Read Quechua Cuzco Bible 1988 EZEKIEL 30 Bible Online

EZEKIEL 30 - Quechua Cuzco Bible 1988 bible

EZEKIEL 30

¹Señor Diosmi niwarqan:

²Qan, runa, profetizaspa niy: Qollana Señor Diosmi nin: Anchispa niy: ¡Ay Señor Diospa muchuchinan p'unchaymanta! nispayki.

³Chay p'unchaymi qayllaykamushanña, yana phuyuq hunt'aykusqan p'unchay, suyukunaqpas mancharikunan p'unchay.

⁴Egipto contran awqa-tinkuy kanqa, chaypiqa askhatan wañuchinqaku, qhapaq-kayninkutan suwanqaku, Egiptotaqa teqsinmantan thuninqaku. Etiopía suyuqa llaki p'unchaypin rikukunqa.

⁵Egipto runakunawan kuskan awqa-tinkuypi wañuranqaku Etiopía suyu runakuna, Libia suyu runakuna, Lidia suyu runakuna, Arabia suyu runakuna, Kub suyu runakuna, Egiptowan rimanakuq wakin suyukunapas, nispa.

⁶Qollana Señor Diosmi nillantaq: Egipto yanapaqkunaqa awqa-tinkuypin wañunqaku, wichay ladopi Migdol llaqtamanta uray ladopi Aswán nisqa llaqtakaman llapankupuni wañunqaku. Egiptoq alabakusqan atiyninqa huch'uyyachisqan qhepakunqa.

⁷Egipto suyun llapan suyumanta aswan purunyachisqa kanqa, llaqtankunapas raqay-raqaypin rikukunqa.

⁸Egipto suyuta kanaykuqtiymi, yanapaqnin suyukunapas atipasqa rikukuqtinmi, ñoqa Señor Diosqa kasqayta reqsiwanqaku.

⁹Egiptoq muchuchisqan kanan p'unchay chayamuqtinmi, kachapurikunata barcopi kachasaq, Etiopía suyupi llakhi kashaq runakunata mancharichinanpaq, chaymi llaksakunqaku. ¡Chay p'unchaymi qayllaykamushanña! nispa.

¹⁰Qollana Señor Diosmi nillantaq: Babilonia rey Nabukodonosorwanmi Egipto suyuq aqo t'iyu runanta ch'usaqyachisaq.

¹¹Paymi hamunqa millay awqa sonqo soldadokunantin suyuta thuninankupaq. Egiptomanmi espadantinkama phawaykunqaku, hinaspan ayawan hunt'aykusqata suyuta wikch'unqaku.

¹²Nilo mayutapas ch'akichisaqmi, hinaspan suyuntinta millay runakunaq makinman hap'iykachisaq, chay wak llaqtayoqkunawanmi purun raqay-raqayman suyuntinta tukuchisaq, lliw imakunapas chaypi kaqkunatawan. Ñoqa Señor Diosmi chayta nini.

¹³Qollana Señor Diosmi nillantaq: Menfis llaqtaq wak'a diosninkunatan thunisaq, yanqa idolonkunatapas tukupusaq. Egiptoqpas kamachiqnin manan pipas kapunqachu, suyuntinpi runakunatan llaksasaq.

¹⁴Egipto suyuq ura ladon Patrosta raqay-raqayman tukuchisaq, Zoán llaqtatan ninawan kanaykusaq, Tebas llaqtatataqmi ñak'arichisaq.

¹⁵Egipto runakunaq hap'ipakunan allin perqasqa llaqta Pelusiummanmi phiñakuyniyta chayachisaq, hinallataq Tebaspa aqo t'iyu runantapas chinkachisaq.

¹⁶Egipto suyutaqa ninawanmi kanaykusaq, Pelusium llaqtapas nanaywanmi q'ewiykachakunqa, Tebaspa perqankunatan wamphurqarimunqaku, Menfis llaqtapas llakisqallapunin kashanqa.

¹⁷On llaqtaq waynankuna Bubastis llaqtaq waynankuna awqa-tinkuypi wañunqaku, wakin runakunatataq kamachi-kaypaq apapunqaku.

¹⁸Egiptoq munaychakuyninta thunispa alabakusqan atiyninta chinkachiqtiymi, Tafnes llaqtata intiraq tutayanqa, Egiptotataq yana phuyuraq p'ampanqa, llaqtanpi runakunatataq kamachi-kaypaq apapunqaku.

¹⁹Chay hinatan Egipto suyuta muchuchisaq, hinan reqsiwanqaku ñoqa Señor Diosqa kasqayta, nispa.

²⁰Chunka hukniyoq wataq qallariy killanpa qanchis p'unchayninpin Señor Diosqa niwarqan:

²¹Qan, runa, uyariway, Egipto rey Faraonpa rikrantaqa ñoqan p'akirqani, chaytataqmi mana pipas hampiykurqanchu manallataq wataykurqanpaschu, qhaliyaspa espadanta hap'inanpaq.

²²Chayraykun ñoqa Qollana Señor Diosqa nini: Egipto rey Faraonpa awqanmi kani. Chaymi iskaynin rikranta p'akisaq, allin kaqtawan onqosqaña kaqtawan, espadata mana hap'iyta atinanpaq.

²³Egipto runakunatataqmi hinantin suyukunaman ch'eqeykachisaq, hinallataq llapan suyukunaman wisñiykusaq.

²⁴Hinaspan Babilonia reyta kallpachaspa makinman espadayta hap'iykachisaq, rey Faraonpatataq rikranta p'akipusaq, hinan payqa Nabukodonosorpa ñawpaqenpi k'irisqa wañunayashaq runa hina qaparinqa.

²⁵Babilonia reytaqa kallpachasaqmi, rey Faraonmantataqmi kallpanta qechupusaq. Babilonia reypa makinman espadayta hap'iykachiqtiymi, payqa Egipto contra sayarinqa, reqsiwanqakutaqmi ñoqa Señor Diosqa kasqayta.

²⁶Egipto runakunataqa llaqtakunaman suyukunamanwanmi ch'eqeykachisaq, hinan paykunaqa reqsiwanqaku ñoqa Señor Diosqa kasqayta, nispa.