Read Quechua Cuzco Bible 1988 EZEKIEL 19 Bible Online

EZEKIEL 19 - Quechua Cuzco Bible 1988 bible

EZEKIEL 19

¹Qan, runa, kay harawita takiy Israel runa umallikunapaq:

²China leonmi mamaykiqa karqan, leonkunaq chawpinpi aswan allinninmi karqan, malta leonkunaq chawpinpin chutarayarqan, chaypitaqmi uñankunata uywarqan.

³Hukkaqtan wiñarqachirqan hatun kanankama. Mikhunanpaq chakuytapas yacharqanñan, hinaspan runataña mikhupurqan.

⁴Paymanta rimaqtan suyukuna uyarirqanku, toqllankupin hap'irqorqanku, llawq'anayoq fierrowanmi aysarqanku, Egipto suyumanmi aparqanku.

⁵China leonpa suyakuyninmi manapuniña kapurqanchu, hukkaq t'inintan hap'irqan, wiñanankamataqmi kallpacharqan.

⁶Hatun leonña kaspanmi, leonkuna chawpipi puriykacharqan, mikhunan hap'iyta yacharqan, hinaspan runataña oqorqan.

⁷Allin perqasqa wasikunatan q'asurqan, llaqtakunatan thunirqan, manchay qapariyninwanmi suyuntinta kuyurichirqan.

⁸Pay contran sayarimurqan qayllanpi suyukuna muyuriqninpi llaqtakuna. Llikankutan mast'arqanku, toqllankumanmi urmaykachirqanku.

⁹Jaulamanmi llawq'anayoq fierrokunawan aysaykurqanku, hinaspan Babilonia reyman aparqanku. Chaypin watay wasiman winarqanku, manañan pillapas waqyapakusqanta Israel orqokunapi uyarirqanñachu.

¹⁰Mamaykiqa uvas sach'amanmi rikch'akapurqan unu qayllapi mallkisqaman, k'allmasapan rurusapan karqan askha unu kasqanrayku.

¹¹K'allmankunan rakhullaña karqan, reykunaq champinpaqpas kusallaña sinchitan wiñarqan, phuyumanraqmi tariparqan, hatunllaña k'allmasapa kaqtin llapa runa rikurqan.

¹²K'arakta phiñakuspan t'irarqapurqanku, pampamantaq wikch'upurqanku. Inti lloqsiy rupha wayran ch'akichipurqan, chaymi uvaspa rurunpas urmapurqan. Rakhu k'allmankunapas ch'akipurqan, ninataq ruphaykapurqan.

¹³Kunantaq mallkisqa kashan ch'in pampapi, mana unuq kasqan ch'aki pampapi.

¹⁴K'allmanmantataq nina rawrarirqan, ruruntan ch'ikchintawan ruphapurqan. Rakhu k'allmankunan mana kanñachu reypa champinpaq, nispa. Kayqa aya p'ampanapaq harawin, aya p'ampanallapaqtaq takikunqapas.