Read Quechua Cuzco Bible 1988 EZEKIEL 23 Bible Online

EZEKIEL 23 - Quechua Cuzco Bible 1988 bible

EZEKIEL 23

²Qan, runa, uyariway. Iskay warmikunan karqan huk mamaq ususinkunalla.

³Chay sipaskunan warma kayninkumantapacha Egipto suyupi qhelli puriyta yachaykapurqanku. Chaypin hinallata ñuñunkuta q'apichikurqanku, hinaspan doncella kayninkuta chinkachikapurqanku.

⁴Kurakkaqpa sutinmi Ahola, chaymi Samaria karqan, sullk'akaqtaq Aholiba, chayñataq Jerusalén karqan. Paykunaqa ñoqaqmi karqan, wachapuwarqankutaq wawakunata warmitaraq qharitaraq.

⁵Ahola kaqqa ñoqaqña kashaspapas qhelli kawsayllapin purisharqan, paymantakaman parlaqmasin qharikunata maskharqan.

⁶Chaykunataqmi karqan Asiria soldadokuna sumaq sani-puka p'achayoq, llapankutaq kamachikuq umakuna, sumaq rikch'ayniyoq waynakuna caballopi sillarqarisqakama.

⁷Asiria runakunamanta aswan allinninkunawanmi Aholaqa wasanchakurqan, wak'a diosninkunawanpas sonqonta suwachikuspan qhellichakurqan.

⁸Egiptopi kasqanmantapachan qhellipi puriyta yachaykapurqan, chaytataqmi manaña qonqanñachu. Warma sipas kasqanmantapachan lliwpas paywan purikullarqan, hinalla ñuñuntapas q'apichikurqan, munasqankutan ima qhelli huchatapas paywan ruwarqanku.

⁹Chayraykun munaqnin Asiria qharikunaq makinman qoykapurqani, sonqonta chaykunawan suwachikusqanrayku.

¹⁰Hinan paykunaqa alqochaykapurqanku, chaymantataq churinkunata ususinkunatawan qechupurqanku, paytataq espadawan wañuchipurqan. Chay hinatan huchanmanta muchuchisqa karqan, runaq siminpitaq karqan.

¹¹Ñañan Aholibataq chayta rikurqan, chaywanpas payqa ñañanmanta aswantaraqmi sonqonta suwachikuspa qhellipi puriykapurqan.

¹²Payqa Asiria qharikunawanmi sonqonta suwachikurqan, paykunaqa llapallankun kamachikuq umakuna kanku, allin maqanakuq munay p'achayoq sumaq rikch'ayniyoq waynakuna caballopi sillarqarisqa.

¹³Chaypin repararqani paypas ñañanpa purisqanta hina purispa qhellichakusqanta.

¹⁴Aholibaqa aswan millay qhelli puriqmi karqan. Paymi rikurqan perqakunapi ch'eqospa ruwasqa pukawan llunch'isqa Babilonia runakunata, llapankutaq umallikunaman rikch'akuq karqanku, kamachikuq hina, chumpikunayoq, uman watarqarisqa.

¹⁵

¹⁶Chay Babilonia runakunata rikurqospan, paykunawan sonqonta suwachikurqan, hinaspan Babiloniakamaraq waqyamuqkunata kacharqan.

¹⁷Babiloniamanta runakunataq hamuspa paywan munanakurqanku, hinaspa puñurqanku, aychankuta mana watakuspan payta qhellichaykapurqanku. Pasaqtapuni qhellichaykakapurqan qhepaman paykunata millakapunankamaraq.

¹⁸Hinaspan sut'itapuni qhelli puriyta yachaykapurqan, q'ala kaynintapas rikuchikusparaq, kurak ñañanta millakurqani chay hinata paytapas millakunaykamaraq.

¹⁹Ichaqa aswan-aswantaraqmi qhellipi puriyman qoykakapurqan, Egiptopi sipas kaspa qhellipi purisqantaraqmi yuyarisharqan.

²⁰Hinaspan Egipto runakunawan sonqonta suwachikurqan, asno hina caballo hina warmimanta phawaykachaq chay runakunawan.

²¹Chay hinapin, qan Aholibaqa sipas kaspa kacharisqa phawaykachanaykimanta hawapi ukhupi sonqoyoq karqanki, Egipto runakunaq ñuñuyki q'apinanmanta.

²²Chay hinaqa, yaw Aholiba, ñoqa Qollana Señor Diosmi niyki: Chay millakusqayki wayllukuqniykikunatan awqaykiman tukuchisaq, hinantinmantan contraykipi hamuchisaq.

²³Babiloniamanta Kaldea runakuna, Pekod suyu runakuna, Shoa suyu runakuna, Koa suyu runakuna, hinallataq llapan Asiria runakunapas hamunqaku, llapankun paykunaqa kanku sumaq rikch'ayniyoq waynakuna, uma kamachikuqkuna, oficialkuna, umallikunapiwan, llapankutaq paykunaqa caballopikama.

²⁴Wichaymantapachan qan contra hamunqaku maqanakunapaq carretakunayoq, mikhuy apaq carretakunayoq, askha soldadokuna cascokunayoq escudokunayoq, hinantin ladoykimantan muyuykusunkiku. Ñoqan paykunaman hap'iykachisqayki muchuchinasuykichispaq, paykunataqmi ñak'arichisunkichis paykunaq kamachikuy siminkunaman hina.

²⁵Ñoqan k'araktapuni qanwan phiñakusaq, chaymi paykunapas k'arakta phiñakuspa muchuchisunkiku, senqaykita ninriykitapas qhorusunkikun, qhepaq runakunatapas espadawanmi sipiranqaku. Churiykikunata ususiykikunatapas lliwtan qechusunki, qhepallatañataqmi puchuqkunaqa ninaq ruphasqan kapunqa.

