Read Quechua Cuzco Bible 1988 EZEKIEL 12 Bible Online

EZEKIEL 12 - Quechua Cuzco Bible 1988 bible

EZEKIEL 12

¹Señor Diosqa nillawarqantaqmi:

²Qan, runa, mana kasukuq llaqtaq chawpinpin tiyanki. Paykunaqa qhawashaspa mana rikuq, uyarishaspa mana uyariqmi kanku, millay mana kasukuq kasqankurayku.

³Chayrayku kaqniykikunata wakichikuy kamachi-kayman apasqa kaspa apakapunaykipaq. Hinaspan llapa runa rikushaqtin p'unchaypi wasiykimanta wak llaqtaman lloqsipunki. Ichapaschá chay hinapi yuyayta hap'inkuman, hinaña mana kasukuq kanku chaypas.

⁴P'unchaypi lliw runaq rikushasqan imaykikunatapas q'epichakunki kamachi-kayman apasqa hina puririnaykipaq, ch'isinmanpas kaqllataq ñapas apasqa runa hina lloqsipunki.

⁵Chaymantapas llapa rikushaqtinku perqata t'oqospa chayninta lloqsinki kaqniykikuna q'epiykusqa.

⁶Laqhayaykuqtintaq q'epillaykita q'epirikuspa llapanku rikushaqtin pasapunki, uyaykitataq qatakunki suyuntinta mana rikunaykipaq. Chayta ruwaspaykin Israel llaqtapaq huk willakuy kanki, nispa.

⁷Chaymi Señor Diospa kamachiwasqanman hina p'unchaypi q'epiyta q'epichakurqani, kamachi-kayman apanapaq. Ch'isinmantaq makiywan perqata t'oqorqani, hinaspan laqhayaykuqtin hina lliw runa rikushaqtin, q'epillayta q'epirikuspa puriripurqani.

⁸Tutamantataq Señor Diosqa niwarqan:

⁹Qan runatan chay mana kasukuq Israel runakunaqa ch'isi tapurqasunki: ¿Imatan ruwashanki? nispan riki.

¹⁰Chaymi kunanqa ninki: Qollana Señor Diosmi nin: Kayqa huk willakuymi Jerusalenpa umallinpaq, chaypi tiyaq llapan Israel runakunapaqwan, nispa nispayki.

¹¹Nillankitaq: Ñoqaqa qankunapaq huk waqyakuy willakuymi kani. Imaynatan ñoqa ruwashani, chay hinata ruwaspan Jerusalenpi tiyaqkuna kamachi-kayman ripunqaku.

¹²Qollana Señor Diosmi nillantaq: Paykunaq umallinmi kaqninkunata q'epirikuspa tutayaykuqtin perqa t'oqonta lloqsispa ripunqa, uyanta qatarqokuspa suyuta mana rikunanpaq.

¹³Ñoqataqmi pay urmachinaypaq llikata churasaq, Babilonia llaqtamantaq apasaq, paytaqmi ichaqa ñawsa kaspa chay suyuta mana rikunqachu, chaypin wañupunqa.

¹⁴Hinantinmanmi wayrawan hina aparparichisaq llapan oficialninkunata, yuyaychaqninkunata, soldadonkunatapas, hinaspataq qhepankuta espadantin qatipasaq.

¹⁵Maypachachus karu suyukunaman wak llaqtakunaman aparparisqa kaspankuqa, reqsiwanqakun ñoqaqa Señor Diospuni kasqayta.

¹⁶Ichaqa huk iskayta ayqechisaqpunin hatun maqanakuymanta, yarqaymanta, onqoykunamantawan, chay hinapi may llaqtapiña kasqankupipas millay mana chanin p'enqay ruwasqankumanta yuyayta hap'inqaku, hinallataq ñoqa Señor Dios kasqaytapas reqsiwanqaku, nispayki, nispa.

¹⁷Señor Diosqa nillawarqantaqmi:

¹⁸Qan, runa, mikhushaspan khatatatanki, ukyashaspataq mancharikuymanta chhaphchikunki.

¹⁹Runakunatataq ninki: Qollana Señor Diosmi Jerusalenpi Israel suyupipas tiyaq runakunamanta nin: Paykunan millayta awqanakunku chaymi llaksasqallaña mikhunqaku, ukyanankutapas manchasqallaña ukyanqaku, suyunkupas thunisqataq ch'usaqtaqmi qhepapunqa.

²⁰Llapan runayoq llaqtan thunisqa kanqa, suyuqa ch'inneqman tukuchisqan kapunqa. Chay hinapin paykunaqa Señor Dios kasqayta reqsiwanqaku, nispa, nispayki.

²¹Señor Diosmi nillawarqantaq:

²²¿Ima niytan munan Israel runakunaq: P'unchaykunan pasarqapun, profetaq rikhuriypi rikusqanqa manataq hunt'akunchu, nisqanku?

²³Paykunamanmi ninki: Qollana Señor Diosmi nin: Chay rimaytaqa ñoqan yanqaman tukuchipusaq, Israel runakunaqa manañan chay rimayta rimanqakuchu. Aswanmi chayamushanña lliw unanchasqakunaq hunt'akunan p'unchay, llapallanmi hunt'akunqa rikhuriypi rikuchisqakunaqa.

²⁴Manan Israel runakuna ukhupiqa kanqachu yanqa rikhuriykuna llunk'upayay willakuykuna.

²⁵Aswanmi ñoqa Señor Diosqa ima ruway munasqayta nisaq, hinan lliw nisqaypas usqhaylla hunt'akunqa. Yaw mana kasukuq llaqta, kawsasqayki p'unchaypin rikunki lliw hunt'akusqanta. Ñoqan rimarisaq, rimarisqayqa lliwmi hunt'akunqa. Ñoqa Qollana Señor Diosmi chayta nini, nispa.

²⁶Chaymantapas Señor Diosqa nillawarqantaq:

²⁷Lliw Israel runakunan purinqaku: Profetaq rikhuriypi rikusqanpas willakusqanpas qhepamanraqmi hunt'akunqa, nispanku.

²⁸Chayrayku paykunata niy: Qollana Señor Diosmi nin: Rimasqaykunaqa kunallanmi hunt'akunqa, ima rimasqallaypas hunt'akunqapunin, nispa, nispayki.