Read Quechua Cuzco Bible 1988 EZEKIEL 33 Bible Online

EZEKIEL 33 - Quechua Cuzco Bible 1988 bible

EZEKIEL 33

¹Señor Diosmi niwarqan:

²Qan, runa, llaqta masiykikunata niy: —Huk suyu contra awqata apamuqtiymi, chay llaqta runakuna paykuna ukhumanta llaqta qhawaqta akllakunqa,

³hinan chay llaqta qhawaqqa awqanpa soldadonkuna qayllaykamuqta rikuspa, pututunta waqachin runakunaman uyarichinanpaq.

⁴Pututuq waqasqanta uyarishaspa mana kasukuqtaqa awqan chayarqamuspan sipirqapunqa, ichaqa pay kikillanpunin wañunanpaqqa huchayoq kanqa.

⁵Pututu waqaqta uyarishaspa mana kasukurqanchu, chayraykun wañunanpaqqa pay kikillanpuni huchayoq, uyarishaspa kasukuspaqa manan wañunmanchu karqan.

⁶Chay qhawaqtaqchus llaqtanman awqanpa chayamusqanta rikushaspa, pututunta waqachispa runaman mana willanmanchu chayqa, awqaq mayqen wañuchisqanpas kikinpa huchanmantan wañunqa, ichaqa chay runaq wañusqanmantaqa qhawaqtan watusaq, nispayki.

⁷Qantataqmi Israel llaqta qhawaqta churarqayki. Qanmi willamusqaykunata makilla uyarinki, hinaspan Israel runakunaman nimusqaykunata willanki.

⁸Huk huchasapata niyman: Yaw huchasapa, wañunkipunin, nispay, chay runamantaq mana willawaqchu huchanta saqepunanpaq chayqa, chay runaqa wañunqa kaq huchanpin. Ñoqataq ichaqa wañusqanmanta qanta watusqayki.

⁹Qantaqchus chay huchasapaman huchanta saqepunanpaq willanki, paytaq mana kasukunqachu chayqa, kikin huchallanpin wañupunqa, qantaq ichaqa qespikunki, nispa.

¹⁰Qan, runa, Israel runakunata niy: Qankunaqa nishankichis: Ñoqanchisqa kashanchis millay huchanchiskunaq ñit'iykusqanmi. Chayraykun kawsayninchispi t'awiykapushanchis. ¿Imaynatapunitaq kawsaytari atisun? nispa.

¹¹Chay hinaqa niy: Qollana Señor Diosmi nin: Sutiyrayku juraspan nini: Manan munanichu huchasapaq wañunanta, aswanmi huchankuta saqepuspa kawsanankuta munani. Qankunapas, Israel runakuna, millay huchaykichista wikch'upuspa ñoqaman kutirikampuychis. ¿Imanaqtintaq huchaykichispiri wañuwaqchis? nispa, nispayki.

¹²Qan, runa, llaqta-masiykikunata niy: Chanin runachus huchallikunqa chayqa, ñawpaq chanin kasqanwanqa manan qespisqachu kanqa. Kaqllataqmi huk millay huchasapapas saqepunqa millay kayninta chayqa, ñawpaq millay-kayninmantaqa manan wañunqachu. Chanin runapas huchallikunqa chayqa, ñawpaq chanin-kayninqa manan valenchu kawsashanallanpaq.

¹³Ñoqataq niyman chanin runata: Kawsankin, nispay, paytaq chanin-kayninman hap'ipakuspa, mana allinkunata ruwapunqa chayqa, ima allin ruwasqankunatapas manan kaqpaqpas hap'isaqchu, aswanpas wañullanqapunin mana allin ruwasqankunamantaqa.

¹⁴Huk huchasapa runatachus niyman: Cheqaqtapuni huchaykimanta wañunki, nispay, chay runataq hucha ruwayta saqepuspa allinkaqta chaninkaqtawan ruwapunman chayqa, kawsanqapunin.

¹⁵Kutichipunmantaq manumanta ima hap'isqatapas suwakusqanmantapas, kawsananpaq kamachikuy simiytapas hunt'allanmantaq, lliw huchallikuykunatapas saqepunmantaq chayqa, cheqaqtapunin mana wañunqachu.

¹⁶Allin kaqtataq chaninkaqtawan ruwapunqapas chayqa, kawsallanqapunin, ñawpaq millay hucha ruwasqankunapas manañan yuyarisqañachu kanqa.

