Read Quechua Cuzco Bible 1988 EZEKIEL 27 Bible Online

EZEKIEL 27 - Quechua Cuzco Bible 1988 bible

EZEKIEL 27

¹Señor Diosmi niwarqan:

²Qan, runa, Tiro llaqtamanta kay harawita takipuy.

³Chay llaqtamantan lloqsinku mama qochan puriqkuna, chay llaqtataqmi mama qocha muyuriq patapi lliw suyukunawan rantinakuq vendenakuq. Chay hinaqa niy: Qollana Señor Diosmi nin: Tiro llaqta, qanmi nisharqanki: Ñoqaqa sumaq munaychapunin kani, nispayki.

⁴Mama qochatapas munaychakurqankin, ruwaqniykikunan sumaq k'acha barcota hina ruwarqasunkiku.

⁵Senir nisqa Hermón orqo sach'a-sach'amanta pino kurkukuna apamusqawanmi ruwarqasunkiku, sayaq k'aspiykitapas Líbano cedromantan ruwarqanku.

⁶Basán suyu roble sach'amantan lloqena k'aspiykitapas ruwarqanku, Chipre islamanta apamusqa ciprés kurkuwanmi ukhu pampaykita mast'arqanku, marfilwanmi cheqas-cheqasman churarqanku.

⁷Wayraq tanqanan telaykipas Egiptomanta apamusqa linomantan, sumaq qerqesqan karqan sut'i reqsiy kananpaq. Mama qocha pata Elisa llaqtamanta apamusqa morado pañomanta, puka pañomantawanmi qataykipas karqan.

⁸Sidón llaqtamanta Arvad llaqtamantawanmi lloqena qachiqniykikunapas hamurqanku, barco purichiqkunapas allin yachayniyoqkunan karqan.

⁹Gebalmanta allichachaq runakunan p'akikuqkunata yachaywan allicharqanku, mama qochan puriq llapan barcokuna purichiqmi qayllaykamuspa qhatunaykikunata comerciarqanku.

¹⁰Persiamanta, Lidiamanta, Libiamantawanmi runakuna maqanakuypi sayaysirqasunki, sumaqcharqasunkin escudonkuta casconkutawan perqa muyuriqniykiman warkuspanku.

¹¹Arvad runakunan Helek runakunapiwan perqayki muyuriqpi sayarayarqanku, kaqllataq torreykikunapipas Gamad runakuna karqanku. Perqa muyuriqniykimanmi escudonkuta warkurqanku, aswan munaycha kanaykipaq.

¹²Askhan karqan tukuy imaymana qhapaq-kayniyki, chaymi España suyu runakunaqa qhatunaykikunamanta qanwan cambiaspa qorqasunki qolqeta, fierrota, estañota, tititawan.

¹³Kaqllataq Grecia runawan, Tubal runawan, Mesek runawanpas rantinakurqankichis, paykunan qorqasunki imaymana kaqniykikunamanta kamachi runakunata, broncemanta imaymanakunatawan.

¹⁴Bet-togarma runakunataq qhatunaykikunamanta qorqasunki llank'aq caballonkunata, sillakunan caballonkunata, mulankunatawan.

¹⁵Rodas isla runakunataq qanwan rantinakuq. Mama qocha muyuriq pata askha suyukunawanmi rantinakurqanki, paykunataqmi pagarqasunki marfil nisqa elefanteq waqsankunata, ébano kurkukunatawan.

¹⁶Askha ruwasqaykikuna kaqtinmi Edom runakuna qanwan rantinakurqan, qhatunaykikunamanta paykuna qorqasunkiku siwar umiñakunata, puka umiñakunata, mama qochamanta horqosqa coral nisqa umiñakunata, yana-puka telakunata, bordasqa telakunata, lino telakunatawan.

¹⁷Chay hinallataq qanwan rantinakurqan Judá runakunapas Israel runakunapas, paykunan pagarqasunkiku Minit llaqtamanta trigota, misk'i t'antakunata, miel misk'ita, aceiteta, balsamotawan.

