Read Quechua Cuzco Bible 1988 EZEKIEL 17 Bible Online

EZEKIEL 17 - Quechua Cuzco Bible 1988 bible

EZEKIEL 17

¹Señor Diosmi niwarqan:

²Qan, runa, Israel llaqtaman huk rikch'anachiyta willay watunankupaq.

³Niytaq: Qollana Señor Diosmi nin: Hatun ankan Libanoman chayarqan, mast'arisqa raphranpas hatunpunin kasqa, askha color sumaq phuruyoqmi kasqa. Cedro mallkitan umanmanta hap'irqan,

⁴mallkiq ñawintan p'itirqorqan, comerciantekunaq hallp'anmanmi aparqan, askha qhatunayoq llaqtamanmi mallkimurqan.

⁵Pampamanta muhuta hoqarispataq, allin hallp'aman t'akarqan mayu pataman sauceta hina askha unuq kasqanman.

⁶Muhutaq wiñarqamuspan allin uvas sach'aman tukurqan. Huch'uyllaña karqan chaypas raphinqa ankaq kasqanmanraqmi t'iksurqan, saphintaq ukhumanraq saphiykusharqan, uvas sach'amanmi tukurqan, allinta p'arqarirqan, raphinpas askhan karqan.

⁷Kallarqantaq huk hatun anka hatun raphrayoq askha phuruyoq. Uvas sach'ataq mallkisqa kasqan cheqasmanta chay ankamanñataq saphinta mast'arirqan, raphintapas t'iksurirqan qarpachikunanpaq.

⁸Allin hallp'api mallkisqan kasharqan, askha unuyoqmi kasharqan, allinta k'allmanpas q'omeryananpaq, allin askhata rurunanpaq, allin uvas sach'aman tukunanpaq.

⁹Niy: Qollana Señor Diosmi nin: Kay uvasqa, ¿allinchu kanqa? Ñawpaqkaq ankaqa, ¿manachu saphinmanta t'irarqonqa? ¿Manachu ruruntapas qechupunqa? ¿Manachu ch'ikchimusqanpas ch'akipunqa mana kallpayoqpapas pisi runaqllapas t'iranankama?

¹⁰¿Wakmantaña tarpupaqtinkupas wiñanmanñachu? Inti lloqsiy rupha wayra wayramuqtinqa, ¿manachu ch'akipunqa? Wiñasqan hallp'api chay sach'aqa ch'akipunqan, nispa, nispayki.

¹¹Señor Diosmi nillawarqantaq:

¹²Kay mana kasukuq llaqtata tapuykuy: ¿Atinkichu kay rikch'anachiy watuyta? nispa. Nillaytaq: Babilonia reymi Jerusalenta rirqan, hinaspan Judá suyu reyta llapan uma runakunatawan presota Babiloniaman apamurqan.

¹³Chaymantataqmi Judá reypa ayllun huk runawan rimanakurqan, rimanakusqanta mana p'akinanpaq jurachispa. Hinaspataq llaqtapi allichachaq runakunata apapurqan,

¹⁴chay hinapi Judaqa rimanakusqanta hunt'aspa pisi kallpalla mana sayariytapas atispa kawsananpaq.

¹⁵Ichaqa chay rimanakuq reymi Babilonia rey contra sayarirqan, hinaspan kachapurikunata Egiptoman kacharqan, caballokunata soldadokunatawan askhatapuni mañakuspa. ¿Chay reypaq allinchu kanqa? ¿Ayqenmanchu chaykuna ruwaq runa? ¿Rimanakusqanta mana hunt'aqqa ayqenmanchu?

¹⁶Ñoqa Qollana Señor Diosmi sutiyrayku jurani, kaq Babiloniapipunin wañunqa, rey kananpaq payta churaq reypa suyunpipunin wañunqa, payqa rimanakusqanta p'akispan jurasqanta pisicharqan.

¹⁷Babilonia rey llaqtata muyuykuspa runa hark'achita perqa seqanata sayarichiqtin askha runata sipirananpaq, chaypiqa Egipto rey Faraonpas aqoyraki soldadonkunapas yanqanpaqmi kanqa.

¹⁸Chay reyqa pisicharqanmi juramento ruwasqanta rimanakusqantawan p'akispa. Payqa hunt'ananpaqmi rimarirqan, chaywanpas chay hinataraqmi ruwarqan, chayraykun payqa mana ayqenqachu.

¹⁹Ñoqa Qollana Señor Diosmi sutiyrayku jurani: Paypas simi kachariwasqanta mana hunt'awarqanchu, ñoqawan rimanakusqantapas p'akirqantaq, chayraykun ruwasqanta paymanta mañaspa muchuchisaq.

²⁰Paytan llukuywan llukurqosaq, hinaspan Babiloniaman apasaq, chaypitaqmi mana hunt'aq kasqanmanta taripamusaq.

²¹Allichachaq soldadokunan maqanakuypi wañupunqa, qhepaq kaqkunataqmi tawantin ladoman wayraq ch'eqechisqan kanqa. Chaywanmi qankunaqa yachankichis ñoqa Señor Diospuni rimasqayta.

²²Ñoqa Qollana Señor Diosmi nillanitaq: Ñoqan hatun cedroq ñawinta hap'iykusaq, hinaspan qholla ch'ikchinta wikharqosaq, hinaspaymi suni orqoq ñawch'inman mallkirqamusaq.

²³Israelpa suni orqonmanmi mallkimusaq, raphisapan kanqa, allintan rurunqapas, sumaq cedromanmi tukupunqa. Imaymana rikch'aq animalkunan llanthunpi tiyanqaku, k'allmanpitaqmi imaymana urpichakuna q'esachakunqaku.

²⁴Chay hinapin yachanqaku llapan mallkikuna ñoqa Señor Diospa ruwasqayta. Ñoqan hatun wiñaq mallkita kumpani, huch'uy mallkitataq hatunllataña wiñachini. Ñoqan q'omer sach'ata ch'akichini, ch'aki sach'atataqmi q'omeryachini. Ñoqa Señor Diosqa rimasqaytaqa hunt'asaqpunin, nispa, nispayki.