Read Quechua Cuzco Bible 1988 EZEKIEL 21 Bible Online

EZEKIEL 21 - Quechua Cuzco Bible 1988 bible

EZEKIEL 21

¹Hinan Señor Diosqa niwarqan:

²Qan, runa, Jerusalenman kutirispa yupaychana wasi contra waqyakuy. Israel suyu contrapas profetizallaytaq:

³Señor Diosmi nin: Ñoqan awqayki tukupuni. Espadaytan horqomusaq, hinaspan sipirasqaykichis chanin runakunatapas huchasapakunatapas.

⁴Chaykuna ruwanaypaqmi espadayqa llapa runa contrapuni kanqa wichay suyumanta uray suyukama.

⁵Chaymi lliw pachantin yachanqaku ñoqa Señor Diosqa espadayta horqokuspayqa manaña waqaychakapuq kasqayta, nispa, nispayki.

⁶Chay hinaqa, llaqta runaq qayllanpi sinchi p'akisqa sonqoyoq khuyayta waqaykuy.

⁷¿Imamantan khuyayta waqaykushanki? nispa tapuykuqtinkutaq, ninki: Hatun llakin kanan kashan. Lliw pachantinmi laqhoyanqa mana k'atay kallpayoq kanankama, manan piqpapas kapunqachu kallpan, llapankun mancharikuymanta khatatatapunqaku. ¡Ñan chayarqamushanña! chayqa kanqapunin, nispayki. Ñoqa Qollana Señor Diosmi chayta nini, nispa.

⁸Señor Diosqa nillawarqantaqmi:

⁹Qan, runa, profetizaspa niy: Señor Diosmi nin: ¡Qhawariy espadata! ¡Qhawariy! Ñan llusk'achaspa ñawch'ichasqaña.

¹⁰Ñawch'ichasqañan runata sipiranapaq llusk'achasqan chhipipishan. Llaqtalláy, ama kusikuychischu, lliw muchuchiykunamantan kunankama asikurqankichis.

¹¹Sumaqtan llusk'achashanku espadataqa hukpa makinwan hap'iykunanpaq. Ñan ñawch'ichaspa chhipipisqaña kashan, runa wañuchiqman hap'iykachinapaq.

¹²Qan, runa, ¡qapariy! ¡Anchiy! Espadan llaqtayta muchuchinanpaq kashan, Israelpi llapan kamachikuqkunata ñak'arichinapaq. Llaqtaywan kuska wañunankupaqmi huchachasqa kashan, chhaynaqa takapakuyyá nanaymanta.

¹³Ñoqa Qollana Señor Diosmi llaqtayta probashani, paykunan p'ananayta pisicharqanku, chayqa paykunapaq manan allinchu.

¹⁴Chay hinaqa, profetizay, makiykiwantaq t'aqllapakuy. Espadaqa kuti-kutirispan waqtanqa, chayqa runa wañuchiq espadan, runa wañuchiq manchakuy espadan, llaqtata hinantin cheqasmanta qhawapayashan.

¹⁵Espadan lliwta llaksanqa, askhatataqmi urmachinqa. Llapan wasikunamanmi wañuchiq espadata churaykuni, espadaqa llusk'achasqan chhipipishan, wañurachinapaq ñawch'ichasqañan kashan.

¹⁶Yaw espada, pañamanpas lloq'emanpas kuchuy, may ladomanña kutirispapas kuchuy,

¹⁷ñoqapas t'aqllakusaqmi phiñakuyniy thaninankama, ñoqa Señor Diosmi chayta nini, nispayki.

¹⁸Señor Diostaq niwarqan:

¹⁹Qan, runa, iskay ñanta pampapi ruwarqoy, chayninta Babilonia reypa espadantin hamunanpaq. Iskaynin ñanmi kaq suyullamanta lloqsimunqa. Ñan palqay patapin willakuy qelqata churani, may llaqtamanchus chay ñan risqanta.

²⁰Huk ñanmi kanqa Amón runakunaq Rabá llaqtanman reypa espadantin rinanpaq, huk ñantaqmi kanqa Judá suyuq allin perqayoq Jerusalén llaqtanman reypa rinanpaq.

²¹Babilonia reytaq sayaykuspa iskaynin ñanpa palqariyninpi suerteta qhawan. Wach'inpin sortean, wasi diosninkunatan tapun, uywakunaq k'ipchannintan qhawan,

²²suerte qhawasqantaq lloqsin paña makinpi Jerusalén sutiwan churasqan wach'i. Chay suertetaq karqan perqa thunina carretakunata apanankupaq, lliwta wañuchinankupaq, soldadokunata kamachinanpaq, “maqanakusunchis” nispa qaparinanpaq, punkunta perqa thunina carretakunawan kumpachinankupaq, hallp'a montosqa seqanata ruwanankupaq, mana pipas ayqenanpaq hark'achita perqanankupaqwan.

²³Chay willakuytaq Jerusalén runakunaman llulla willakuyman rikch'akunqa, allinta rimanakusqanku hawa, chay willakuymi ichaqa paykunata yuyarichinqa mana allin ruwasqankumanta huchachasqa kasqankuta, rikuchinqataq paykuna hap'isqa kanankutawan.

²⁴Chayraykun ñoqa Qollana Señor Diosqa nini: Ancha sut'itapuni contraykichispi sayarispaykichismi yuyarichiwankichis huchasapapuni kasqaykichista. Tukuy ima ruwasqaykichispin huchasapa kasqaykichista sut'inchakunkichis. Chaykunamantan hap'irqosqa kankichis.

²⁵Yaw Israel suyu rey, millay mana chanin runa, qayllaykamushasunkiñan hatun ñak'ariyniykiqa.

²⁶Qollana Señor Diosmi nisunki: Qechusunkikun uma p'istunaykita, ch'utisunkin pilluykitapas. Lliw imaymanan huk hinaman t'ikrakunqa: K'umuchisqa kaqmi hatunchasqa kapunqa, hatunchasqa kaqtaqmi k'umuchisqa kapunqa.

²⁷Llapantapunin purunyachisaq, raqay-raqayllaña kanankama. Kaytaqmi qhepapunqa iman kaq raqay-raqay, cheqaqmantapuni kamachikuqpa hamunankama. Hinan payman qopusaq.

²⁸Kunantaq, qan, runa, profetizaspa niy: Qollana Señor Diosmi Israel runakuna k'amiq Amón runakunata nin: ¡Qhawariy espadata! ¡Qhawariy! Waqaychananmanta horqosqaña sipirananpaq, llusk'achasqañan wañurachinanpaq, illapa hinan lliphllikishan.

²⁹Yanqan rikhuriypi rikusqaykichisqa watusqaykichispas llullan. Qankunan yuyashankichis chay millay runakunata qhoruyta muchunan p'unchay chayamusqanrayku.

³⁰¡Manapunin! ¡Qan, espada, kutiykapuy waqaychanaykiman! Paqarisqaykichis cheqaspin taripasqaykichis, machulaykichispa suyunpin juzgasqaykichis,

³¹phiñakuyniytan chayachimusqaykichis, phiñakuspaymi contraykichispi rawrarisaqraq, awqa sonqo runakunamanmi hap'ichisqaykichis, yana alma runakunamanmi qaraykusqakichis.

³²Ruphachisqan kapunki, yawarniykin suyuykiman ch'eqeykunqa, manataqmi qanmanta pipas yuyarinqañachu, ñoqa Señor Diospa nisqayrayku, nispayki.