Read Quechua Cuzco Bible 1988 EZEKIEL 3 Bible Online

EZEKIEL 3 - Quechua Cuzco Bible 1988 bible

EZEKIEL 3

¹Niwarqantaq: Qan, runa, kay qelqa k'uyuta mikhuy, hinaspa phaway Israel runakunata rimapayaq, nispa.

²Hinan ñoqaqa simiyta hanllarirqani, paytaq qelqa k'uyuta mikhunaypaq qowarqan.

³Chaymantataq niwarqan: Kay qelqa qosqayta mikhuspa saksaykuy, nispa. Mikhuykuqtiytaq sumaq kasqa miel misk'i hina añakallaña.

⁴Chaymantataq niwarqan: ¡Phaway! Israel llaqtaman imatachus ñoqaq “paykunaman niy” munasqayta willamuy.

⁵Manan qantaqa kachasqayki mana yachasqa sasa rimay rimaq llaqtamanchu, aswanpas Israel llaqtallamanmi.

⁶Manallataqmi qanpa mana yachasqayki sasa rimaykunata rimaq hatun suyukunamanpaschu kachasqayki. Chay llaqtakunaman kachaqtiypas chaykunaqa uyarisunkipunin.

⁷Israel llaqtaymi ichaqa manapuni uyariytapas munasunkichu, mana ñoqata kasuyta munawasqankurayku. Llapanmi Israel llaqtaqa mana kasukuq k'ullukuna.

⁸Ñoqataqmi qanta ruwasqayki paykuna hina k'ulluta mana nanachikunaykipaq.

⁹Qespi rumita hinan ch'ilata ruwasqayki, qaqamantapas aswan ch'ilataraq. Paykunataqa amapunin manchakunkichu, millay mana kasukuq uyantinña kashaqtinkupas, nispa.

¹⁰Chaymantapas nillawarqantaq: Allintapuni uyariy lliw ima nisqaytapas, allinta hap'iy umaykipi.

¹¹Hinaspataq riy kamachi-kaypi kashaq llaqta-masiykikunaman, nimuytaq: Ahinatan nin Qollana Señor Diosqa, nispayki, uyarichunkupas amapas, nispa.

¹²Hinan Diospa Espiritun hoqariwarqan, qhepaypitaq uyarirqani manchay raphapapayta: Señor Diospa lliphlli-kayninta hanaq pachapi yupaychaychis, nispa niqta.

¹³Chay raphapapaytaqa kawsaqkunaq raphrankunan ruwasqa paykunapura waqtanakuspan, hinallataq paykunawan kaq ruedakunapas. Chay raphapapaytaq karqan pacha kuyuy hinaraq.

¹⁴Diospa Espirituntaq chaymanta horqorqowaspa aparikuwarqan, ñoqataq kasharqani khuyaytaq phiñasqataq, Señor Diostaq ichaqa qaqatapuni makinwan hap'ishawarqan.

¹⁵Hinan chayarqani Kibar mayu patapi Tel-abibman. Chaypin kamachi-kaypaq apasqa Israel runakuna tiyasharqanku, ñoqataq paykunawan qanchis p'unchayta tiyakuspay, mana imata ruwaspa musphasharqani.

¹⁶Qanchis p'unchay qhepatataq Señor Diosqa niwarqan:

¹⁷Qan, runa, Israel llaqta qhawaqtan churayki. Chay hinaqa allinta uyariway, ñoqaq sutiypitaq niy: Paqtataq imaynapas kawaq, nispa.

¹⁸Huk huchayoq runata: Wañunkipunin, nishaqtiy mana willankichu manataq rimapayallankipaschu: Hucha ruwanaykita saqepuy kawsanaykipaq, nispa chayqa, huchan hawan payqa wañupunqa, ñoqataq qanmanta cuentata mañasqayki chay runaq wañusqanmanta.

¹⁹Qantaqchus huchasapaman willanki chayqa, paypuni millay ruwayninta huchallikuynintapas mana saqenqachu chayqa, huchan hawan wañupunqa, qantaqmi ichaqa qespikunki.

²⁰Huk chanin runa chanin kayninta saqepuspa mana chaninta ruwanman, ñoqataq chay runaq urmananpaq hina pruebata churayman, qantaq mana payta: Paqtataq wañuwaq, nispa niwaqchu chayqa, chay runan huchan hawa wañupunqa, ichaqa wañusqanmantan cuentata mañasqayki.

²¹Qantaqchus chay runata niykuwaq ama huchallikunanpaq, paypas manataq huchallikunmanchu chayqa, kawsanqapunin, willasqata kasukusqanrayku, qanpas kawsayniykita qespichikunkin, nispa.

²²Sonqoypin Señor Diospa atiyninta repararqani, niwarqantaq: Sayarispa riy haqay pampaman, chaypin rimapayasqayki, nispa.

²³Ñoqataq pampaman puririrqani, chaypitaq Señor Diospa lliphlli-kayninta rikumurqani, Kibar mayu patapi rikusqayta hina. Uyanpamantataq wikch'ukurqani,

²⁴Diospa Espirituntaq ichaqa ñoqaman haykuykuwaspa sayarichiwarqan. Niwarqantaq: Riy wasiykita hinaspa wisq'akamuy.

²⁵Qan runataqa watanakunawanmi wataykusunkiku, chay hinapin llaqtaman mana lloqsiyta atinkichu, amañataq paykunawanpas kankichu.

²⁶Chaymantapas ñoqan qalluykita simiykiman k'askarqachisaq upayapunaykipaq, manataq atinkichu paykuna anyayta millay mana kasukuq uyantin kaqtinkupas.

²⁷Ñoqa rimapayaqtiymi simiykiqa kicharikapunqa, hinan paykunata ninki: Ahinatan Qollana Señor Diosqa nin, nispa, pipas uyariyta munan chayqa uyarichun, mana uyariy munaqqa amapas uyarichunchu, mana kasukuq llaqta kasqanrayku, nispa.