Read Quechua Cuzco Bible 1988 EZEKIEL 10 Bible Online

EZEKIEL 10 - Quechua Cuzco Bible 1988 bible

EZEKIEL 10

¹Chaymanta rikullarqanitaq chay raphrayoqkunaq uman pata p'altapi anqas umiñamanta tiyanaman rikch'akuqta.

²Hinan Señor Diosqa yuraq qoysu p'achayoq runata nirqan: Haykuy raphrayoqkunaq uranpi kaq ruedakunaq chawpinman, hinaspa nina sansata makiykipi horqomuy chay raphrayoqkunaq ukhunmanta, llaqtaq patanmantaq hach'iykuy, nispa. Hinan rikurqani runaq haykusqanta.

³Chay ratotaq raphrayoqkunaqa sayasharqanku Dios yupaychana wasiq ura ladonpi, phuyutaq ukhu patiota hunt'aykurqan.

⁴Chaymantataq Señor Diosqa lliphipispa raphrayoqkunaq patanmanta hatarispa, yupaychana wasi punkuman rirqan. Hinan Dios yupaychana wasita phuyuqa hunt'aykullarqantaq, pationpas k'ancharirqanraq Señor Diospa lliphlli-kayninwan.

⁵Raphrayoqkunaq raphranpa raphapapasqantaq hawa patiokamaraq uyarikurqan, Tukuy-atiyniyoq Diospas rimashanman hinaraq.

⁶Linomanta yuraq qoysu p'achayoq runatan Señor Diosqa nirqan: Ruedakunaq ukhunmanta ninata horqomuy raphrayoqkunaq chawpinmanta, nispa. Hinan runaqa rispa hukkaq ruedaq ladonpi sayaykurqan.

⁷Chay raphrayoqpa raphran ukhupitaq kasqa runaq makinman rikch'akuq. Hukkaq raphrayoqtaq haywarispa chawpinkupi ninamanta sansata hoqarimurqan, hinaspan haywarimurqan linomanta p'achayoq runaman. Paytaq chayta chaskiykuspa ripurqan.

⁹Raphrayoqkunawan kuskatataq tawa ruedata rikurqani, sapanka raphrayoqtaq huk ruedawankama kasqa. Chay ruedakunataq chhipipipisqa q'omer umiña hina.

¹⁰Tawantin ruedakunaqa kikinkaman kasqa, sapanka ruedataq iskay rueda pasapunachisqaman rikch'akusqa.

¹¹Raphrayoqkunaqa may cheqasmanpas puririyta munanku chayqa, puririllankuñan mana kutirispalla.

¹²Cuerponkupas, wasankupas, makinkupas, raphrankupas, tawantin ruedankupas ñawikunawan hunt'aykusqan kasqa.

¹³Ñoqa kikiymi uyarillarqanitaq tawantin ruedanman: “Muyuylla-muyuq”, nispa sutichaqtapas.

¹⁴Sapanka raphrayoqtaq tawa lado uyayoq kasqa: ñawpaqkaq uyanmi rikch'akusqa toro uyaman, iskaykaq uyataq rikch'akusqa runa uyaman, kinsakaq uyataq rikch'akusqa león uyaman, tawakaq uyataq rikch'akusqa anka uyaman.

¹⁵Kay raphrayoqkunaqa Kibar mayupi rikusqay kawsaqkunallapunin. Raphrayoqkunataq phalaripurqan,

¹⁶hinaspan paykuna usqhariqtinqa ruedakunapas usqhallarqantaq, pampamantapas ruedantinpachan phalarillarqantaq.

¹⁷Sayarpariqtinpas sayarparillarqantaq ruedakunaqa raphrayoqkunawan huk sonqollayoq kasqankurayku.

¹⁸Chaymantataq Señor Diosqa lliphipispan yupaychana wasi patamanta hataripurqan, raphrayoqkunaq hawanpitaq sayaykurqan.

¹⁹Qhawashallaqtiytaq raphrayoqkunaqa phalarirqanku ruedantinpacha, hinaspataq chayarqan Dios yupaychana wasiq inti haykuy lado punkunman. Israelpa Diosninpa lliphlli-kaynintaq paykunaq hawanpi k'ancharirqan.

²⁰Chaykunaqa kasqa Kibar mayu patapi Israelpa Diosninpa uranpi rikusqay kawsaqkunan, chayraqmi repararqani raphrayoqkuna kasqanta.

²¹Sapankataqmi karqan tawa uyayoq, tawa raphrayoq, raphrankuq uranpitaqmi runa makiman rikch'akuq kasqa.

²²Chay rikusqay raphrayoqkunaq rikch'aynintaq karqan Kibar mayupi rikusqay kaqkunapuni. Sapankataq purisqaku ñawpaqen ladollaman.