p'enqakuy kasqanta, manan uyallaykichispas pukayarirqanchu. Chayraykun qankunapas wakinkuna hina urmallankichistaq, ñoqa muchuchiqtiyqa pasaqtan ch'inyapunkichis. Señor Diosmi chayta nin, nispayki.

¹³Señor Diosqa nillantaqmi: Llaqtaytan trigota hina ichhusaq, chaymi mana k'atay ruruyoq uvas yura hina kapunqa, mana k'atay higosniyoq higos sach'a hina kapunqa, aswantaraqmi raphinkunapas ch'akiykapunqa. Chayraykun wak llaqtayoq runakunaman kaqninkupaq qopusaq, nispa.

¹⁴Runakunataqmi ninku: ¿Imapaqñan kayllapi tiyashankichis? Huñuykukuspa hakuchis allin perqayoq llaqtakunaman, chaypi wañukapunanchispaq. Apu Señor Diosninchismi wañuyman hap'iykachiwanchis, venenotan ukyaykachiwanchis, pay contra huchallikusqanchismanta.

¹⁵Suyakurqanchismi allin kawsayta, manataq ima allin kawsaypas kawarqanchischu, qhaliyaytan suyakurqanchis, q'aqchakuytaq taripawarqanchis.

¹⁶¡Awqanchisqa ñan hamushanña! Danmantapachan caballonpa samaqesqanpas uyarikushanña, caballon waqariqtinpas kay pacharaqmi kuyurishanña. Kay suyuta kaqninkunatawan thuniqñan hamushanku, llaqtakunata llapan chaypi tiyaqkunatawan thuniqñan chayamushanku, nispa.

¹⁷Señor Diosmi nillantaq: Yawkuna, wañuchikuq mach'aqwaytan qankuna contra kachamushani, manan pipas chay hark'ayta atinqachu, chay mach'aqwaykunaqa k'utusunkichispunin, hinan wañunkichis, nispa.

¹⁸Hatun llakin ñit'iykuwan, sonqoypas phatarqoshawanñan.

¹⁹¡Uyariychis! Hinantin suyupin uyarikushan llaqtaypa nanaymanta qaparisqan: ¿Sionpiri manañachu Señor Dios kapun? ¿Reyninpas manañachu chaypi kapun? nispa. Reyninku Señor Diosmi kutichimun: ¿Imapaqtaq phiñachimuwankichis idolokunata yupaychaspaykichis? ¿Imapaqtaq phiñachimuwankichis mana valeq dioskunata yupaychaspaykichis? nispa.

²⁰Llaqtaymi qaparillantaq: Chiraw mitan tukukapun, mikhuy hoqariytapas tukuykuñan. ¡Noqanchisqa manan qespichisqapunichu kanchis! nispa.

²¹Llaqtaypa muchusqanwanmi muchushani, llaqtaymantaqa wañuqniyoq hinaraqmi kashani, sinchi khuyayllañan kashani.

²²¿Manapunichu ima hampillapas Galaad hap'iypi kanman? ¿Manapunichu pillapas chaypi hampiykuq kanman? Chay hinari, ¿imanaqtintaq llaqtayqa manapuni qhaliyanchu?