Read Quechua Cuzco Bible 1988 LAMENTACIONES 2 Bible Online

LAMENTACIONES 2 - Quechua Cuzco Bible 1988 bible

LAMENTACIONES 2

¹Señor Diospa phiñakuyninqa sinchipunin kasqa, Siontapas tutayachipurqanraqmi. Israelpa ancha sumaq-kaynintan Señor Diosqa pampaman wikch'upurqan. Phiñakuspaqa manapunin yuyarirqanchu chakinpa samanan Siontapas.

²Señor Diosqa mana khuyapayaykuspan Jacobpa wasinkunata mana ch'ullayoqta thunirqapurqan. Phiñakuspallaraqmi thunirqapurqan Judapa allin perqasqa llaqtankunata. Suyuta kamachiqninkunatawan p'enqachispa huch'uyyachirqan.

³Phiñakuynin rawrariqtinmi, Israelpa llapa atiyniyoq kayninta kuchurparirqan. Payqa manañan yanaparqanchu awqan qayllaykamushaqtin. Jacobtan ruphaykapurqan lliwta q'olaq nina hina.

⁴Señor Diosqa awqankunapas kanman hinan wach'inata allinta hap'iykurqan. Kaq awqallankupuni atiyninwan wañuchirqan allinpaq hap'isqanku llapa runakunata. Phiñakuyninpas nina hinaraq Sión llaqta contra rawrarirqan.

⁵Awqa hinan Señor Diosqa Israelta thunirqapurqan, lliw qhapaq wasinkunatapas k'upaykapurqan, pukarakunatapas thunirqapurqan. Sumaq Judamanmi hunt'aykachirqan llaki pataman aswan llakitaraq.

⁶Huertata hinan yupaychana wasita thunirqapurqan, huñunakuna cheqastapas thunirqapurqan. Señor Diosmi fiestakunatapas samana p'unchaykunatapas Sionpi p'uchukachipurqan. K'arakta phiñakuspanmi reytapas sacerdotetapas qarqopurqan.

⁷Señor Diosqa altarnintapas manan munapurqanchu, yupaychana wasintapas saqerparipurqanmi. Awqakunamanmi hap'iykachipurqan allichachaq wasinkunaq muyuriq perqantapas. Señor Dios yupaychana wasipin awqakuna ch'aqwarashan Señor Dios yupaychay fiesta p'unchay hinaraq.

⁸Señor Diosmi yuyaykurqan sumaq Sionta muyuriq perqan thuniyta, allinta tupuspan hukpaqkama thunirqan. Perqa hawantan ukhuntawan q'asarqan, llapantan raqay-raqayman tukuchirqan.

⁹Punkunkunapas lliwmi chinkaykapurqan, punku chakakunapas lliwmi ñut'ukapurqan. Reyninpas kamachiqninkunapas kamachipaq apasqan kapun, Señor Diospa kamachikuy siminpas manan kanñachu, profetankunamanpas manañan Señor Diosqa rikhuriypi rimapayanchu.

¹⁰Sumaq Sionpa kurak runankunapas ch'inraqmi pampapi tiyakapushan, umankuman usphata hach'ikuspa, llakikuymanta yana p'achawan p'achakuspan. Jerusalenpa sipasninkunapas pampata qhawaspan puripushanku.

¹¹Manañan ñawiypa weqenpas kanñachu, nanaymantan sonqoypas phatarqonqaña, yuyayniypas pampataraqmi chinkariwan, llaqta-masiykunaq thunikusqanta rikuspay wawakunata erqekunatawan yarqaymanta callekunapi wañushaqta rikuspay.

¹²Wawakunan mamankuta ninku: ¿Manachu kapunña t'antanchispas vinonchispas? nispa. Llaqta callekunapin k'irisqa hina kumpakapunku, ñak'aymantaraqmi mamankuq oqllayninpi wañunku.

¹³Jerusalén llaqtalláy, ¿ima nisqaykitaq? ¿Imawantaq rikch'anachisqayki? Sión llaqtalláy, ¿imawantaq rikch'anachisqayki qanta sonqochaykunaypaq? Qocha hinaraqmi k'iriykiqa manchakuyraq, ¿pipunitaq qhaliyaykachisunkiman?

¹⁴Rikhuriykunata willaq profetaykunaqa yanqa q'otullatan willarqasunki. Manan sut'incharqanchu huchaykikunata ñoqaman kutirikamunawaykipaq. Yanqa q'otukuyllatan willarqasunki chaykunawantaq pantachirqasunki.

¹⁵Jerusalén llaqtalláy, ñanninta puriqkunan rikuspasuyki asipayaspa t'aqllakunku, khuyakuspan umankutaraq maywipayasunki: ¿Kay llaqtatachu aswan sumaqcha nirqanku? ¿Kay llaqtatachu llapa runa kusichiq nirqanku? nispa.

¹⁶Llapanmi awqaykikuna yachapayasunki, khuyuspan k'utupakusparaq ninku: Ichaqa pasaqtapunin thunipurqanchis, kay hina kanantapunin munarqanchis. ¡Kunanmi rikunchispuni! nispa.

¹⁷Señor Diosmi yuyaykusqanta ruwarqan, ñawpaqmanta rimasqantapas hunt'arqan. Mana khuyapayaykuspan thunirqasunki, awqaykiwanmi yachapayachirqasunki, awqaykiwanmi atipachirqasunki.

¹⁸Sión llaqtalláy, Señor Diosman kunkayoqta waqyakuy. Tuta p'unchay qapariy unuy parata waqaspa. Ama thanispa suyuy, ñawiykipas ama samaykuchunñachu.

¹⁹Tuta sayarispa qapariy, llaqta qhawaq sapa hamuqtin qapariy, Señor Diospa qayllanpi tukuy ukhu sonqoykimanta mañakuy. Makiykita payman haywariy, pituchaykukuy wawaykikunapaq, paykunan sapanka callepi yarqaymanta urmapunku.

²⁰Señor Diosníy, ¡qhawariy! ¡Yuyaymanariy! ¡Manan pitapas hayk'aqpas khaynata ruwarqankichu! ¿Ichaqa hayk'aqpas mamakuna mikhunmanchu uywakusqan wawanta? ¿Profetapas sacerdotepas hinachu qan yupaychana wasipi wañuchisqa kananku?

²¹Callekunapin chuta-chuta kashanku waynakuna kurak runakunapas. Ñoqaq wayna-sipasniykunan espadawan sipisqa wañupurqanku. Phiñakusqayki p'unchaymi sipirarqanki, mana khuyapayaykuspan wañurachirqanki.

²²Fiesta qhawaq hamunanpaq mink'asqata hinaraq millay awqaykunata contraypi hinantinmanta kachamurqanki. Señor Diosníy, phiñakuyniyki p'unchaypin mana pipas ayqekurqanchu manataq kawsarqanchu. Ñoqaq yachachispa uywakusqaykunatapas awqaymi wañurqachipurqan.