Read Quechua Cuzco Bible 1988 EZEKIEL 29 Bible Online

EZEKIEL 29 - Quechua Cuzco Bible 1988 bible

EZEKIEL 29

¹Chunka wataq chunka killanpa chunka iskayniyoq p'unchayninpin Señor Diosqa niwarqan:

²Qan, runa, Egipto rey Faraonman kutirispa pay contra llapan Egipto suyu runakuna contrapiwan niy:

³Qollana Señor Diosmi nin: Egipto suyu rey Faraón, qanmi kanki hatun cocodrilo hina mayuykikunapi wikch'urayaq. Qanmi ninki: Nilo mayuqa ñoqaqmi, ñoqapaqpunin ruwakurqani, nispayki. Kunantaqmi ñoqa awqayki kani.

⁴Qhaqlliykimantan ganchowan aysasqayki, mayuykikunapi challwakunatan sarphaykiman k'askapachimuspa, llapan challwakuna sarphaykipi warkuykusqata horqosqayki.

⁵Ch'inneqmanmi wikch'urparisqayki mayuykikunapi llapan challwatawan. Hinan q'ala pampaman urmaykunki, manataqmi pipas hoqarisunkichu p'ampanasuykipaq. Salqa animalkunan mikhusunki, alton phalaq ankakunan t'aphsasunki.

⁶Egiptopi llapan runakunan reqsiwanqaku ñoqa Señor Diosqa kasqayta. Israel llaqtan hap'ipaykukuyta munarqasunki, ichaqa soqos hinallataq kasqanki.

⁷K'iraykukuspa tawnakusuqtiykikun qanqa p'akikuspa waqtannintaraq allarqanki. Qanman hap'ipaykukuyta munaqtinkun p'akikuspa wasantaraq k'irirqanki.

⁸Chayraykun ñoqa Qollana Señor Diosqa nini: Contraykipin espadantinwan phawaykachisqayki, hinaspan runaykikunatapas uywaykikunatapas lliwta wañuchisaq.

⁹Yanqa ch'in nisqamanmi tukuchisqayki, hinan runaykikuna reqsiwanqaku ñoqa Señor Diosqa kasqayta. Qantaq nirqanki: Nilo mayuqa ñoqaqmi, ñoqaq ruwakusqaymi, nispayki.

¹⁰Chayraykun ñoqaqa kunan qan contra mayuykikuna contrapiwan kapuni, chaymi kunan mancharikuy ch'inneq mana runayoq yanqa purunman tukuchisqayki wichay qorpa Migdol llaqtamanta Etiopía suyu qorpapi Aswán nisqa llaqtakamaraq.

¹¹Runapas uywakunapas chaynintaqa manan purinqachu, manataqmi pipas tawa chunka watantin chaypi tiyanqachu.

¹²Yaw Egipto, qantan tukuchisqayki yanqa purun suyuman. Tawa chunka watantinmi lliw llaqtaykikuna purunyasqa kanqa, wakin llaqtakunamantapas aswan raqay-raqayraq, runaykikunatataqmi ch'eqerparichispa wak llaqtakunaman suyukunamanwan aparparichisaq.

¹³Chaywanpas ñoqa Qollana Señor Diosmi nini: Tawa chunka wata qhepataqa Egipto runakunata kaqtan huñuykapusaq, may suyukunapichus ch'eqechisqa kasqanmanta.

¹⁴Kamachi-kaypi kashaq Egipto runakunatan kutichimpusaq paqarisqanku Egipto suyuq uray ladon Patrosman. Chaypin huk suyuta hatarichikunqaku, manañataq kallpayoqchu kanqa.

¹⁵Llapan suyukunamanta aswan sullk'a suyun kapunqa, manataqmi hayk'aqpas wakin suyukunamanta aswan allinqa kanqañachu. Wakin llaqtakunata mana kamachinanpaqmi Egiptotaqa huch'uy llaqtallata ruwasaq.

¹⁶Israel llaqtapas manañataqmi Egipto suyumanqa hap'ipakunqañachu, aswanmi Egipto suyuq thunikusqan Israel runakunata yuyarichinqa Egiptopi hap'ipakuspaqa huchallikusqankuta. Hinan reqsiwanqaku ñoqa Qollana Señor Diosqa kasqayta, nispa, nispayki.

¹⁷Iskay chunka qanchisniyoq wataq qallariy killanpa ñawpaqkaq p'unchayninpin Señor Diosqa niwarqan:

¹⁸Qan, runa, uyariway. Babilonia rey Nabukodonosormi soldadonkunata sinchitapuni maqanachirqan Tiro llaqta contra umankupas p'aqlayanankamaraq rikrankupas llulluyanankamaraq. Chaywanpas manan paypas soldadonkunapas imatapas chaskirqankuchu Tiro llaqta contra maqanakuspanku.

¹⁹Chayraykun ñoqa Qollana Señor Diosqa nini: Rey Nabukodonosormanmi Egipto suyuta qosaq, paytaqmi lliw qhapaq-kayninta apakapunqa. Lliw suyuntintan llat'ananqa, chaywantaqmi soldadonkunaman maqanakusqanmanta pagapunqa.

²⁰Nabukodonosorwanmi Egiptota munaychachisaq Tiro llaqta contra maqanakusqanmanta qopuspay, paymi soldadonkunapiwan ñoqapaq llank'apuwarqanku. Ñoqa Qollana Señor Diosmi chayta nini.

²¹Chay p'unchaymi Israel llaqtaq kallpan t'ikarinqa, hinan qan Ezekielqa sut'itapuni paykunaman rimarinki. Chaymantan paykunaqa reqsiwanqaku ñoqa Señor Dios kasqayta, nispa.