Read Quechua Cuzco Bible 1988 LAMENTACIONES 3 Bible Online

LAMENTACIONES 3 - Quechua Cuzco Bible 1988 bible

LAMENTACIONES 3

¹Ñoqan kani Señor Diospa phiñakuspa ñak'arichisqan runa.

²Ñawpaqenmanta qarqowaspanmi k'anchaypi purinaymantaqa tutayaq ñanpi purichiwarqan.

³Kuti-kutirispan sapa rato hina ñoqaman hasut'in chayawarqan.

⁴Aychaytapas qaraytapas machuyachipurqanmi, tulluytapas p'akirqarirqanmi.

⁵Muyuriqniymanta ñit'ichiwaspan sinchi haya muchuywan rawkharqowarqan.

⁶Llanthu ukhullapiñan tiyaykachiwarqan ñawpa p'unchaypi wañuqkunata hina.

⁷Mana punkuyoq kanchamanmi wisq'awarqan, llasa bronce watanakunawanmi watawarqan.

⁸Yanapayta mañakuspaña qaparini chaypas, manan uyariwanchu valepakusqayta.

⁹Qaqamanta perqawanmi purinayta wisq'awarqan, ñanniytapas waqllichirqan.

¹⁰Señor Diosmi pakakuq león hina suyawarqan, hap'irqoq ukumari hinan qhawapayawarqan.

¹¹Ñanniymanta pulqarparichiwaspan llawq'arqariwarqan, qonqasqatan wikch'upuwarqan.

¹²P'eqtanta chutarispan qhawaykuwarqan, wach'inantan chayachiwayta munarqan.

¹³Señor Diospa kacharimusqan wach'ikunaqa ukhuykaman t'urpuykuwarqan.

¹⁴Llaqtaypa asipayananmanmi tukupun, sapa rato hinan ñoqamanta takinku.

¹⁵Señor Diosmi hunt'aykachiwarqan haya p'irkawan, amichiwarqantaq ajenjowan.

¹⁶Pampaman saruwaspan aqowan kiruyta p'akichirqan.

¹⁷¿Imachá thak-kaypas kakun? ¿Imaynataqchá kusisqa kaypas kakun?

¹⁸Kallpaymi chiriyarqapun, Señor Diospi suyakuyniypas manan kapunñachu.

¹⁹Llakikuyniyta tumaqayasqaytawan yuyariqtiyqa haya p'irkawan ajenjowan hinaraqmi.

²⁰Imaymanatan chaykunata yuyarini, hinan aswantaraq kallpaypas chiriyaykapuwan.

²¹Ichaqa kashanraqmi ñoqapaq kayllapiña suyakunaypaq:

²²Señor Diospa munakuyninqa mana p'uchukayniyoqmi, khuyakuyninqa manan pisiyaqchu,

²³chaykunaqa sapa paqarmi mosoqyan, Señor Diosqa hunt'aqllapunin.

²⁴Ñoqataqmi nini: Señor Diosmi lliw imaymanay ñoqapaqqa, chaymi paypi suyakuni, nispa.

²⁵Señor Diosqa sumaqllapunin payman hap'ipakuqpaqqa, lliw payta maskhaqkunapaqqa.

²⁶Señor Diospa qespichiwananchista ch'inlla suyakuymi may allinqa.

²⁷Runapaqqa wayna kasqanmantapacha chay ruwaykuna yachaqaymi may kusaqa.

²⁸Runaqa Señor Dios ñak'arichiqtinqa ch'inlla sapan tiyachun.

²⁹Huch'uyyaykukuspa pampata much'aykuchun, icha imaynapi kanmanraq suyakuy.

³⁰Ch'aqlaqninwanqa hinalla ch'aqlachikuchun, k'amisqantaqa chaskillachun.

³¹Señor Diosqa manan wiñaypaqchu runakunata saqerparin.

³²Muchuchinña chaypas khuyapayanpunin, munakuynin hatun kasqanrayku.

³³Cheqaqtapunin mana munanchu llakichiytaqa, manallataq runakunatapas nanachiytaqa.

