Read Quechua Cuzco Bible 1988 EZEKIEL 28 Bible Online

EZEKIEL 28 - Quechua Cuzco Bible 1988 bible

EZEKIEL 28

¹Señor Diosmi niwarqan:

²Qan, runa, Tiro llaqta reyta niy: Qollana Señor Diosmi nin: Sinchi uma hoqariq kasqaykiwanmi ninki: Diosñan kani, mama qochaq chawpinpi huk diospa tiyananpi tiyaspay, nispayki. Hinaña yachaysapa kaspa diosman yupakunki chaypas, qanqa runallan kanki, manan dioschu.

³¿Danelmanta aswan yachaysapachu kanki? ¿Lliw imaymana yachaqchu kanki?

⁴Yachayniyoq kayniykiwan, yuyayniyoq kayniykipiwanmi sinchitapuni qhapaqyarqanki, k'ullu pitakaykitapas qori-qolqewanmi hunt'aykachirqanki.

⁵Qhatuypaq kusallaña kasqaykiwanmi qhapaq-kayniykita yapaykukurqanki, qhapaq-kayniykitaqmi umata hoqarichirqasunki.

⁶Chayraykun ñoqa Qollana Señor Diosqa nini: Yachaysapa kasqaykiwan huk diosmanta yupakunki chayqa,

⁷wak llaqtayoqkunatan contraykipi pusamusaq, sinchi yana alma runakunatan kachamusaq, hina sumaqta yachayniyoqtapacha espadanwan wañuchinasuykipaq, k'acha kayniykipas pampatan phawanqa.

⁸Manchay ukhumanmi chinkaykapunki, qochaq millp'usqanmi qonqaylla wañupunki.

⁹¿Qanta wañuchiy munaqkunaq qayllanpipas: Ñoqaqa diosmi kani, niwaqchu? Wañuchiqniykikunaq qayllanpiqa, yanqa runallan kanki, manan dioschu.

¹⁰Wak llaqtayoqkunaq makinpin wañunki, imaynan mana iñiqkuna wañunku hinata. Ñoqa Qollana Señor Diosmi chayta nini, nispayki.

¹¹Señor Diosmi niwarqan:

¹²Qan, runa, Tiro llaqta reymanta kay harawita takispa niy: Qollana Señor Diosmi nin: Kawsayniykipin rikukurqan lliw imapas k'apakkama, yachaywan hunt'aykusqa, ima sumaq k'achallañan karqanki.

¹³Diospa huertan Edén ukhupin tiyakurqanki, imaymana rikch'aq umiña rumikunawanmi k'achanchasqa karqanki, puka umiñawan, q'ellu umiñawan, ch'ila-qespi umiñawan, q'omer umiñawan, yanayoq-yuraq umiñawan, yana-puka umiñawan, anqas umiñawan, siwar umiñawan, nina-q'ellu qespi umiñapiwan. K'achanchakunaykiqa qorimantan karqan, kamasqa kasqayki p'unchaymantañan chaykunaqa ruwasqa karqan.

¹⁴Huk manchakuy raphrayoqtan churarqani qanta qhawananpaq, Diospa ch'uya orqonpin kasharqanki, chhipipiq rumikuna chawpipin puriykacharqanki.

¹⁵Ruwayniykikunapas allinmi karqan kamasqa kasqayki p'unchaymantapacha mana chanin hucha ruwasqayki p'unchaykama.

¹⁶Ancha askha qhatunayki hawan waq'a sonqoman tukurqanki, hinaspa huchallikurqanki. Chaymi ch'uya orqoymanta wikch'upurqayki, qhawaqniyki raphrayoqtaq chhipipiq rumikuna chawpimanta wikch'umpurqasunki.

¹⁷Munay kayniykiwanmi umata hoqarirqanki, mentasqa-kayta munaspan yachayniykita waqllichirqanki. Chaymi ñoqaqa pampaman wikch'umpurqayki, reykunaq ñawpaqenpipas asipayanamanmi tukuchirqayki.

¹⁸Askhatan huchallikurqanki, qhatusqaykipin runakunamanta suwakurqanki, chay hinapin yupaychana wasiykikunata qhellichakurqanki. Hinan ninawan llaqtaykita pasaqta pulachipurqanki, kunanqa lliwmi pampapi rikusunkiku usphaman tukusqata.

¹⁹Reqsiqniyki lliw suyukunan qanta rikuspa llaksakunku, millay mancharikuymanmi tukupunki, wiñaypaqmi qanqa chinkapunki, nispan, nispayki.

²⁰Señor Diosmi niwarqan:

²¹Qan, runa, Sidón llaqtaman kutirispa contranpi niy:

²²Qollana Señor Diosmi nin: Sidón llaqta, ñoqan awqayki kapuni, qanta chinkachispaymi hatunchasqa kasaq. Runaykita muchuchispaymi, ch'uya kayniyta rikuchikuqtiymi, ñoqapuni Señor Diosqa kasqayta reqsiwanqaku.

²³Onqoykunawanmi kachaykusqayki, calleykikunatapas yawar unun puririnqa. Runaykikunapas wañusqan urmaykapunqa llapa ladomanta phawaykuspa espadawan sipisqa. Chaypin reqsiwanqaku ñoqa Señor Diosqa kasqayta, nispa, nispayki.

²⁴Señor Diosmi niwarqan: Israelpa qorpanpin pisichaqnin llaqtakuna karqan, khiskawan allaspa nanachiqnin hina, chaykunaqa manan kapunqakuñachu. Hinan ñoqa Señor Diosqa kasqayta reqsiwanqaku, nispa.

²⁵Qollana Señor Diosmi nillawarqantaq: Ñoqan Israel runakunata hinantin llaqtapi ch'eqechisqamanta huñumusaq, chay hinapin ch'uya-kayniyta lliw suyukunaman rikuchisaq. Kamachiy Jacobman qosqay suyupipunin Israel runakunaqa tiyakapunqa.

²⁶Chaypin mana ima llakillayoq tiyakapunqaku, wasikunatapas hatarichikunqaku, uvas chakrakunatapas llank'akunqaku. Ñoqataqmi Israel llaqtaq llapan pisichaqnin llaqtakunata muchuchisaq, chay hinapin Apu Señor Diosninku kasqayta yachanqaku, nispa.