Read Quechua Cuzco Bible 1988 EZEKIEL 20 Bible Online

EZEKIEL 20 - Quechua Cuzco Bible 1988 bible

EZEKIEL 20

¹Soqtakaq wataq phisqa killanpa chunka p'unchayninpin Israelpa wakin kurak runankuna Señor Dios tapukuq hamurqanku, hinaspan ñawpaqenpi tiyaykurqanku.

²Señor Diostaq niwarqan:

³Qan, runa, Israelpa kurak runankunata niy: Qollana Señor Diosmi nin: ¿Qankunari ñoqa tapuqchu hamushawankichis? Ñoqa Qollana Señor Diosmi sutiyrayku jurani: Manapunin qankunawanqa hayk'aqpas tapuchikusqaykichischu, nispa, nispayki.

⁴Qan, runa, ¿paykunata huchachankichu? ¿Huchachankipunichu? Chay hinaqa rikuchiy machulankuq millay ruwasqankunata,

⁵nillaytaq paykunata: Qollana Señor Diosmi nin: Israelta akllakushaspaymi Jacobpa mirayninkunaman sut'inta rimarirqani, Egipto suyupitaqmi paykunaman rikuchikuspa: Ñoqan Apu Señor Diosniykichisqa kani, nispa jurarqani.

⁶Chay p'unchaymi rimarirqani: Egiptomantan horqosqaykichis, qankunapaq akllasqay hallp'amanmi pusasqaykichis. Chay suyupiqa imaymanan hunt'asqa wiñan, llapan suyumantapas aswan allinmi chay suyuqa.

⁷Chay hinaqa sapankaykichis yupaychanaykichis millay rikch'aykunata wikch'uychis, ama qhellichakuychischu Egipto runakunaq wak'a diosninkuta yupaychaspaykichis. Ñoqan Apu Señor Diosniykichisqa kani, nispay.

⁸Paykunataq ñoqa contra churaykukuspanku mana uyariwarqankuchu, manan millay idolonkumantapas t'aqakurqankuchu, manallataq Egipto runakunaq wak'a diosninkuta wikch'urqankuchu. Chaymi ñoqaqa yuyaykurqani paykunaman phiñakuyniyta kachaykuspa, kikin Egiptollapiraq paykunata ñak'arichiyta phiñakuyniypas thasnukunankamaraq.

⁹Ichaqa manaraq chayta yuyaykushaspaymi paykunaman rikuchikurqaniña, nirqaniñataq chay suyumanta horqonaypaq. Chayraykun paykunataqa mana muchuchirqanichu Egipto runakunaq sutiyta mana pisichanankupaq.

¹⁰Chaymi Egiptomanta horqomurqani, hinaspan ch'inneqman pusarqani.

¹¹Chaypitaq reqsichirqani kamachikuyniykunata unanchasqa simiykunatawan, chaykunata kasukuq runaqa kawsanqan.

¹²Chaymantapas qollarqanitaqmi samana p'unchayniykunata paykunawan rimanakusqayta yuyarichiq kananpaq, hinallataq ñoqa Señor Diospuni paykunata ch'uyanchasqaytawan yuyarichinanpaq.

¹³Paykunan ichaqa ch'inneqpi contray sayarirqanku, manataq unanchasqay simiykunata kasukurqankuchu, kamachikuyniykunatapas mana munarqankuchu, hinaña kasukuqkunaqa kawsayta chaskinanku karqan chaypas. Samana p'unchayniytapas pasaqtapunin sarunchakurqanku. Chaymi yuyaykurqani paykunaman phiñakuyniyta chayachispa kasqan ch'inneqpi tukupuyta.

¹⁴Ichaqa sutiyta mana p'enqaman churayta munaspan mana chay llaqtakunaq qayllanpichu ruwarqani, paykunaq rikushasqan Egiptomanta horqomusqayrayku.

¹⁵Kaqllataq ch'inneqpipas jurarqani: Qankunataqa manan chay “qosaq” nisqay suyumanqa pusaykusqaykichischu, chay llapan suyumanta aswan allinnin imaymana hunt'asqa wiñaq suyumanqa.

¹⁶Qankunaqa manan kamachikuyniykunata munarqankichischu, unanchasqa simiykunatapas kasukurqankichischu, samana p'unchayniytapas saruncharqankichismi, wak'a dioskunaman sonqollikuspaykichis, nispa.