¹⁸Askha qhapaq-kayniykipas ruwasqaykipas kaqtin, Damasco llaqta runakunaqa rantikurqasunki Helbón vinowan Sahar millmapiwan,

¹⁹kaqllataq Uzal llaqta vinowanpas. Apamullarqasunkitaq fierro takasqata, canelata, sumaq q'apaq cañatawan qhatusqaykiwan cambianapaq.

²⁰Dedán llaqtapas qanwan rantinakurqan, venderqasunkitaq caballo caronakunata.

²¹Arabia runakuna Kidar suyu qollana runakunapiwan qanpa rantikuqniyki karqanku. Pagapurqasunkitaq borregokunata, anejokunata, orqo cabrakunatawan.

²²Sabá suyumanta Raama suyumantawan rantikuq puriqkunan qanpa rantikuqniyki karqan, pagarqasunkitaq allinninkaq q'apaq hawinakunata, sumaq umiña rumikunata, qoritawan.

²³Qanwanmi rantinakurqanku Harán llaqta, Kanne llaqta, Edén llaqta, Sabá suyumanta rantiqkuna, Asiria suyu llaqtakuna, Kilmad suyu llaqtakunapas.

²⁴Paykunan plazaykipi venderqanku sumaq p'achakunata, yana-puka telakunata, sumaq qerqesqa p'achakunata, imaymana color chusikunata, allin chiwiqeñakunatawan.

²⁵Mama qochaq aswan ukhun puriq barcokunan qhatunaykikunata aparqanku. Askha llasa q'epikunawan hunt'aykachisqa mama qochapi barco hinan karqanki.

²⁶Lloqeqniykikunapas aswan ukhuntan aparqasunki, chaypin inti lloqsimuy lado wayra wayrarimuspan p'akirqasunki.

²⁷Qhapaq-kayniykikuna, qhatunaykikuna, ruwasqaykikuna, qochapi llank'aqniykikuna, lloqenawan lloqeqniykikuna, p'akikuqta allichaqniykikuna, qhatuqniykikuna, llapan soldadoykikuna, llapan qanwan kashaqkunapas mama qochaq pachanmanraqmi chinkaykapurqanku wayraq p'akisqan kasqayki p'unchaypi.

²⁸Barcopi llank'aqniykikuna qapariqtinmi, mama qocha muyuriq pata suyukuna chhaphchikurqanku.

²⁹Lloqenawan lloqeqkunan barconkuta wikch'upurqanku, barcopi llank'aqkunapas barcota llapan purichiqkunapas mama qocha patapi qhepakurqanku.

³⁰Pacha kuyuytan qaparinku, qanmantan unuy-parata waqanku, hallp'awanmi umankuman hach'ikunku, uspha qontupin qhospanku.

³¹Qanmanta llakikuspan chukchankuta rutukunku, yana p'achawanmi churakunku, qanmantan khuyaytapuni waqaykunku.

³²Qanpaqmi harawita takipusunkiku, chaypin khuyay llakisqa ninqaku: ¿Pitaq Tiroman kuskachakunman karqan mama qochaq sonqonpi ch'usaq llaqtamanri? nispa.

³³Qhatunaykikunata wak suyukunaman apachiqtiykin, askha suyukuna saksachisqa karqanku, askha ruwasqaykikunawan, qhapaq-kayniykikunapiwan kay pacha reykunata qhapaqyachirqanki.

³⁴Kunantaq qochapi p'akirqosqa kapushanki unuq pachanpiraq chinkaykusqa. Ruwasqaykikunapas lliw runaykikunapas qanwan kuskan chinkaykapurqanku.

³⁵Mama qocha muyuriq pata llapan suyukunan qanmanta llaksasqaraq kashanku, reyninkupas lliwmi mancharisqa kashanku, sut'in uyankupas kashan.

³⁶Wak suyukunamanta qhatirakunapas pasaqtan mancharikunku qanta rikuspa, sinchi manchakuyraqmi kapushanki, wiñaypaqmi chinkaripunki, nispa.