Read Quechua Cuzco Bible 1988 EZEKIEL 34 Bible Online

EZEKIEL 34 - Quechua Cuzco Bible 1988 bible

EZEKIEL 34

¹Señor Diosmi niwarqan:

²Qan, runa, Israel michiqkuna contra profetizay, hinaspataq niy: Qollana Señor Diosmi nin: ¡Imaraqmi Israelpa michiqninkunaqa, paykuna kikillankutan qhawakunku! ¿Manachu michiqkunaq qhawananqa ovejakuna?

³Qankunan llukllutapas mikhunkichis, millmamantapas p'achata ruwakunkichis, allin wiranta ovejatapas nak'akunkichis, manataq ovejataqa michinkichischu.

⁴Qankunaqa manan toqti ovejatapas yanapaykunkichischu, onqosqatapas manan hampiykunkichischu, chakin p'akisqatapas manan chaqllaykunkichischu, pasakapuqtapas manan kutichimunkichischu, chinkakuqtapas manan maskhamunkichischu, aswanpas mana chaninwanmi rikunkichis awqa sonqowan qhawarispa.

⁵Mana michiqniyoq kaspan ovejaykunaqa ch'eqesqa kashan, chaytataq atoqkuna mikhupushan.

⁶Ovejaykunaqa ch'eqeriykapurqankun hinantin orqo-orqoman, chinkapurqankutaq hinantin pachakunaman, ovejaykunataqa manan pillapas qhawarisqachu maskhaqpas risqachu.

⁷Chay hinaqa, michiqkuna, nisqayta allinta uyariwaychis.

⁸Ñoqa Qollana Señor Diosmi sutiyrayku juraspa nini, imaymana rikch'aq atoqkunan ovejaykunata suwakuspa mikhuykapusqa, mana michiqniyoq kasqankurayku. Michiqniykunaqa manan oveja maskhaq rirqankuchu, aswanpas paykunallatan qhawakurqanku oveja qhawanankutaqa.

⁹Chayrayku, michiqkuna, simiykunata allinta uyariwaychis.

¹⁰Ñoqa Qollana Señor Diosmi michiqkunaq awqan kani, chaymi ovejaykunata manuchasaq. Michiq-kayninkumantan qarqopusaq, paykuna kikinkutapas manaña michikunankupaq. Paykunamantaqa qechupusaqmi ovejaykunata, ama hinalla mikhushanankupaq.

¹¹Chay hinaqa, ñoqa Qollana Señor Diosmi nini: Ñoqa kikiy ovejaykunata maskhaspaymi michikapusaq.

¹²Imaynan michiqqa ch'eqe pampa kasqanmanta huñuykuspa ovejankunata qhawan, chay hinatan ñoqapas qhawasaq. Huk p'unchaymi yana phuyuq pakasqan kaspa hinantinman ch'eqeykurqanku, chaymantan qatikampusaq.

¹³Wak llaqtakunamantapas horqokampusaqmi, huñurqospaymi kikin hallp'ankuman qatikapusaq. Israelpa orqonkunaman, mayukunaq qayllanman, llaqtakunaq qayllanmanwan qatispay michimusaq.

¹⁴Allinnin q'achutan mikhuchimusaq, Israelpa orqonpi allin q'achuq kasqanpin kanqaku, chaypiraqmi samaraykunqaku, sumaq q'achutataq mikhunqaku.

¹⁵Ñoqa kikiymi ovejaykunaq michiqnin kapusaq, ñoqapunin pusakapusaq samakunankupaq.

¹⁶Chinkasqa ovejakunatapas maskhampusaqmi, pasakapuqtapas kutichikampusaqmi, chakin p'akisqatapas chaqllaykusaqmi, onqosqatapas hampiykusaqmi. Wirankunata allichaqninkunatataqmi nak'apusaq, ñoqan qhawasaq imaynatachus qhawanata hinapuni. Ñoqa Qollana Señor Diosmi chayta nini.

¹⁷Chay hinaqa, ovejaykuna, ñoqan nishaykichis: Ovejapurata chaninchasaq, kaqllataq anejota orqo cabratawan.

¹⁸¿Manachu wakinniykichisqa mikhuwaqchis allinnin q'achuta, chakiykichiswan puchunta sarunaykichistaqa? Ch'uya unutan ukyankichis, wakinnintataq chakiykichiswan qonchuyachinkichis.

¹⁹Hinan wakin ovejaykunaqa sarusqaykichis q'achukunata mikhushanku, qonchuyachisqaykichis unutataq ukyashanku.

²⁰Chayraykun ñoqa Qollana Señor Diosqa niykichis: Tullu ovejakunatawan wira ovejakunatawanmi juzgasaq.

²¹Qankunan tanqarparirqankichis tullu ovejakunata, waqraykichiswan waqraspataqmi ayqechirqankichis.

²²Ñoqan ichaqa ovejaykunata qespichisaq. Manan hinallatachu suwakuqta qhawasaq, juzgasaqpunin ovejapurata.

²³Kamachiy Davidtan kamachikuqta churasaq, pay sapallanmi michiq kanqa, paytaqmi ovejaykunata qhawaspa michinqa.

²⁴Ñoqa Señor Diosmi Diosninku kasaq, kamachiy Davidtaqmi umallinku kanqa. Ñoqa Señor Diosmi chayta nini.

²⁵Paykunawanmi rimanakusaq, thak kawsayta paykunaman qonaypaq. Suyuntinmantan salqa animalkunata chinkachipusaq, mana ima llakillayoqmi ch'inneqkunapi tiyanqaku, sach'a-sach'akunapipas puñunqaku.

²⁶Ñoqan paykunata ch'uya orqoy muyuriqpi tiyachisaq, hinaspataqmi saminchasaq, paranan mitapin saminchay parata chayachisaq.

²⁷Mallkikunapas rurunqan, hallp'apas rurunqan, hinan paykunaqa mana ima llakillayoq kikinkuq hallp'ankupi tiyanqaku. Hap'iqninkuq makinmanta kamachi-kaymanta qespichispa horqoqtiymi, reqsiwanqaku ñoqa Señor Diosqa kasqayta.

²⁸Wak llaqtayoqkunapas manañan paykunata wakmanta llat'ananqañachu, manallataq atoqkunapas mikhunqañachu. Mana ima llakillayoqmi tiyakunqaku mana piqpa manchachisqan.

²⁹Qosaqmi allin mikhuypa wiñanan chakrakunata, manañan yarqaymanta muchunqakuchu, manataq wak suyukunapas paykunamanta asikunqakuñachu.

³⁰Hinan reqsiwanqaku ñoqa Apu Señor Diosninkuqa paykunawan kashasqayta, Israelpas llaqtay kasqanta.

³¹Qankunan kankichis michinay ovejaykuna, qankunan llaqtay kankichis, ñoqataq Diosniykichis kani. Ñoqa Qollana Señor Diosmi chayta nini, nispan, nispayki.