³⁴Señor Diosqa yachanmi suyupi preso kaqkunata t'ustusqakunataqa.

³⁵Señor Diosqa rikunmi Qollana Diospa qosqan chaninchayta q'ewiqtaqa.

³⁶Señor Diosqa yachanmi hukman sayakuspa mana chanin ruwasqantaqa.

³⁷Señor Dios mana unanchaqtinqa, ¿pitaq imatapas ruwanman?

³⁸Lliw allinkunapas mana allinkunapas hamun Qollana Diospa unanchasqanmi.

³⁹Runari, ¿imamantataq quejakunman huchanmanta muchuchisqa kashaspari?

⁴⁰Cheqaqtapuni purisqanchista t'aqwirikusun, Señor Diosmantaq wakmanta kutirikapusun.

⁴¹Hanaq pacha Diosman sonqonchista kicharispa, makinchista haywarispa nisun:

⁴²Ñoqaykun contraykipi sayarispa huchallikurqayku, qantaq mana pampachawarqankikuchu.

⁴³Sinchita phiñakuspaykin qatiykachawarqankiku, mana khuyapayaykuspan sipiwarqankiku.

⁴⁴Phuyuwanmi p'istukurqanki mañakusqaykuta mana uyariwanaykikupaq.

⁴⁵Suyukuna ukhupin q'opaman tukuchiwarqankiku.

⁴⁶Llapan awqaykunawanmi yachapayachiwarqankiku.

⁴⁷Ñoqaykun manchachisqa kaspa urmarqayku, kunantaq thunisqaña kashayku pasaq raqay-raqay, nispa.

⁴⁸Munasqa llaqtay thunikuqtinmi ñawiymanta waqayniypas mayu hinaraq phawan.

⁴⁹Mana thaniykuspan waqasaq, manataqmi samaykusaqchu,

⁵⁰hanaqmanta Señor Diospa qhawarimuwanankama.

⁵¹Sonqoypas nanawanñan llaqtaypa ususinkuna ñak'arisqanta rikuqtiy.

⁵²Awqaypas mana ima huchaymantan phalaq animalta hina hap'iyta munawarqan.

⁵³Kawsashaqtan t'oqoman winarqowarqanku, punkuntapas qaqawanmi wisq'arqowarqanku.

⁵⁴Pasaqtan unupas p'ampaykapuwarqan, hinan yuyaykurqani: Chinkasqan kashani, nispa.

⁵⁵Señor Diosníy, ukhu t'oqomantapachan waqyakamurqayki:

⁵⁶Uyariway yanapayniyki mañakamusqayta, nispa. Qanmi waqyakamusqayta uyariwarqanki.

⁵⁷Waqyakamuqtiymi qayllaykamuwarqanki: Ama manchakuychu, niwarqankin.

⁵⁸Qanmi, Señor Diosníy, sayapakuwarqanki, qanmi, Señor Diosníy, qespichiwarqanki.

⁵⁹Qanmi, Señor Diosníy, mana chanin muchusqayta rikurqanki, yanapaykuwaspa chaninchaykuway.

⁶⁰Qanmi, Señor Diosníy, awqa sonqo kasqankuta rikurqanki, lliw yuyaykusqankuqa qan contrakama kasqanta.

⁶¹Qanmi, Señor Diosníy, k'amiwasqankuta uyarirqanki, lliw yuyaykusqankuqa qan contrakama kasqanta.

⁶²Awqaykunaqa ch'isiyaq p'unchaymi contrallaytapuni chhuchupakunku.

⁶³¡Qhawariy! Sayaspapas tiyaspapas ñoqamanta chanzakuspan takinku.

⁶⁴Señor Diosníy, paykunamanqa tupaqninkutapuni qoy, ruwasqankuman hinapuni qopuy.

⁶⁵Sonqonkuta rumiyaykachiy, paykunataqa ñakaypuni.

⁶⁶Señor Diosníy, phiñakuspayki qatiykachay, kay pachamantaqa chinkachiypuni.