Read Quechua Cuzco Bible 1988 EZEKIEL 32 Bible Online

EZEKIEL 32 - Quechua Cuzco Bible 1988 bible

EZEKIEL 32

¹Chunka iskayniyoq wataq chunka iskayniyoq killanpa qallariynin p'unchaypin Señor Diosqa niwarqan:

²Qan, runa, Egipto rey Faraonta runankunatawan niy: Qanmi ninki: Suyukunaq leonninmi kani, nispayki, ichaqa qochapi cocodrilollataq kanki. Mayuykipin qhospashanki, unutapas chakiykiwanmi qonchuchashanki, phawanantapas qholluqechispa.

³Chaymi Qollana Señor Diosqa nin: Askha huñusqa llaqtakunaq qayllanpin pataykiman llikayta wikch'uykamusaq, paykunataqmi chay llikaywan aysasunkiku.

⁴Hallp'amanmi aysarqamusqayki, chaypitaqmi pampaman wikch'upusqayki. Chaymanmi phalaq animalkunapas pataykiman chayamunqaku, llapan salqa animalkunan aychaykiwan saksaykunqaku.

⁵Hinantin orqokunamanmi aychaykita ch'eqechisaq, hinantin wayq'okunamanmi asnariq aychaykita hunt'achisaq.

⁶Yawarniykiwanmi pampataraq ch'aqchusaq, yawarniykin orqokunamanraq chayanqa, chaywantaqmi mayuq k'aktunkunapas hunt'a kanqa.

⁷Qanta thunirqoqtiyqa hanaq pacharaqmi tutayanqa, ch'askakunaraqmi ayphayanqa. Intitapas phuyuwanmi pakachisaq, killapas manañan sut'imunqachu.

⁸Qan patamanmi llapan hanaq pachapi k'anchaqkunata laqhayachimusaq, suyuykitapas pasaqtan tutayaykachisaq. Ñoqa Qollana Señor Diosmi chayta nini.

⁹Thunikusqayki willakuy mana reqsisqayki suyukunaman chayaqtinmi, askha llaqtakuna khuyayta llakikunqaku.

¹⁰Qan hawan askha llaqtakuna llaksakunqaku, reyninkupas pasaqtan q'aqchakunqaku, qayllankupi espadayta k'ancharichiqtiy. Qan urmaykuqtiykin paykunaqa wañunankumanta mancharikuspa khatatatanqaraq.

¹¹Ñoqa Qollana Señor Diosmi rey Faraonta nini: Babilonia reymi espadantin qan contra chayamunqa.

¹²Chay mana yupay atiy runaykikunan awqa sonqo allin qhari runakunaq k'irisqan wañunqa. Egiptoq uma hoqariynintan chinkachipunqa, mana yupay atiy runaykikunatapas p'uchukachipunqa.

¹³Sapanka mayuykipi ukyaq llapan uywakunatan tukupusaq, manañataqmi hayk'aqpas runapas uywapas sarusqankuwan qonchuyachimunqañachu.

¹⁴Hinan unuqa ch'uyayanqa, mayupas ima sumaqta suchunqa. Ñoqa Qollana Señor Diosmi chayta nini.

¹⁵Egipto suyuta ch'usaqman tukuchiqtiymi, suyuntin ch'usaq mana runayoq kaqtinmi, ñoqa Señor Diosqa kasqayta reqsiwanqaku.

¹⁶Chayqa wañuqpaq takina harawin, ahinatataqmi Egipto suyumanta runankunamantawan waqakuspa askha suyu warmikuna takinqaku. Ñoqa Qollana Señor Diosmi chayta nini, nispayki.

¹⁷Chunka iskayniyoq wataq qallariy killanpa chunka phisqayoq p'unchayninpin Señor Diosqa niwarqan:

¹⁸Qan, runa, Egipto suyuq askha runankunamanta harawiy. Wañuy-pachaman paykunata kachapuy, wakin allichachaq suyukunaq runankunatawan wañuqkunaq kasqanman kachapuy.

¹⁹Paykunata niy: ¿Qankunari wakinkunamanta aswan sumaqchu kankichis? Uraykuychis siriykuychis mana iñiqkunawan kuskapacha, nispayki.