¹⁷Chaywanpas llaqta-masiykikunaqa ninkun: Señor Diospa ruwasqankunaqa manan chaninchu, nispanku, ichaqa paykunan mana chanin ruwaqkunaqa kashanku.

¹⁸Huk chanin runataq chanin-kayta saqepuspa mana allinkunata ruwapunman chayqa, wañullanqapunin ruwasqanmantaqa.

¹⁹Huk huchasapa runataqchus millay kayninta wikch'upuspa allinkaqta chaninkaqtawan ruwapunman chayqa, kawsallanqapunin.

²⁰Chaywanpas, Israel runakuna, qankunaqa nishallankichispunin: Señor Diospa ruwasqankunaqa manan chaninchu, nispaykichis. Ñoqataqmi qankunata ruwasqaykichisman hina chaninchasqaykichis, nispa, nispayki.

²¹Kamachi-kaypaq apachikusqaykumanta chunka iskayniyoq wataq chunka killanpa chunka phisqayoq p'unchayninpin huk ayqekuq runa Jerusalenmanta chayamurqan, hinaspan willawarqan: ¡Jerusalenmi awqakunaq makinman urmaykun! nispa.

²²Ayqekuq runaq chayamunan ñawpaq ch'isin sonqoypi Señor Diospa atiyninta repararqani. Hinan tutamanta runa chayarqamuqtinpacha upa-kayniymanta Señor Diosqa rimarichiwarqan.

²³Chaymantataq Señor Diosqa niwarqan:

²⁴Israel suyuq raqay-raqayninpi tiyaq runakunan kay hinata rimakuspa purishanku: Hinaña Abrahamqa sapallan karqan chaypas, suyuntin hallp'an paypaqa karqan. Ñoqanchisqa askhamá kanchis, chay hinaqa llapanmi ñoqanchispa, nispanku.

²⁵Chayrayku paykunata niy: Qollana Señor Diosmi nin: Qankunaqa aychatan yawarnintinta mikhunkichis, wak'a dioskunatan yupaychankichis, runakunatan wañuchinkichis. ¿Chaychu suyuntintaraq kaqnichakuyta munankichis?

²⁶Qankunaqa maqanakuq, usqhaylla phawariq, cheqnikusqaykuna ruwaq, llapallaykichis runa-masiykichispa warminwan puñuqkunan kankichis. ¿Chay hina runachu suyuntinta kaqnichakuwaqchis? nispayki.

²⁷Nillaytaq: Qollana Señor Diosmi nin: Sutiyrayku juraspan nini: Chay raqay-raqaypi tiyaq runakunapas sipisqan wañullanqakutaq, wak pampakunapi tiyaqkunatataqmi salqa animalkuna mikhupunqa. Qaqa wasikunapi pakakuqkunatataqmi onqoywan wañuchisaq.

²⁸Suyutaqa llapantapunin purunyachipusaq, uma hoqarichiq kallpantapas thunisaqpunin. Israelpa orqonkunapas ch'ilinmi kapunqa, manapunin pillapas chaynin puriqpas kanqachu.

²⁹Millay p'enqay huchallikusqanmanta kay suyuta llapanta purunyachiqtiymi, reqsiwanqaku ñoqa Señor Diosqa kasqayta, nispayki.

³⁰Nillawarqantaq: Qan, runa, llaqta-masiykikunan qanmanta rimanku perqa k'uchukunapi, wasi punkukunapi. Hukmanta huktaq ninakunku: Hamuychis, uyarisun ima willakuychá Señor Diospa kashan chayta, nispa.

³¹Hinaspan llaqtay hamuspa uyariq chimpaykamusunkiku, imaynan parlasqayki uyariq hamullankupuni, chay hinatan ñawpaqeykipi tiyaykunku, ichaqa manan kasukunkuchu. Yanqa: ¡Ahinapuni kachun! niqllan kanqaku, sonqonkuwantaq ichaqa qolqellatapuni munapakushanku.

³²Paykunaqa sumaq takiqta munay kunkawan takiqta, allin arpa tocaqta hinallan qhawarisunki. Rimasqaykitapas uyarinkun, ichaqa manan ruwaytapuniqa munankuchu.

³³Chaywanpas lliwpunin hunt'akunqa, hunt'akuqtintaqmi yachanqaku paykuna ukhupi huk profeta kasqanta, nispa.