¹⁷Chaywanpas khuyallikuniraqmi, chaymi mana kaq ch'inneqpichu paykunata tukurparipurqani.

¹⁸Wawankunatataq nirqani: Machulaykichispa kamachisqantaqa ama ruwaychischu, ama paykunamanta yachaqakuychischu, amallataq wak'a diosninkuwanpas qhellichakuychischu.

¹⁹Ñoqan Apu Señor Diosniykichisqa kani, hunt'aychispuni llapan kamachikuyniykunata unanchasqay simiykunatawan.

²⁰Samana p'unchayniytapas ñoqapaq t'aqapuwaychis, chay hinapin qankunawan rimanakusqayta yuyarichiq kanqa, qankunataqmi reqsiwankichis ñoqa Apu Señor Diosniykichis kasqayta.

²¹Ichaqa chay miraymi contraypi sayarirqanku, manan kasukurqankuchu unanchasqa simiykunatapas, manallataq hunt'arqankuchu kamachikuyniykunatapas, hinaña kasukuqkunaqa kawsayta chaskinanku karqan chaypas, hinaspataq samana p'unchayniykunataqa saruncharqanku. Chaymi yuyaykurqani paykunaman phiñakuyniyta chayachispa kasqanpi tukupuyta, kaq ch'inneqpi phiñakuyniy thasnukunankama.

²²Ichaqa hinallañan karqani sutiy wak suyukunaq qayllanpi mana pisichasqa kananrayku, paykunapas rikushawarqankupuniñan Egiptomanta horqomusqaytaqa.

²³Ch'inneqpitaqmi jurarqani: Wak suyukunamanmi pachantinman ch'eqechisqaykichis,

²⁴qankunaqa manan kamachikuyniykunata hunt'arqankichischu, unanchasqa simiykunatapas manan munarqankichischu, samana p'unchayniytapas saruncharqankichismi, hinaspan machulaykichispa wak'a diosninkunaman sonqollikurqankichis.

²⁵Chaymi paykunaq contranpi mana allin unanchasqaykunatapas mana kawsanankupaq kamachikuykunatapas churarqani.

²⁶Hinatataq saqerparirqani wak'a diosninkuman phiwi wawankuta ninapi ruphachispa sacrificiota haywaspa qhellichakunankupaq. Chaytan ruwarqani q'aqchakunankupaq, hinaspataq ñoqa Señor Dios kasqayta reqsiwanankupaq, nispa, nispayki.

²⁷Chay hinaqa, qan, runa, Israel runakunata niy: Qollana Señor Diosmi nin: Kay hinakunapin machulaykichisqa pisichawaspa wikch'upuwarqanku:

²⁸Juraspa prometesqay hallp'aman chayllaraq pusaykushaqtiymi, suni orqota qhawarillasparaq, k'allmasapa mallkitawan rikuspallaraq, chaypi sacrificiota ruphachirqanku, ofrendatapas haywarqanku, q'apaq inciensotapas q'osñichirqanku, vino ofrendatapas hich'arqanku, chay hinata ruwaspan phiñachiwarqanku.

²⁹Ñoqataq tapukurqani: ¿Iman chay orqo patapi yupaychana cheqaskunaman risqaykichis? nispa, nispayki. (Hinan sutin kapurqan “orqo patapi yupaychana cheqas” nisqa.)

³⁰Chay hinaqa, niy Israel runakunata: Qollana Señor Diosmi nin: ¿Imanaqtinmi qankuna qhellichachiyta munankichis machulaykichiskuna hina? ¿Imanaqtinmi millay wak'a diosninkuta munapakunkichis?

³¹Wawaykichista ofrendapi ruphachispan qankunaqa wak'a diosniykichiswan qhellichakushallankichispuni. Yaw Israel runakuna, ¿chay hina kashasparaqtaqchu tapukuq hamuwankichis? Ñoqa Qollana Señor Diosmi sutiyrayku jurani: Manapunin qankunawanqa tapuchikusqaykichischu.

³²Qankunan ninkichis: Wakin suyukuna hinan kayta munayku, wakin llaqtakuna hinan kayta munayku, paykunaqa yupaychanku kurkumanta rumimanta ruwasqa dioskunatan, nispa. Ichaqa yuyaykusqaykichisqa manan hayk'aqpas hunt'akunqachu.

