Read Quechua Cuzco Bible 1988 LAMENTACIONES 4 Bible Online

LAMENTACIONES 4 - Quechua Cuzco Bible 1988 bible

LAMENTACIONES 4

¹¡Imaraqmi qoripas yanayaykapurqan! ¡Imaraqmi ch'uya choqepas manaña k'anchapunchu! Hinantin k'uchukunapi ch'eqeykachisqan yupaychana wasiq ruminkunapas kashan.

²Sionpi munasqa waynakunan qori hina qhawasqa karqanku, kunantaq manka ruwaqpa ruwasqan t'uru manka hina qhawarparisqa kapunku.

³Chacal nisqa animalkunapas wawantaqa ñuñunmi, llaqtaytaqmi ichaqa suri hina yana alma wawankunapaq.

⁴Ñuñuq wawakunan unu ch'akiymanta kashanku, siminkumanmi qallunkupas k'askarqakapun. Wawakunan t'antata mañakun, manataqmi pipas kanchu qoykuqnin.

⁵Sumaq hatun mikhuylla mikhuqkunan kunanqa callekunapi wakchay-wakcha puripushanku. Allin sumaq p'achakunayoq wiñaqkunan kunanqa q'opa patapi maskhapakapushanku.

⁶Llaqtayqa aswan ñak'arichisqaraqmi karqan Sodoma llaqtaq muchusqanmantaqa, chayqa kaq ratopacha thunisqan karqan, manataqmi pipas yanapaykurqanchu.

⁷Uma runakunaqa rit'i hina yuraqmi karqan, lechemantapas aswan yuraqmi karqan. Cuerponpas qhaliy-qhaliraqmi karqan, sayayninpas munay sikllay-sikllaraqmi karqan.

⁸Kunantaq ichaqa qhechimamantapas aswan yanaraq kapusqa, callenkunapipas manan reqsiyta atiqkuchu. Aychanpas tullunmanñan k'askapusqa, k'aspi hina ch'akillañan kapusqapas.

⁹May allinmi maqanakuypi wañuyqa karqan yarqaypi wañuymantaqa, paykunaqa alli-allimantan wañunku chakraq rurusqan mana kapuqtin.

¹⁰Llaqtay thunisqa kaqtinmi, sumaq sonqo warmikuna wawankuta wayk'ukapurqanku chayta mikhunankupaq.

¹¹Señor Diosmi phiñakuyninta kachaykamurqan, phiñakuyninpa senq'apantan kacharparirqan. Siontan ninawan kanaykurqan, teqsinkamaraqmi thunirqan.

¹²Kay pacha reykunaqa lliw suyukunapi tiyaqkunapas manapunin hayk'aqpas yuyarqankuchu awqakunapas llat'anaqkunapas Jerusalén punkunta haykunankutaqa.

¹³Ichaqa haykurqankun, profetakunaq huchanmanta sacerdotekunaq millay mana chanin ruwasqankumantawan, paykunan llaqta ukhupi chanin runakunata wañuchirqanku.

¹⁴Kunantaq paykunaqa callekunapi ñawsa hina thampi-thampita purishanku. Yawarkamallañan purishanku, manañan pipas paykuna llamiykuyta munanñachu.

¹⁵Paykunataqa runapas waqyamunmi: ¡Lloqsiychis qhelli runakuna! ¡Lloqsiychis! ¡Ama llamiykuwaychispaschu! nispa. May llaqtapi tumaqayasqankupipas nimurqanku: Manan kaypi tiyayta atiwaqchischu, nispa.

¹⁶Señor Diosqa qhawarispallaraqmi ch'eqerparichirqan, chaymantataqmi manaña qhawarinpasñachu, sacerdotekunatapas manan khuyapayarqanchu, kurak taytakunatapas manan llakipayarqanchu.

¹⁷Ñawipas tutallañan qhawapakurqayku, yanqapaqmi yanapayta suyakurqayku. Torre patamantan qhawasharqayku chayamunanta mana qespichiy atiq suyuta.

¹⁸Purisqaykupas qhawasqallañan karqan, manan callekunaman lloqsiyta atirqaykuchu. Wañunaykuqa pataykupin karqan, chay horaqa chayamurqanñan, chayamurqanpachan tukukapunaykuqa.

¹⁹Alton phalaq ankamantapas aswan phawaqmi ñoqaykuq qatiykachaqniykuqa, orqon-orqontan qatiykachawarqanku, ch'inneqpi pakakuspan suyawarqanku.

²⁰Señor Diospa hawisqan reytapas presotan hap'irqanku, payllan kamachiqniyku karqan, paymantan nirqayku: Payqa suyukunamanta hark'akuwasunchá, nispa.

²¹Yaw Edom suyupi tiyaqkuna asikuychis, yaw Uz suyupi tiyaqkuna, kusikuychis, qankunamanpas chayamullasunkichistaqmi haya qeruqa, machaspa q'ala chichi kanaykichispaq.

²²Sión llaqtalláy, muchunaykiqa tukukapunmi, Señor Diosqa manan wakmanta kamachi kayman apachisunkiñachu. Qanmi ichaqa, Edom suyu, huchaykimanta muchuchisqapuni kanki, Señor Diosqa huchaykitapas q'alarparinqapunin, nispa.