Read Quechua Cuzco Bible 1988 LAMENTACIONES 1 Bible Online

LAMENTACIONES 1 - Quechua Cuzco Bible 1988 bible

LAMENTACIONES 1

¹¡Imaraqmi Jerusalenqa sapan kapushan haqay hina askha runayoq llaqta! ¡Imaraqmi viuda warmi hina kapushan lliw suyukunaq uman kashaqqa! Mit'anipin llank'apakushan lliw llaqtakunaq ñust'an kashaqqa.

²Sapa tutan unuy-parata waqaykushan uyapas p'aspay-p'aspallaña. Llapan munaqninkunamanta manan hukllapas kanchu sonqochaykuqnin. Llapan reqsinakuq-masinkunapas manan rikuqpas tukupunkuchu, llapanmi awqan churaykakapunku.

³Judá runakunan kamachi-kayman apasqa kanku chaypin sinchita llank'aspa muchushanku. Hinantin suyukunapi tiyaspan manaña samaytapas tarinkuñachu. Hatun sasachaypa ñit'iykusqan kashaqtinmi, qatiykachaqninkuna tariparqanku.

⁴Sionman rina ñankunapas llakiy-llakiymi kapushan, fiestamanqa manan pipas Dios yupaychaq rinñachu. Llaqta punkukunapas ch'usaqmi kapushan, sacerdotekunan: ¡Ikiraqmi! ¡Imaraqmi! nishanku, sipaskunan llakiraykukushanku, Jerusalentaqmi simipas hayallaña kaykushan.

⁵Awqankunan Jerusalenta munaychakapushan, hinaspan llakhilla kapushan. Señor Diosmi paytaqa phutichin sinchi askha huchallikusqanmanta. Wawankunan apasqa rikukapun awqankuq kamachipaq apasqan.

⁶Sionpa k'acha-kayninmi chinkarqapun. Uma runankunapas q'achuta mana tariq taruka hinan purishan, chakinta aysaspallan chakuqninpa ñawpaqenta ayqeshan.

⁷Llaki-phutiypi tumaqayasqanpi rikukuspanmi Jerusalenqa chayraq yuyarin ñawpa sumaq-kayninta. Awqanpa makinman urmaykuqtinmi, mana pillapas yanapaykuqnin karqanchu. Awqankunapas payta rikuspan thunikusqanmanta asipayarqanku.

⁸Sinchitapunin huchallikurqan Jerusalenqa chaymi qhellillaña kapushan. Allin rikuqninkunan kunanqa pisichapunku, warmi-kaynintan rikurqapunku. Chaymantan payqa waqashan, p'enqakuymantan kutirikapullanña.

⁹Qhellichakusqanqa lliwpa rikunanmi karqan, ichaqa manan yuyarqanchu imaynachus kananta. ¡Imaynapipunin urmaykurqanqa! ¡Manan pipas sonqochaqnin karqanchu! Paytaq waqyakun: ¡Qhawariway, Señor Diosníy, k'umuchisqa kasqayta, awqaymi atipapuwan! nispa.

¹⁰Awqanmi kaqnichaykakapurqan Jerusalenpa llapan qhapaq-kayninkunata. Jerusalenmi rikurqan yupaychana wasiman wak suyu runakunaq haykusqanta, Señor Diospa llaqtanwan huñukunanta hark'asqan runakunaq haykusqanta.

¹¹Waqaykukuspan llapa runakuna mikhunata maskhashanku, qhapaq-kayninkutan mikhunawan chhalarqapunku chaywan kawsanankupaq. Jerusalentaq waqyakun: ¡Señor Diosníy, qhawariway! ¡Khuyapayaway pisichasqa kasqayta! nispa.

¹²Qankuna kay ñanninta puriqkuna, ¿manachu imapas qokusunkichis kay nanayniymanta? Qhawariychis hinantinta, ¿kanchu pillapas ñoqa hina ñak'ariq? ¡Señor Diosmi kachaykuwarqan kay llakiwan phiñakuynin rawrariqtin!

¹³Hanaqmantapacha Señor Diospa kachaykamusqan ninan tulluykamaraq haykun. Urmanaypaqmi llikata churarqan, qhepamanraq kutichiwarqan. Sapaytan wikch'urpariwarqan, nanayllapipunin kashani.

¹⁴Señor Diosmi huchayta yuparqan, pay kikinmi huchayta wataykurqan kunkaymantaq warkuykurqan, chay hinapin kallpay chiriyarqan. Señor Diosmi hap'iykachiwarqan mana atipay atinay runakunaq makinman.

¹⁵Señor Diosmi qarqorqan llapan soldadoykunata, phawaykunawanpaqmi soldadokunata apamurqan allichachaq waynakunata ch'usaqyachinanpaq. Señor Diosmi Judá llaqtata t'usturqapurqan vino horqonankupaq uvas t'ustuq hinaraq.

¹⁶Chayraykun pasaqtapuni waqani, ñawiypas weqe hunt'aykusqallañan kashan. Manan piniypas kanñachu sonqochaqniy, manan piniypas kanñachu kallpachaqniy. Wawaykunan raqay-raqaypi rikukun, awqay ñoqata atipawasqanrayku.

¹⁷Sión llaqtan makinta haywarikun valepakuspa, manataq pillapas sonqochaqnin kanchu. Señor Diosmi unancharqan Jacobpa llaqta-masinkuna awqan tukunanta, llaqta-masinkunapaqmi Jerusalenqa mana serviq qhelli kapurqan.

¹⁸Señor Diosqa chaninpunin, ñoqataq kamachikuyninta p'akirqani. Llapa llaqtakuna uyariychis, nanayniyta qhawariychis. Wayna-sipasniykunapas lliwmi kamachipaq apasqa kapurqan.

¹⁹Munaqniykunaq yanapawanantan waqyakurqani, paykunataq ichaqa yanqalla q'otuykuwarqanku. Sacerdoteykunan kurak runaykunapiwan kikin llaqtapi wañupurqanku, kawsanankupaq mikhunata maskhashaspanku.

²⁰¡Señor Diosníy, llakikuyniyta qhawariy! Sonqoyraqmi phatatatashawan, nanaymi sonqoyta k'iriykuwan, sinchi mana kasukuq kasqaymanta. Hawapi espadaqa runatan sipirashan, kay ukhupipas wañuyllataq kashan.

²¹Runakunan anchisqayta uyariwarqan, manataqmi sonqochaqniyqa pillapas kanchu. Lliwmi awqaykunaqa yacharqan khuyay muchusqayta, kusikunkutaqmi qanpa ruwasqaykimanta. ¡Unanchasqayki p'unchayta chayachimullayña hinaspa paykunapaqpas ñoqapaq hina kachun!

²²Huchachay paykunata lliw mana allin ruwasqankumanta, taripay huchankumanta ñoqata ruwawarqanki hinata. Pasaqtapunin ñoqaqa anchishani, sonqoypas k'irisqallañan.