Read Quechua Cuzco Bible 1988 LAMENTACIONES 5 Bible Online

LAMENTACIONES 5 - Quechua Cuzco Bible 1988 bible

LAMENTACIONES 5

¹Señor Diosníy, imachus kawasqankuta yuyariy, qhawariwayku imaynachus p'enqachisqa kasqaykuta.

²Llapan hallp'aykupas wak llaqtayoqkunaq makinpiñan, llapan wasiykupas karu llaqtayoqkunaq makinpiñan.

³Wakchan kapuyku mana taytayoq, mamaykupas viuda hinan qheparqapun.

⁴Ukyanaykupaq unutapas rantikapunaykun kapun, llant'amantapas pagapunaykun kapun.

⁵Uywa hina soq'aspa qatisqan kashayku, sayk'urqapuykun, manañan samarichiwankuñachu.

⁶Mikhunayoq kanaykupaqmi makiykuta haywarikurqayku Egipto runakunaman Asiria runakunamanwan.

⁷Taytaykun huchallikurqanku, manañataq kankupasñachu, ñoqaykun rantinkupi muchushayku.

⁸Kunanqa kamachikunaq kamachisqanmi kapuyku, manataq pipas makinkumanta horqoqniyku kanchu.

⁹Wañuchiqkunan campopi kashan, chaymi sinchi sasawan mikhunaykutapas tariyku.

¹⁰Aycha qaraykupas horno hinan rawrarin, yarqaymanta ruphapakuy onqoy hap'iwasqankurayku.

¹¹Sión llaqtapin warmikuna alqochasqa rikukurqanku, Judá llaqtakunapin sipaskuna alqochasqa kapurqanku.

¹²Uma runaykun makinkumanta warkusqa karqanku, kurak runakunapas mana respetasqan kanku.

¹³Waynakunatan maranpi kutaqpaq churaykunku, erqekunataqmi llant'a q'epiq ñit'isqan kapunku.

¹⁴Llaqta punkukunapiqa manan kurak runakuna kapunchu, waynakunaq tocasqanpas manan uyarikunñachu,

¹⁵sonqoykupi kusikuypas manan kapunñachu, tusuyniykupas llakimanmi tukupun.

¹⁶Mentasqa-kayniykupas manan kapunñachu. ¡Ikiraqmi ñoqaykumanta! ¡Huchallikurqaykun!

¹⁷Chayraykun sonqoykupas chiriyapun, chayraykun ñawiykupas ayphayaykapun,

¹⁸Sión orqoq yanqa raqay-raqay kasqanmanta, chacal nisqa animalkunaq chayninta kuti-tikrasqanmanta.

¹⁹Qanmi ichaqa, Señor Diosníy, wiñaypaq kamachikunki, tiyashallankipunin kamachikuy tiyanaykipi.

²⁰¿Imanaqtintaq pasaqta qonqarparipuwankiku? Kay hina unayri, ¿imanaqtintaq wikch'urparipuwankiku?

²¹Señor Diosníy, qanman kutirichiwayku, hinan kutirimpusaqku, imaynan ñawpaq kawsayniyku karqan chay hina kachun kunanpas,

²²icha, ¿pasaqtachu mana munapuwankiku? Icha, ¿sinchi phiñasqapunichu ñoqaykupaq kapunki?