Read Quechua Cuzco Bible 1988 JEREMÍAS 9 Bible Online

JEREMÍAS 9 - Quechua Cuzco Bible 1988 bible

JEREMÍAS 9

¹¡May kusachá ñawiyqa pukyu hina kanman, waqaypas unu hinaraq phawamunanpaq! Llaqtaypi wañuqkunamantan tuta p'unchay mana thanispa waqayman.

²¡May allinchá ñoqapaq kapuwanman ch'inneqpi huk cheqas qorpachakunaypaq, llaqtaymanta ripuspay paykunamanta karunchakunaypaq! Llapankun wasanchaqkuna kanku, paykunaqa hap'iykachiq t'aqakunan kanku.

³Qallunkuqa wach'inapaq p'eqta hinan llullakuyta wach'inanpaq kashan. Suyupiqa llullakuymi q'oñirishan, cheqaq-kaytaq mana kapunñachu. Aswan-aswantan mana allinwan laykuykakapunku, Señor Diostaqa manataq reqsinkuchu.

⁴Reqsinakuq-masiykipipas aman suyakunkichu, wawqeykimanpas aman hap'ipakunkichu, wawqe pura q'otunakusqanku hawa reqsinakuq purapas q'awinakusqankurayku.

⁵Hukmanta hukmi q'otunakunku, manataq pillapas cheqaq rimaq kanchu. Llullakuytan aswanta yachaykapunku, waqlliykapunkun, manan t'ikrakunkumanñachu.

⁶Paykunaqa mana allintakamallañan ruwanku, paykunaqa q'otuytakamallañan q'otunku, paykunaqa manapunin Señor Diostaqa munankuñachu.

⁷Chayraykun Tukuy-atiyniyoq Señor Diosqa nin: ¿Imatañataq astawan ruwayman llaqtaywanqa? Paykunataqa qori ch'uyanchaq hinan ninapi ch'uyanchasaq.

⁸Qallunkuqa wañuchiq flechan, rimankuqa llullakuyllatan. Reqsinakuq-masinkutan tukuy sonqowan napaykuq tukunku, huk hinamantataq misk'anata churashanku.

⁹¿Chay ruwasqankumantaqa manachu muchuchiyman? ¿Manachu tupaqninta chay hina millay llaqtaman qoyman, nispan nin Señor Diosqa.

¹⁰Ñoqataq nirqani: Waqasaq orqokunamanta, harawisaq purun pastokunamanta, chay ruphaypa tuntichisqan pasto cheqastaqa manan pipas purinñachu, manataqmi uywakunaq waqasqanpas uyarikunñachu. Salqa uywakunapas phalaq animalkunapas lliwmi ayqekapunña, nispa.

¹¹Señor Diosmi nillantaq: Jerusalentaqa raqay-raqaymanmi tukuchisaq, chacal nisqa animalkunaq tiyanan t'oqoman. Judapi llaqtakunatapas purunyachisaqmi, mana ch'ulla wasiyoqmi kapunqa, nispa.

¹²Ñoqataq tapurqani: ¿Pitaq allin yuyayniyoq kanman chaykunata sut'inchananpaq? ¿Pimantaq Señor Diosqa chayta sut'incharqan hukkunaman willananpaqri? ¿Imanaqtinmi kay suyuqa purun-purun kashan? ¿Imanaqtintaq tuntillaña mana piqpa chayanan kashan? nispa.

¹³Señor Diostaq nirqan: Llaqtay runakunaqa yachachikuy simiykikunatan wikch'upurqanku. Paykunaqa manan kasuwarqankuchu, manataq munasqaytapas ruwarqankuchu.

¹⁴Paykunaqa sonqonkuq kamachisqantan ruwarqanku, Baal nisqa diosninkuta yupaychaspanku, imaynachus taytankuq yachachisqanman hina.

¹⁵Chayraykun ñoqa Israelpa Diosnin Tukuy-atiyniyoq Señorqa kayta ruwasaq: Chay runamanmi ajenjota mikhuchisaq, venenota ukyachisaq.

¹⁶Machulankuqpas paykunaqpas mana reqsisqanku suyumanmi ch'eqerparichisaq, qatiykachachisaqtaqmi espada hap'intin runawan, llapankuta wañuchispa tukunankama, nispa.

¹⁷Tukuy-atiyniyoq Señor Diosmi nirqan: Yawkuna, waqyamuychis waqaqpaq churasqa warmikunata, pusachimuychis yupakuy yachaq warmikunata, nispa.

¹⁸Llaqtataq nirqan: Arí, usqhayllatapuni hamuchunku ñoqanchismanta qaparkachanankupaq, ñawinchismanta waqay sut'umunankama, qhechimiranchistaraq waqaywan wasapachinankama.

¹⁹Sionmantapachan uyarikamun nanaymanta anananasqanku: ¡Imay sonqoraqmi raqay-raqaypi rikukunchis! ¡Ima p'enqaypin tukukunchis! ¡Llaqtanchistachá saqepusunchis, wasinchiskunapas lliwñan raqay! nispa.

²⁰Ñoqataq nirqani: Warmikuna, uyariychis Señor Diospa nisqanta, allinta uyariychis willakamusqanta. Ususiykichiskunamanpas yachachiychis llakiy waqayta, warmi-masiykichismanpas yachachiychis waqay harawita.

²¹Wañuymi wasinchiskunaman haykumun, qhapaq wasinchismanpas haykumun. Callekunapin wawakunata sipirashan, plazakunapitaq wayna-sipaskunata wañurachishan.

²²Runaq ayankunallan wikch'u-wikch'u kapushan, pampakunapi wañuq hinaraq, ichhuqpa qhepanpi qhella usuq hinaraq, manataq pillapas hoqariq kanchu. Chay hinatan Señor Diosqa niwan, nispa.

²³Señor Diosmi nillarqantaq: Yachayniyoqqa yachayniyoq kasqanmanta ama umata hoqarichunchu, atiyniyoqpas atiyniyoq kasqanmanta ama hatunchakuchunchu, qhapaqpas qhapaq kasqanmanta ama alabakuchunchu.

²⁴Pipas uma hoqariyta munan chayqa, umata hoqarichun ñoqa reqsiwasqanmanta, ñoqapuni Señor Diosqa kasqayta yachasqanmanta. Ñoqa Señor Diosmi kani mana p'itiy munakuqqa, kay pachapi chaninchaqpas kuskachaqpas, chaytapunin ñoqaqa munani, nispan nin Señor Diosqa.

²⁵Señor Diosmi nirqan: Chayamushanñan llapan aychallanpi señalasqa runakunata ñak'arichinay.

²⁶Ñoqaqa ñak'arichisaqmi Egipto suyuta, Judá suyuta, Edom suyuta, Amón suyuta, Moab suyuta, llapan ch'inneqpi tiyaqta, ch'ipu chukchan rutukuq llapa runatawan. Llapan chay suyu runakunapas Israel runakunapas hinaña aychankupi señalasqa kanku chaypas, mana kasukuq sonqoyoqmi kanku, nispa.