²⁰Paykunapas awqa-tinkuypi wañuqkunawan kuskan urmaykunqaku. Espadaqa makillapiñan kashan paykunata wañuchinanpaq. Payqa runankunapiwanmi aysarparisqa kanqa.

²¹Wañuy-pachapi kaq allin atiyniyoq umakunan Egipto runakunamanta yanapaqninkunamantawan ninqaku: ¡Uraykarqamusqakuñan chay awqa-tinkuypi mana iñiqkunawan kuska chutarayanankupaq! nispanku.

²²Chaypin Asiriapas kashan muyuriqninpitaq soldadonkuna p'ampasqapas chuta-chutalla kashan. Llapan paykunaqa awqa-tinkuypin wañurqanku.

²³Kawsashaspaqa chay soldadonkunapas pasaqtan wak suyukunata llaksarqan, ichaqa paykunapas wañupullarqankutaqmi, kunantaq aswan ukhu t'oqopi p'ampaykusqa Asiriaq muyuriqninpi chuta-chutalla kashanku.

²⁴Chay hinallataqmi Elampas kashan, muyuriqninpitaq llapan soldadonkuna p'ampasqapas chuta-chutalla kashanku. Paykunapas awqa-tinkuyllapitaqmi wañurqanku, mana iñiq kaspanku Wañuy-pachaman uraykapurqanku. Kawsashaspaqa llaksakuqmi karqanku, kunantaq ichaqa aya p'ampanapi ima p'enqayraq kapushanku.

²⁵Elamqa wikch'urayashan llapan wañuq soldadonkuna ukhupin. Llapan paykuna mana iñiyniyoqqa awqa-tinkuypin wañurqanku, kunanqa aya p'ampanapin chuta-chutalla kapushanku. Kawsashaspaqa paykunapas llaksakuqmi karqanku, kunantaq aya p'ampanapi wañuchisqa runakunawan kuska ima p'enqayraq kapushanku.

²⁶Chhaynallataqmi Mesekpas Tubalpas llapan soldadokunaq chawpinpi wikch'urayashan. Llapan chaykunaqa mana iñiqkaman karqanku, kawsashaspaqa lliwtan llaksarqanku, chayraykun paykunaqa awqa-tinkuypi wañupurqanku.

²⁷Paykunaqa manan llaqtanrayku ñawpa wañuqkuna hina p'ampasqachu karqanku. Llaqtanrayku ñawpa wañuqkunaqa p'ampasqa kasqaku llapa maqanantin, espadallan sawnaykusqa escudollanwan qataykusqa. Kawsashaspaqa paykunapas lliw suyukunatan llaksasqaku.

²⁸Qanpas, rey Faraón, mana iñiqkunawan kuskan wañuchisqa kanki, awqa-tinkuypi wañuqkunawan kuskan chutarayanki.

²⁹Edompas hina atiyniyoqpachan chaypi kashan reyninkunantin kamachikuqninkunantin. Awqa-tinkuypi wañuqkunawan kuska, mana iñiqkunawan p'ampaykusqa kashanku.

³⁰Chayllapitaqmi kashan llapan wichay lado suyukunaq umallinkunapas Sidón llaqta runakunapas. Atiyniyoq karqanku, lliwta llaksarqanku, kunantaq awqa-tinkuypi wañuqkunawan kuska p'ampasqa ima p'enqayraq kapushan. Mana iñiyniyoqmi karqanku, awqa-tinkuypi wañuqkunawan kuskataq chutarayapushanku, wañuqkunawan kuska ima p'enqayraq.

³¹Rey Faraonmi llapan runankunapiwan chay wañuqkunata rikunqa, hinan rey Faraonqa llapan runakunaq wañusqanmanta sonqochakunqa.

³²Faraonwanmi lliw suyukunata llaksachirqani, chaywanpas mana iñiqkunaq chawpinpin awqa-tinkuypi wañuqkunawan kuska chutarayashan, hinallataq mana yupay atiy soldadonkunapas. Ñoqa Qollana Señor Diosmi chayta nini, nispa.