²⁶P'achaykikunatan ch'utisunkiku, k'achanchakunayki qori-qolqetan kaqnichakapunqa.

²⁷Chay hinapin kacharisqa phawaykachanaykita, Egipto runakunawan qhellipi purinaykitawan p'uchukachisaq, manañataqmi chaykuna ruwayta munapayankiñachu, Egipto suyumantapas yuyarinkiñachu, nispa.

²⁸Qollana Señor Diosmi nin: Chay millakuspa cheqnikusqayki suyukunaq makinmanmi hinata hap'iykachisqayki.

²⁹Paykunapas qanta cheqnikullasunkitaqmi, llank'apakuspa tarisqaykitan kaqnichakapunqaku, hinaspan q'ala chichita wikch'upusunkiku aychaykipas q'ala-q'ala kanankama, millay qhellipi puriyman qoykakapusqaykimanta. Kacharisqa qhelli puriypi phawaykachayniykin

³⁰kaykuna kanasuykipaq karqan, qanmi chay suyukunawan qhellipi purirqanki, wak'a diosninkuta yupaychaysikuspaykitaq pisichakurqanki.

³¹Ñañayki kasqan puriqtiykin chay kikin muchuy qeruta qoyki pay hina muchunaykipaq, nispa.

³²Chayraykun Qollana Señor Diosqa nin: Ñañaykiq ukyasqan qerutan qanpas ukyallankitaq, maqma p'uktu hatun qeruta. Chay qeruq hunt'a kasqanwanmi macharqapunki, runakunataq qanmanta asikunqaku pisichaspanku.

³³Chay Samaria ñañaykiq qerunqa q'alayaywan phutikuywan hunt'aykusqan kashan, chaywanmi machanki t'ili kanaykikama, pasaq llakisqa khuyay kanaykikama.

³⁴Machaykuspaykin qerutaraq ch'akichinki, chaymantapas ñut'ullataña chhallunki, chhallusqa k'arpawantaq ñuñuykitapas mat'akunki. Ñoqa Qollana Señor Diosmi rimani, ñoqan simiyta kacharini, nispan.

³⁵Chayraykun ñoqa Qollana Señor Diosqa nini: Ñoqata qonqapuwaspaykin wasanchawarqanki, chayraykun ñak'arinkipuni kacharisqa purispa qhellipi purisqaykimanta, nispa.

³⁶Señor Diosqa nillawarqantaqmi: Qan, runa, ¿huchachankichu Aholata Aholibatawan? Chay hinaqa, uyanpi laq'ay millay p'enqay ruwasqankunata.

³⁷Paykunan wasanchaqkuna runa wañuchiqkuna. Paykunan wak'a dioskunata yupaychaspanku wasanchawanku, ñoqapaq wachakusqanku wawakunatan wañuchirqanku wak'a diosninkuman ruphachispa.

³⁸Chay p'unchaykunapiqa aswankunataraqmi ruwarqanku, ñoqa yupaychana wasita qhellichaspanku samana p'unchayniytapas pisicharqanku.

³⁹Wak'a diosninkuta yupaychaspa wawanku kanasqanku p'unchaymi ch'uya wasiyman hamurqanku, hinaspan qhellicharqanku. ¡Chay hinatan wasiypiraqtaq ruwarqanku!

⁴⁰Karu llaqtamantan waqyaqkunawan qharikunata pusachikurqan. Chaykuna chayamuqtintaq iskaynin ñañantin warmikunaqa maqchikuspanku ñawinkuta llusikurqanku, qori-qolqemanta k'achanchanawantaq churakurqanku.

⁴¹Tiyaykurqankutaq k'achanchasqa puñunapi, mesapas wakichisqallamanña, chaymantaq churaykurqanku ñoqapaq t'aqasqa ch'uya inciensoyta aceiteytawan.

⁴²Chaymantataq uyarikurqan askha runaq kusikuymanta ch'aqwasqan, chaykunaqa ch'inneqmanta hamuq machasqa runakunan karqanku. Paykunan warmikunaq makinman chipanata churaspa sumaq pilluwan churarqanku.

⁴³Ñoqataq chay qhelli puriypi payayaq warmimanta nirqani: Qhellipi puriq warmitaqa qhelli kawsayninman hina rikuchunku, payqa chay hinapunin, nispa.

⁴⁴Chay machasqa runakunataq sapa kutilla puñurqanku chay millay Aholawan Aholibapiwan, rabona warmiwan puñuq runakuna hina.

⁴⁵Ichaqa chanin runakunan paykunaman tupaqnin sentenciata unanchanqaku qhellipi purisqankumanta, runa wañuchisqankumantawan, paykunaqa qhellipi puriq warmikuna runa wañuchiqkuna kasqankurayku, nispa.

⁴⁶Qollana Señor Diosmi nin: Paykuna contra sayarichun askha ch'aqwaqkuna, hinaspa sinchita llaksarqospa llat'anachunkuraqtaq.

⁴⁷Llapan ch'aqwaqkunataq rumiwan ch'aqespa espadawan sipipachun, wañuchichunkuqa churinkuta ususinkuta, hinaspataq wasinkutapas kanaykuchunku.

⁴⁸Ñoqan suyumanta ch'usaqyachisaq kay millay huchakunata. Chay hinapitaqmi llapan warmikuna yachanqaku, hinaspan manaña qhellipi purinqakuñachu.

⁴⁹Chay iskay warmikunataqmi ichaqa qhellipi purisqankumanta, wak'a dioskuna yupaychaysikusqan huchankumantawan ñak'ariyta chaskinqakupuni. Chay hinapin paykuna reqsiwanqaku ñoqallapuni Qollana Señor Dios kasqayta, nispa.