Read Quechua Cuzco Bible 1988 EZEKIEL 1 Bible Online

EZEKIEL 1 - Quechua Cuzco Bible 1988 bible

EZEKIEL 1

¹Kinsa chunkakaq wataq tawakaq killanpa phisqakaq p'unchayninpin Babilonia suyupi Kibar mayu patapi ñoqa Buziq churin sacerdote Ezekielqa kamachi-kaypaq apamusqa Judío runakunapiwan kasharqani. Chay watan karqan rey Joakinpa kamachi-kaypaq apamusqan kasqanmanta phisqakaq wata. Chaypin rikurqani hanaq pacha kicharikuqta, hinaspan mosqoypi hina rikhuriypi Diosta rikurqani. Kibar mayu patapi kashaqtiymi Señor Diosqa rimaykuwarqan, hinan sonqoypi Señor Diospa atiyninta repararqani.

⁴Hinaspan rikushasqani wichaymanta t'uyurmi wayra hamushaqta. Manchay hatun phuyumantataq lliphllikimushasqa chikchi pukllaq hina, chaypa muyuriqninpitaq sinchi k'anchay wach'imushasqa. Chay lliphllikiqpa sonqonpitaq sinchi parichisqa metal hina sansashasqa.

⁵Chaypa chawpinpipunitaq runaman rikch'akuq tawa kawsaqkuna kashasqa.

⁶Chaykunataq sapanka tawa uyayoq kasqa, tawa raphrayoq ima.

⁷Chakinkunataq kasqa cheqanlla, torillo hina phapatuyoq, k'anchasqataq allin llusk'achasqa bronce hina.

⁸Tawa uyayoq tawa raphrayoq kasqankumantapas kallasqataq tawantin raphranpa uranpi tawa runa makikuna. Raphrankunataq waqtanakusqa paykunapura. Purispaqa manan kutiriqchu kasqa, aswanpas cheqanllatan purisqa.

¹⁰Chay tawa kawsaqkunaq uyantaq kay hina kasqa: ñawpaqen uyanmi runaq hina kasqa, paña lado uyantaq leonpa hina kasqa, lloq'e lado uyantaq toroq hina kasqa, wasan lado uyantaq ankaq hina kasqa.

¹¹Sapanka kawsaqpan iskaykama raphrankuna wichayman sayasqa, chay raphrakunataqmi paykunapura tupanakusqa, iskay raphrankuwantaqmi cuerponkuta pakakusqaku.

¹²Llapankutaq purisqaku ñawpaq ladollaman sonqonkuq kamachisqanman hina mana kutirispa.

¹³Chay kawsaqkunaq rikch'aynintaq kasqa rawrashaq sansa hina, otaq nina k'ancha hina. Paykuna chawpipitaq ninaqa qhaswashasqa, ninaq rawraynintaq kasqa sinchi k'anchaqpuni, chay ukhumantataq lliphllikimushasqa.

¹⁴Chay kawsaqkunataq illapaq lliphllikiynin hinaraq phawaykachasqaku.

¹⁵Chay kawsaqkunata qhawashaqtiymi sapankaq ladonpi huk ruedakama kasqa pampankupi.

¹⁶Tawantin ruedakunataqmi kasqankama kasqa, q'omer umiña hinaraqmi chhipipipisqapas. Sapanka ruedantaq iskay rueda pasapunachisqaman rikch'akusqa.

¹⁷Chaymi tawantin ruedakunaqa may ladomanpas mana kutirispalla purisqaku, kawsaqkunaq may ladomanchus qhawasqanman hina.

¹⁸Ruedankunaq muyuriq patanqa hatuchaqmi llaksakuyraqmi kasqa, muyuriqninpi ñawikunawan hunt'aykusqa.

¹⁹Chay kawsaqkuna puririqtintaq, paykunawan kuska ruedakunaqa puririllasqataq, pampamanta phalariqtinpas ruedaqa phalarillasqataq.

²⁰Chay kawsaqkunaqa sonqonkuq munasqanman hinan may ladomanpas puririq kasqa, ruedankupas paykunawan kuska puririsqa kawsaqkunawan huk sonqollayoq kasqankurayku.

²¹Kawsaqkuna kuyuriqtinqa ruedakunapas kuyurillasqataq, paykuna sayarpariqtinqa ruedakunapas sayarparillasqataq, pampamantaña hatariqtinpas, ruedakunaqa hatarillasqataq paykunawan kuska, kawsaqkunawan huk sonqollayoq kasqankurayku.

²²Umanku patapitaq chhipipishaq hatun p'alta chhullunku hina llaksakuyraq kasqa.

²³Chay p'altaq uranpitaq sapanka kawsaqkunaqa iskay raphranta hukmanta-huk mast'anakusqa, iskay raphranwanñataq cuerponta pakakusqa.

²⁴Uyarishallasqanitaq puririqtin raphranpa raphapapasqanta, chay ch'aqwaytaq karqan askha unuyoq mayu hina, Tukuy-atiyniyoqpa kunkan hina, askha soldadokunaq ch'aqwasqan hina. Sayaykuqtinkutaq raphranqa uraykullasqataq,

²⁵chaywanpas patanpi p'altamanta huk kunka uyarikushallasqaraqmi.

²⁶Chay p'alta patapitaq rikukusqa anqas umiñamanta tiyanaman rikch'akuq. Chay kamachikuy tiyana patapitaq huk runapas kashanman hina kallasqataq.

²⁷Chawpi cuerponmanta wichaymantaq rikch'akusqa sinchi parichisqa sansashaq metalman hina, chaymanta uranmantaq ninaman hina rikch'akuq kasqa. Lliw muyuriqninpitaq sumaq k'anchay kasqa,

²⁸paraqtin k'uychi ruwakun chayman rikch'akuq. Chay hina rikch'aypin Señor Diospa lliphlli-kaynin rikhuriwarqan. Rikurqospaytaq uyanpamanta kumpakurqani, hinaspan uyarirqani huk kunka nimushawaqta: