Read Quechua Cuzco Bible 1988 EZEKIEL 14 Bible Online

EZEKIEL 14 - Quechua Cuzco Bible 1988 bible

EZEKIEL 14

¹Israel llaqta wakin kurak runakunan hamuspa ñawpaqeypi tiyaykurqanku.

²Hinan Señor Diosqa nimuwarqan:

³Qan, runa, uyariway. Kay runakunan wak'a diosninkumanpuni hap'ipakunku, hinaspan chay diosninkuwan huchallikunankupaq aysachikunku. ¿Chaychu ñoqa paykunawan tapuchikuyman?

⁴Chay hinaqa niy: Qollana Señor Diosmi nin: Mayqen Israel runapas wak'a dioskunaman hap'ipakuspa, chay dioskunawan huchallikunanpaq aysachikuspa, profetaman tapukuqraqtaq hamunman chayqa, ñoqa kikiymi payman kutichisaq millay wak'a dioskuna yupaychaq kasqanman hina.

⁵Llapan Israel runakunan wak'a diosninkurayku t'aqakuwanku, chayraykun chayta ruwasaq sonqonkuta wakmanta suwanaypaq.

⁶Chayrayku Israel runakunata niy: Qollana Señor Diosmi nin: ¡Yuyayta hap'ispa ñoqaman kutirimpuwaychis! Millay p'enqay ruwasqaykichista, wak'a diosniykichistapas wikch'upuychis.

⁷Mayqen Israel runapas, Israel suyupi tiyaq wak llaqtayoq runapas ñoqata saqewaspa wak'a dioskunaman hap'ipakuspa, chay diosninkuwan huchallikunanpaq aysachikunqa, hinaspa huk profetaymanraqtaq tapukuq hamunmanpas chayqa, ñoqa kikiymi payman kutichisaq.

⁸Chay runaqqa awqanmi tukusaq, lliwpa rikunanpaqmi muchuchisaq chaymanta qhepaman parlakunankupaq, llaqtaymantapas wikch'upusaqtaqmi. Chay hinapin yachankichis ñoqa Señor Diosqa kasqayta.

⁹Huk profetachus llullakunanpaq q'otuchikuspa willakunman chayqa, ñoqa Señor Diospa q'otusqay profetan kanqa, hinan ñoqaqa chay profetata ñak'arichisaq, Israel llaqtaymantapas wikch'upusaq.

¹⁰Profetapas payta tapukuq runapas iskayninkun huchachasqa kanqaku.

¹¹Chay hinapin manaña Israel llaqtaqa astawan ñoqamanta t'aqakuwanqakuñachu, manañataq huchankuwan qhellichawanqakuñachu. Paykunan llaqtay kapunqaku, ñoqataq Diosninku kasaq. Ñoqa Qollana Señor Diosmi chayta nini, nispayki.

¹²Señor Diosmi niwarqan:

¹³Qan, runa, uyariway. Suyuntin runachus ñoqa contra huchallikunkuman wasanchawankumantaq chayqa, ñoqan makiyta haywarispa llapantapuni mikhunankuta qechusaq. Paykunamanmi yarqayta kachaykusaq, hinan runakunapas uywakunapas wañuranqaku.

¹⁴Chay suyupitaqchus tiyanman Noepas, Danelpas, Jobpas chayqa, paykuna kinsantillanmi qespisqa qhepankuman chanin kasqankurayku. Ñoqa Qollana Señor Diosmi chayta nini.

¹⁵Salqa animalkunataña kachaykuyman suyuntinpi tiyaqkunata mikhunanpaq, hinataq chay animalta manchakuspa mana piqpa purinan ch'inneqman suyuntin tukupunman,

¹⁶chaypitaqchus chay kinsantin runakuna tiyashanman chaypas, manapuniñan wawankunata horqokapuyta atinkumanchu. Paykunallañan qespisqa kankuman, suyuntintaqmi ch'inneqmanpuni tukupunman. Ñoqa Qollana Señor Diosmi sutiyrayku jurani.

¹⁷Maqanakuytachus chay suyuman kachaykuyman, hinaspataq kamachiyman runata uywatawan wañunanpaq,

¹⁸chay kinsantin runakunataqchus chaypi tiyankuman chaypas, manapunin wawankunata horqokapuyta atinkumanchu, paykunallapunin qespisqa kankuman. Ñoqa Qollana Señor Diosmi sutiyrayku jurani.

¹⁹Onqoykunatachus chay suyuman kachaykuyman, phiñakuyniywantaq wañuyta t'akaykuspa wañurachiyman runakunata uywakunatawan,

²⁰chaypitaqchus kashanman Noepas, Danelpas, Jobpas, manapunin wawankunata horqokapuyta atinkumanchu. Paykunallapunin qespisqaqa kankuman, chanin runa kasqankurayku. Ñoqa Qollana Señor Diosmi sutiyrayku jurani.

²¹Ñoqa Qollana Señor Diosmi nillanitaq: Ñoqan Jerusalenta muchuchisaq tawa manchana ñak'ariykunawan: hatun maqanakuywan, yarqaywan, salqa animalkunawan, onqoypiwan. Chaykunan sipiranqa runata uywakunatawan, chay hinaqa, ¡imayna llaksakuyraqmi Jerusalenpaqqa kanqa!

²²Chaywanpas iskay kinsallan kawsashaq ayqenqaku, chaykunallan wawakunantin lloqsinqaku. Paykuna qankunaman hamuqtinmi yachankichis imaynachus kasqankuta, imachus ruwasqankutawan, chayraqmi reparankichis imamantachus Jerusalenta lliw ñak'ariykunawan kachaykusqayta.

²³Qankunaqa reparankichismi imachus ruwasqankuta imaynachus kasqankutawan, chay hinapin yachankichis Jerusalentaqa mana yanqa qasichu muchuchisqayta. Ñoqa Qollana Señor Diosmi chayta nini, nispa.