³³Ñoqa Qollana Señor Diosmi sutiyrayku jurani, qankunatan kamachisqaykichis k'arak phiñakuywan, kallpawan, atiywan ima.

³⁴Sinchi kallpayta phiñakuyniytawan rikuchispaymi ñoqa huñumusqaykichis lliw hinantin suyukunamanta ch'eqechisqa kashasqaykichis llaqtakunamantawan.

³⁵Suyukunaq ch'inneqninmanmi apasqaykichis, chaypitaq uya-uyapura taripasqaykichis,

³⁶imaynatachus machulaykichista tariparqani Egiptoq ch'inneqninpi chay hinata. Ñoqa Qollana Señor Diosmi chayta nini.

³⁷Ñoqan lliwta taripasqaykichis, imaynan huk michiqpas ovejankunata yupan hinata, hinaspataq rimanakuyniyman kasukuqta ruwasqaykichis.

³⁸Hinallataq qankunamanta t'aqasqaykichis mana kasukuqkunata ñoqa contra sayariqkunatawan. Hinaña hinantin tiyasqaykichis llaqtamanta horqomusqaykichis chaypas, chay t'aqarparisqa runakunaqa manapunin Israel suyumanqa haykunqakuchu. Hinan qankunaqa reqsiwankichis ñoqa Señor Dios kasqayta.

³⁹Yaw Israel llaqta, ñoqa Qollana Señor Diosmi niykichis: ¡Pasaychis! ¡Wak'a diosniykichista yupaychamuychis! Chaymantataq ichaqa cheqaqtapuni qankunaqa uyariwankichis, chay hinapin ch'uya sutiyta manaña pisichawankichischu, wak'a diosniykichista ofrendawan yupaychaspaykichis.

⁴⁰Llapa Israel runakunan suyunkupi ñoqata yupaychawanqaku ch'uya orqoy patapi, Israelpa suni orqonpi, chaypin sumaqta chaskikapusqaykichis. Chaypin munasaq ofrendaykichis haywawanaykichista, hinallataq chakraykichispa ñawpaq ñawinta apamunawaykichista llapan ch'uya qokuyniykichistapas.

⁴¹Lliw suyukunamanta ch'eqesqa kasqaykichis llaqtakunamantawan huñuspaymi, chaskisqaykichis sumaq q'apaq ofrendata hinaraq, llapa suyukunaq qhawarinanpaqtaqmi ruwasqaykichis ñoqallatapuni ch'uya Diosta hina yupaychawanaykichispaq.

⁴²Maypachachus machulaykichisman juraspa prometesqay Israel hallp'aman pusaykusqaykichis chaymi, reqsiwankichis ñoqa Señor Diosqa kasqayta.

⁴³Chaypin yuyarinkichis lliw millay ruwasqaykichista qhellichakusqaykichistapas, hinaspan qankunamantakama millakunkichis chay millay mana chaninkuna ruwasqaykichismanta.

⁴⁴Israel llaqta, ñoqan qankunata qhawarisqaykichis manan millay ruwasqaykichisman hinachu, manallataqmi waqllisqa ruwasqaykichiskunaman hinapaschu, aswanpas qhawarisqaykichisqa sutiyta hatunchanaypaqmi, chaypachan reqsiwankichis ñoqapuni Señor Diosqa kasqayta. Ñoqa Qollana Señor Diosmi chayta nini, nispayki.

⁴⁵Señor Diostaq niwarqan:

⁴⁶Qan, runa, uray ladoman kutirispa chay ladoman rimapayay, uray suyu sach'a-sach'a contra profetizay:

⁴⁷Chay sach'a-sach'ata niy: ¡Uyariy Señor Diospa siminta! Qollana Señor Diosmi nin: Ninawanmi kanaykusqayki, llapantan q'omertapas ch'akitapas ruphanqa. Chay ninataqmi rawranqa mana wañuspa, llapan runaq uyantataqmi qanqenqa, wichay suyumanta uray suyukama.

⁴⁸Hinan lliw pachantin yachanqaku ñoqa Señor Dios kanaykusqayta, ninataq mana wañunqachu, nispa, nispayki.

⁴⁹Ñoqataq nirqani: ¡Ikiraqmi, Señor Diosnilláy! Runakunaqa mana imatapas entiendespanku ninku: Yanqa thawtiqmi kayqa, nispanku, nispa.