Read Quechua Cuzco Bible 1988 EZEKIEL 26 Bible Online

EZEKIEL 26 - Quechua Cuzco Bible 1988 bible

EZEKIEL 26

¹Chunka hukniyoq wataq ñawpaqkaq killanpa qallariynin p'unchaymi Señor Diosqa niwarqan:

²Qan, runa, uyariway, Tiro llaqta runakunan Jerusalenmanta nirqanku: ¡Waleq! ¡Jerusalenqa thunisqan kapushan! Chaynintapunin llapan suyuman riqpas purirqan. Jerusalenqa purunyachisqañan kapushan, kunanqa ñoqañataq qhapaqyasaq, nispa.

³Chayraykun ñoqa Qollana Señor Diosqa nini: Yaw Tiro llaqta, qanpa awqaykin kani, askha suyukunatan qan contra kachamusaq mama qochaq phoqchiqeyninta hinaraq.

⁴Perqaykikunatan thuninqaku, torreykikunatan kumpanqaku. Hallp'aykitapas lliwtan pichachisaq, llusk'a qaqallatañan saqesqayki.

⁵Mama qocha ukhupin qhepakunki llika ch'akichina qaqa hinan kanki, ñoqa Qollana Señor Diosmi chayta nini. Qan Tiro llaqtan suyukunaq llat'anasqan kanki,

⁶mama qocha pata hallp'api tiyaq runaykikunan espadaq ñawch'inpi wañunqaku. Chay hinapin reqsiwanki ñoqa Señor Dios kasqaytaqa, nispa.

⁷Ñoqa Qollana Señor Diosmi nillanitaq: Yaw Tiro llaqta, wichay ladomantan qan contra Babilonia rey Nabukodonosorta apamusaq. Chay sinchi munayniyoq reytan pusamusaq caballokunayoqta carretakunayoqta allin sillakuy yachaq soldadokunayoqta askha runakunayoqta.

⁸Espadawanmi wañurqarichinqa mama qocha pata hallp'api tiyaq runaykikunata, muyuriqniykipin mana pipas ayqenanpaq hark'achita ruwanqa, hallp'a montosqa seqanatan perqa muyuriqniykipi ruwanqa. Escudowan pakasqa soldadokunan qan contra phawaykamunqaku.

⁹Perqa thunina carretakunawanmi perqaykita takanqa, Torreykikunatan q'asushaspalla thuninqaku.

¹⁰Perqa q'asanta phawaykuq soldado hina Babilonia rey punkuykita haykumuqtinmi, caballoq aysasqan llapan carretakunaq phawasqanwan perqakunaraq chhaphchikunqa. Askha caballonkunaq q'osñichisqanwanmi p'ampasunkiraq,

¹¹caballonkunaq sillunkunan calleykikunata t'ustunqa. Paymi runaykita espadawan wañuchinqa, wasi tanqaq tusaykikunatan thunirqarinqa.

¹²Qhapaq-kayniykikunatan llat'anasunkiku, qhatunaykikunatan suwaykusunkiku. Perqaykikunatan thuniykunqaku, sumaq wasiykikunatan lliwta kumpaykunqaku. Rumiykikunata, kurkuykikunatapas, llapa thunisqa kaqtapas, mama qochamanmi wikch'uykunqaku.

¹³Chay hinapin takisqaykita ch'inyachisaq manañataqmi arpaykiq waqasqanpas uyarikunqachu.

¹⁴Llusk'a qaqamanmi tukuchisqayki, mama qocha ukhupi llika ch'akichina qaqaman. Manataq hayk'aqpas sayarinkiñachu, ñoqa Qollana Señor Diosmi chayta nini, nispa.

¹⁵Ñoqa Qollana Señor Diosmi Tiro llaqtamanta nillanitaq: Qan thunisqa rikukuqtiyki, k'irisqakuna nanaymanta anananaqtinkun, runaykikuna wañuraqtinkun, mama qocha muyuriq pata suyukunapi tiyaqkuna khatatatanqaku.

¹⁶Chay suyukunaq reyninkunan kamachikuy tiyanankumanta uraykunqaku, hinaspan llaqollankuta sumaq k'achanchasqa p'achankutapas ch'utikunqaku. Qanta rikuspataq llaksasqa q'aqchasqaraq pampapi tiyanqaku khatatatakuspallaña.

¹⁷Hinaspan kay harawita takipusunkiku: ¡Ikiraqmi thunisqa kashanki! ¡Imaraqmi qochamanta ch'usaqyarqapunki, lliwpa reqsisqan llaqta! Qanqa runakunantinmi mama qochapi munayniyoq karqanki, qanqa mama qocha muyuriqpi suyukunatan q'aqcharqanki.

¹⁸Kunan urmaykapuqtiykin, mama qocha muyuriqpi suyukuna manchakuymanta khatatatanku. Kunan ch'usaq tukurqapuqtiykin, mama qochapi islakuna llaksakunku, nispa.

¹⁹Ñoqa Qollana Señor Diosmi nini: Runaq mana tiyananta hinan raqay-raqay kanaykikama thunisqayki. Mama qochawanmi millp'uchisqayki,

²⁰hinaspan chinkaykachisunki wañuqkunaq kasqankamaraq, ñawpa runakunaq kasqanman. Wiñaypaq raqay-raqay kaq ukhumanmi wikch'uykusqayki, wañupuqkunawan kuskan kapunki. Chaymantaqa manapuniñan kutimunkiñachu, manataqmi wakmanta sayarichisqañachu kanki kay pachapi tiyaqkunawan kanaykipaq.

²¹Manchakuymanpunin tukuchisqayki, hinan mana kapunkipunichu. Maskhasunkikun, manapunitaq pillapas tarisunkikuñachu. Ñoqa Qollana Señor Diosmi chayta nini, nispa.